Read Kalanga 2 Bomambo 7 Bible Online

2 Bomambo 7 - Kalanga bible

2 Bomambo 7

¹Ngono Elisha kati, “Ihwa dama la Yahwe, tjinoleba Yahwe ndi etji, mangwana nge tjibaka itjetji tjilizanyo tje bgwisa gwe tjiwunga gowobe gutengesiwa ne shekele ing'ompela, ne zwilizanyo zwibili zwe bhali zowotengwa nge shekele ku nkoba we Samariya.”

²Ngono ntungamili unonayidziwa luboko ndi mambo kadwa nlume we Ndzimu kati, “Bona, nenguba Yahwe bangazhula mafesitere e kudzimu, apa ikoku kungashingikala kene?” Ngono Elisha kadabila eti, “Unowokubona nge mesho awo, koga autowokuja.”

³Kwakabe kuna balume bali banna begwala mapele ku nkoba we nzi nkulu, ngono bakalangana beti, “Nekutini tingagala ipapa kuswikila tifa kene?

⁴Ha titi, ‘Towobgwilila mu nzi nkulu’, kuna bhamba mu nzi nkulu towofila mukati, ngono apa tigala ipapa towofa zwedu. Ndizo ngwenu ngatiyendeni ku bukotokelo gwe Basiriya. Ha bangatitjidza towotjila, ha bangatibulaya towofa.”

⁵Ndizo bakamilika kutjakabhata bakayenda ku bukotokelo gwe Basiriya, koga bakati beswika ku ndzibo we bukotokelo gwe Basiriya, bona, kwakabe kusina nthu mukati.

⁶Ngobe Yahwe bakabe bathama kuti ngwa ye Baasiriya ihwe nsindo we koloyi dze ngwa newe mbizi ne nsindo we ngwa hwulu, kwabakadzina baka budzana beti, “Bona, mambo we Iziraela wati shakila bomambo be Bahiti na bomambo be Egipiti kuti bazhe batinginilile.”

⁷Ndizo bakamilika bakatizha kutjakabhata ngono bakasiya mishasha yabo ne mbizi ne madonki abo. Bakasiya bukotokelo gwabo gwakajalo bezwitjidza.

⁸Ngono balume banogwala mapele bakati batjiswika ku ndzibo we bukotokelo bakangina mu nshasha, ngono bakaja bakang'wa, bakasenga siliva ne golide ne zwiambalo ngono bakayenda bakanozwisumbika. Bakashanduka bakangina mu nshasha mmwe ngono bakasenga zwithu muuli bakanozwisumbika.

⁹Ipapo bakalebesana beti, “Atitothama zubuyanana. Zhuba ileli ndele ndebo mbuya, ngono apa tingazwinyalaligwa tikamilila kuti zhuba libhude, lobgwa shamu kowotiwila, ngono ngwenu ngatiyendeni tinozibisa be ng'umba ye bumambo.”

¹⁰Ndizo bakayenda bakanodana balindi be nkoba we nzi nkulu bakababudza beti, “Tayenda ku bukotokelo gwe Basiriya ngono tawana kusina ne nthu unoboneka kene unohwika koga kwabe kuna mbizi dzakasungiligwa ne madonki akasungiligwa, ngono ne mishasha yasiyiwa yakajalo.”

¹¹Balindi bakaandamisa ndebo ngono kukanozibisiwa neku ng'umba ya mambo.

¹²Ngono mambo bakamuka kuli busiku bakadwa balanda babo bakati, “Ndowomubudza kuti Baasiriya batilukila gwanga tjini. Banoziba kuti tobulawa nge zhala, ndizo wali babhuda mu bukotokelo banobgwata ku shango bekumbulila beti, ‘Ha bangabhuda mu nzi nkulu towobatapa betjila tikangina mu nzi nkulu.’ ”

¹³Ngono mmwe we balanda babe kati, “Imani bamwe balume batole mbizi dzili shanu munadzasala, bona, banonga bunji gose gwe Baiziraela bakasala ipapo, bona, banonga bunji gwe Baiziraela bakalobesiwa, ngatitumileni bathu banoshola.”

¹⁴Ndizo bakashalula koloyi dze ngwa mbili, ngono mambo kabatuma kutobela ngwa ye Basiriya eti, “Yendani munoshola.”

¹⁵Bakabatobela bakadzina bakanoswika ku Jorodani, ngono mu zila kwakabe kulizhele zwiambalo ne zwija zwakabezwilashiwa nge Basiriya mu kutizha kwabo. Ndizo batumwa bakashanduka bakanobudza mambo.

¹⁶Ngono bathu bakabhuda bakanotapa bukotokelo gwe Basiriya, ndizo tjilizanyo tje bgwisa gwe tjiwunga tjikatengesiwa nge shekele, ne zwilizanyo zwibili zwe bhali zwikatengisiwa nge shekele, kuyendidzana nge dama la Yahwe.

¹⁷Ipapo ntungamili wakabe mambo enaila luboko gugwe, kwakabe kuli iye wakalingilila nkoba we nzi nkulu, ngono bathu bakantshamba nge makumbo mu nkoba ngono kafa sekwa kaleba nlume we Ndzimu mu tjibaka tja mambo bakabe bedelukila ku ng'umba yabo.

¹⁸Kwakashingikala koga sekwa kaleba nlume we Ndzimu eti, “Zwilizanyo zwibili zwe bhali zowotengesiwa nge shekele, ne tjilizanyo tje bgwisa gwe tjiwunga tjowotengesiwa nge shekele mu tjibaka itjetji mangwana pa nkoba we Samariya,”

¹⁹koga ntungamili wakabe adwa nlume we Ndzimu eti, “Bona, nenguba Yahwe bangazhula mafesitere e kudzimu, apa ikoku kungashingikala kene?” Ngono nlume we Ndzimu wakabe anshandula eti, “Unowokubona nge mesho awo koga autowoja tjimwe.”

²⁰Ngono nge malebeswa nditjo tjakanshingikalila, bathu bakantshamba tshamba mu nkoba ngono kafa.