Read Kalanga 2 Bomambo 9 Bible Online

2 Bomambo 9 - Kalanga bible

2 Bomambo 9

¹Nlebesambeli Elisha kadana mmwe we badiyiwana be balebesambeli ngono kandwa kati, “Uzwisunge thunji ngono utole itenyana tje mafuta uyende ku Ramotigiliyadi.

²Ngono uti uswika ushake Jehu nkololo wa Jehoshafati ali nkololo wa Nimishi. Ungine un'duse pakati kwe bakwinya babe, un'yise ku ng'umbana itjamukati.

³Ukotola itenyana tje mafuta un'dile mafuta mu nsholo, ngono uti, ‘Koleba Yahwe bakati, Ndokuzhodza kube mambo we Iziraela’. Ipapo ukozhula nkoba utizhe, usinonoke.”

⁴Ndizo nzhuzha we nlebesambeli kayenda ku Ramotigiliyadi.

⁵Wakati eswika, kawana batungamili be ngwa baligelepasi ngono kati, “Ndina ndayidzo yenyu, imwi ntungamili.” Jehu kabhuzwa eti, “Kuna upi wedu?” Kashandula eti, “Kumuli imwi ntungamili.”

⁶Jehu kamilika kangina mu ng'umba, ipapo nlebesambeli katebulila mafuta mu nsholo uwe endwa eti, “Koleba Yahwe Ndzimu we Iziraela bakati, Ndokuzhodza kube mambo we bathu ba Yahwe, mu Iziraela.

⁷Ngono ulobese be nsha wa Ahabu tetshi uwo, ngono ndowobgwilizila lopa le balanda bangu balebesambeli ne lopa le balanda bose ba Yahwe lakatebugwa ndi Jezebhele.

⁸Ngoti nsha wose wa Ahabu unowoloba, ngono ndowothubula kuna Ahabu bose bebupelo betjilisana mu Iziraela, balanda kene bakasununguka.

⁹Ngono ndowothama nsha wa Ahabu se nsha wa Jeroboamu nkololo wa Nebati, nenge se nsha wa Bhaasha nkololo wa Ahija.

¹⁰Ngono Jezebhele unowojiwa nge mbgwa mu ntuthu we Jezirele, akuna unowombiganya.” Ipapo kazhula nkoba katizha.

¹¹Kwakati Jehu ebhudila kuzhe ku balanda ba tetshi uwe, bakabhuzwa beti, “Apa tjimwe ne tjimwe tjakalulwama kene? Ini mpengo iwoyu abeazha kukuli?” Jehu kadabila eti, “Nlume iwoyo monziba kose ne zwilebo zwizwe.”

¹²Ngono bakandwa bakati, “Autolebesa, utibudze.” Jehu kabadwa eti, “Wandidwa eti, ‘Koleba Yahwe bakati, Ndokuzhodza kube mambo we Iziraela.’ ”

¹³Ngono bakalibilidza mmwe ne mmwe wabo katola hazu iye bakadziwala mu matathiso kusi kukwe, bakalidza lunyanga bemimila beti, “Jehu ndi mambo.”

¹⁴Ndizo Jehu nkololo wa Jehoshafati ali nkololo wa Nimishi kalukila Joramu gwanga. Ipapo Joramu ne Baiziraela bose bakabe babe bakalinda Hazaele mambo we Siriya ku Ramotigiliyadi,

¹⁵ngono Mambo Joramu wakabe abgwilila ku Jezirele kunolapiwa mbonje dzaakakubadziwa nge Basiriya paakabe egwa na Hazaele mambo we Siriya. Jehu kati, “Ha kulikuti nditjo tjamakakumbula, ngakusheteke unobhuda mu nzi nkulu kayenda kanoandamisa thawu mu Jezirele.”

¹⁶Ipapo Jehu katatha koloyi iye ye ngwa kayenda ku Jezirele, ngobe Joramu wakabe alileleko, ngono Ahaziya mambo we Juda wakabe ayenda kunonshola.

¹⁷Kwakati nlindi wakabe alimile pezhugwi kwe ngadzi mu Jezirele ebona goko la Jehu libuya, ngono kati, “Ndobona goko.” Joramu kabe eti, “Tola ntaswi we mbizi, ngono untume alishanganidze ngono ababhuzwe ati, ‘Mazha nge mbakiso kene?’ ”

¹⁸Ndizo ntaswi we mbizi kanshangamidza kati, “Koleba mambo bakati, ‘Mazha nge mbakiso kene?’ ” Jehu kashandula eti, “Uneni nge mbakiso kene? Poteleka undisaleshule.” Ngono nlindi kaleba eti, “Ntumwa waswika kubali, ngono aazoshanduka.”

