Read Kalanga 2 Bomambo 6 Bible Online

2 Bomambo 6 - Kalanga bible

2 Bomambo 6

¹Badiyiwana be balebesambeli bakadwa Elisha bakati, “Bona, pathu patigele tili pasi kwe ndaulo iyo pakamanikana mutili.

²Ngatiyendeni ku Jorodani mmwe ne mmwe wedu ateme bhango, ngono tizwibakigwe pathu patingagala ikoko.” Ngono kadabila eti, “Yendani.”

³Ipapo mmwe wabo kati, “Tokumbila muyende ne balanda benyu.” Ngono kadabila eti, “Ndowoyenda.”

⁴Ndizo kayenda nabo. Ngono bakati beswika ku Jorodani bakatema miti.

⁵Koga kwakati mmwe wabo atjatema nti, nsholo we shathu lile ukawila mu vula, ngono kalila eti, “Tetshi wangu wee, labelaadzimiwa.”

⁶Ipapo nlume we Ndzimu kabe eti, “Lawila poni?” Wakati enlakidza pathu palawila, Elisha kavuna ikuni katjilashila ipapo ngono butale gukaangama.

⁷Ngono kati, “Uguduse.” Ndizo katambunudza luboko gugwe kagutola.

⁸Kwakati mambo we Siriya ali mu ngwa ne Iziraela, kalangana ne balanda babe kati, “Bukotokelo gwangu gowobe kwakati ne kwakati.”

⁹Koga nlume we Ndzimu katumila dama kuna mambo we Iziraela eti, “Uyele njele kuti autopinda pathu ipapo, ngoti Basiriya banodelukila ko.”

¹⁰Ngono mambo we Iziraela katuma nthu kunoshola pathu pa abudziwa nge nlume we Ndzimu, wakabe egala enkumbuludza ngekwa ikoku ndizo kazwitjidza ikoko kusi kang'ompela kene kabili.

¹¹Moyo wa mambo we Siriya wakadziyidzika kwazo ngekwa ikoku, ngono kadana balanda babe kabadwa kati, “Apa amungandilakidze kuti umile na mambo we Iziraela pakati kwedu ndiyani kene?”

¹²Mmwe we balanda babe kati, “Akuna mu tili, tetshi wangu, mambo wangu, ndi Elisha nlebesambeli umu Iziraela unobudza mambo we Iziraela matama a munoleba mu ng'umba yenyu ye bulalo.”

¹³Ngono mambo kabadwa kati, “Yendani munobona kuti uponi, ndizo nditume bathu ndimbhate.” Ngono kadwiwa kuyi, “Bona, umu Dotani.”

¹⁴Ndizo katumila mbizi ne koloyi dze ngwa kose ne ngwa hwulu, ngono bakaswika kuli busiku bakakomba nzi nkulu.

¹⁵Kwakati nlanda we nlume we Ndzimu a binduka ngono kabhudila kuzhe, bona, ngwa ne mbizi ne koloyi dze ngwa dzikabe dzakakomba nzi nkulu. Ngono nlanda kati, “Tetshi wangu wee, towothama tjini kene?”

¹⁶Ngono nlebesambeli kati, “Usitje, ngobe ibaba banaswi, banji pana ibabo banabo.”

¹⁷Ipapo Elisha katembezela eti, “Yahwe zhulani mesho awe kuti abone.” Ndizo Yahwe bakazhula mesho e nzhuzha ngono kalinga kabona dombo lili zhele mbizi ne koloyi dze ngwa dze moto dzakapoteleka Elisha.

¹⁸Ngono kwakati Basiriya bedelukila pasi kunli, Elisha katembezela kuna Yahwe eti, “Lobani bathu ibaba nge bupofu.” Ndizo bakabaloba nge bupofu kuyendidzana nge ntembezelo wa Elisha.

¹⁹Ngono Elisha kabadwa kati, “Iyeyi zila ateiyo, naiko ne nzi nkulu auteuli iwo, mundisale shule ngono ndowomuyisa ku nlume wamunoshaka.” Kabatungamilila ku Samariya.

²⁰Tjinyolotjo bakati bengina mu Samariya, Elisha kati, “Yahwe zhulani mesho e balume ibaba kuti babone.” Ndizo Yahwe bakazhula mesho abo bakabona ngono bakazwibona balipakati kwe Samariya.

²¹Kwakati mambo we Iziraela ebabona, kabhuzwa Elisha kati, “Tate apa ndibabulaye kene? Apa ndibabulaye?”

²²Ngono kadabila eti, “Usibabulaye, apa ungabulaya bawatapa nge thumo nenge nsebe kene? Biga zojiwa ne vula mbeli kwabo kuti baje bang'we ngono babgwilile kuna tetshi wabo.”

²³Ndizo kabathamila nzano nkulu ngono bakati baja bang'wa kabaletja, ngono bakayenda kuna tetshi wabo. Ngono Basiriya bakamisa ku nginilila shango ye Iziraela.

²⁴Kwakati shule Bhenihadadi mambo we Siriya kalulwamisa ngwa iye yose ngono katathila kanokomba Samariya.

²⁵Ngono kwakabe kuna bhamba gulu mu Samariya, bakayikomba kwe tjibaka tjilefu kukadza kukatengesiwa nsholo we donki nge shekele dze siliva dzili makumi ali zhanakadzi (80) ne kung'ompela mu bunna kwe nswani we njiba kuli shekele dze siliva dzili shanu.

²⁶Kwakati mambo we Iziraela eyenda pezhugwi kwe guma, nkadzi kalilila kunli eti, “Mundibhatshe, tetshi wangu, imwi mambo.”

²⁷Ngono mambo kashandula eti, “Ha Yahwe basingakubhatshe, imi ndowotola ngayi bhatsho kene? Ku lutombo kene kunoswinigwa nkumbi?”

²⁸Ngono mambo kambhuzwa eti, “Kwatini?” Nkadzi kashandula eti, “Nkadzi iwoyu wakandidwa eti, ‘Zhisa nkololo uwo tije nasi ngono mangwana towoja nkololo wangu.’

²⁹Ndizo takabhika nkololo wangu tikaja, ngono kwakati tjimuka ndi ndwa nditi, ‘Zhisa nkololo uwo tije’, ngono kasumbika nkololo uwe.”

³⁰Kwakati mambo ehwa matama e nkadzi iwoyu, kapalula zwiambalo zwizwe, wakati atjayenda pezhugwi kwe guma bathu bakalinga ngono bakabona akaambala saka kusi mu mbili uwe.

³¹Ngono kati, “Ndzimu ngabandilobe ndife ha zhuba linganomila nsholo wa Elisha nkololo wa Shafati utjimile munli nasi.”

³²Elisha wakabe aligele mu ng'umba iye ne sholotjena dziligele naye. Mambo bakatuma ntumwa ngono wakati asathu kaswika, Elisha kadwa sholotjena kati, “Apa mobona kuti mbulayi watuma nthu kundithubula nsholo kene? Bonani, ha ntumwa ezha munzhalilile kuzhe musunde tjizhalilo. Apa ate nsindo we makumbo a tetshi uwe shule kukwe kene?”

³³Ngono wakati atjalebeleka nabo, mambo kadelukila kunli kati, “Mbatsha idzedzi dzodwa kuna Yahwe. Ndowobe nditjamilililani Yahwe kene?”