¹⁹Ndizo mambo bakatuma ntaswi we mbizi we bubili. Ngono kaswika kubali kati, “Koleba mambo bakati, ‘Mazha nge mbakiso kene?’ ” Ngono Jehu kashandula eti, “Uneni nge mbakiso kene? Poteleka undisaleshule.”

²⁰Nlindi kaleba kakale eti, “Waswika kubali, ngono aazoshanduka, ngono yendiso ungati ngeya Jehu nkololo wa Nimishi, ngobe unoyendisa se mpengo.”

²¹Joramu kabe eti, “Lulwamisani koloyi yangu ye ngwa.” Ngono kwakati kwalulwamisiwa, Joramu mambo we Iziraela na Ahaziya mambo we Juda bakabhuda kunoshanganidza Jehu, mmwe ne mmwe ali mu koloyi iye. Bakanoshangana naye ku nnda wa Naboti we N'jezirele.

²²Ngono Joramu wakati ebona Jehu kabhuzwa kati, “Apa wazha nge mbakiso kene Jehu?” Jehu kashandula eti, “Kungabe mbakiso tjini kutjizhele bupombgwe gwa mmeyabo Jezebhele ne buloyi gwabo kene?”

²³Ndizo Joramu kashanduka katizha, kadwa ahaziya kati, “Gwanga, Ahaziya.”

²⁴Ngono Jehu kakweba dati lile nge simba lile lose ngono kabhaya Joramu pakati kwe mathudzi awe, thumo likabhaya mu moyo uwe ngono kawila mu koloyi iye ye ngwa.

²⁵Jehu kadwa Bhidika nlauli uwe we koloyi dze ngwa kati, “Untole unlashile mu nnda wa Naboti we N'jezirele. Kumbula kuti kwakati imi nawe takatatha koloyi dze ngwa takabapa takasala tate babe Ahabu shule, Yahwe bakatibudza ngekukwe beti,

²⁶‘Madekwe ndakabona lopa la Naboti ne lopa le bakololo babe, koleba Yahwe, ngono nge lebeswa ndowothama kuti ulibgwilizile mu nnda iwoyu, koleba Yahwe.’ Ndizo ngwenu untole unlashile mu nnda iwoyu kuyendidzana nge dama la Yahwe.”

²⁷Kwakati Ahaziya mambo we Juda ebona tjashingikala, katizha nge zila ye Betihagani. Ngono Jehu kansala shule, emimila eti, “Mumbhaye naiye,” ngono bakambhaya mu koloyi iye ye ngwa muzila inotathila ku Gure pejo ne Ibileyamu, ngono katizhila ku Megido kanofila ko.

²⁸Balanda babe bakansenga nge koloyi ye ngwa ben'yisa ku Jerusalema ngono bakambiganya na botate babe mu ikumbu tjitje mu nzi nkulu wa Dafite.

²⁹Mu gole le bugumi lina ling'ompela la Joramu nkololo wa Ahabu, Ahaziya katangisa busa mu Juda.

³⁰Kwakati Jehu eyenda ku Jezirele, Jezebhele kahwa nge kwako ngono kazwizhodza zwitema mu mesho, kanakisa nsholo uwe, ngono kashozhela nge fesitere.

³¹Ngono kukati Jehu engina nge nkoba kati, “Apa wazha nge mbakiso kene, iwe Zimiri mbulayi wa tetshi uwo?”

³²Ngono kamilidza mesho kalinga ku fesitere kati, “Ndiyani umile nami? Ndiyani?” Ngomwa mbili kene thatu dzikanshozhela.

³³Jehu kati, “Mumposele pasi.” Ndizo bakamposela pasi ngono mamwe malopa awe katebukila mu guma ne mu mbizi, ngono dzikantshamba.

³⁴Jehu kangina ngono kaja ka ng'wa. Ngono kati, “Bonani ngekwe nkadzi iwoyu wakalongwa bhiso, ngono mumbiganye ngobe nkololokadzi wa mambo.”

³⁵Koga bakati beyenda kunombiganya bakawana kusina tjimwe tjitje, kuna fupa le nsholo ne makumbo ne maboko koga.

³⁶Bakatibezha bembudza kati, “Yeli i dama la Yahwe, labakaleba nge nlanda wabo Elija we N'tishibhe beti, ‘Mu ntuthu wa Jezirele mbgwa dzowoja nyama ya Jezebhele,

³⁷ngono itumbu tja Jezebhele tjowonga nthudze mu nnda wa Jezirele, kowosheteka unowoti, Ndi Jezebhele iwoyu.’ ”