Read Kalanga 1 Zwiyitikalo 10 Bible Online

1 Zwiyitikalo 10 - Kalanga bible

1 Zwiyitikalo 10

¹Bafilisitiya bakagwa ne Baiziraela ngono Baiziraela bakatizha Bafilisitiya ngono Baiziraela bakabulawa nge Bafilisitiya mu Dombo le Gilibhowa.

²Ndizo Bafilisitiya bakatatamila Saulo ne bakololo babe, bakabulaya Jonatani na Abinadabu na Malikishuwa bakololo ba Saulo.

³Ngwa yakabe ikulila Saulo ngono baposi be misebe bakan'wana bakankubadza kwazo.

⁴Ipapo Saulo kadwa nzhuzha unonsengela mathumo eti, “Shomola thumo lilo undibhaye nalo ndife, ngoti pamwe ibabo basakathumbigwa bangadwa bezha bezwithamila kuda kwabo mundili.” Koga nsengi we mathumo kalamba ngobe akabe etja kukulu. Ndizo Saulo katola thumo lile kazwiligila mu lili.

⁵Ngono kukati nsengi we mathumo ebona kuti Saulo wafa, naiye kazwilashila mu thumo lile ngono kafabo.

⁶Ndizo Saulo ne bakololo babe bose batatu bakafa saikoko, bose be bagali thaka babe bakafabo.

⁷Ndizo kwakati Baiziraela bose bakabe bali pa nkuku bebona kuti balume babo be ngwa batizha ne kuti Saulo ne bakololo babe bafa, bakafupatila mizi yabo bakatizha, Bafilisitiya bakazha bakazwigaligwa mu mizi yabo.

⁸Kwakati tjimuka Bafilisitiya bezha kuwotolela ibabo bakafa, bakawana Saulo ne bakololo babe bakafa mu Dombo le Gilibhowa.

⁹Bakambula zwiambalo zwizwe bakatola nsholo uwe ne zwibhayano zwizwe zwe ngwa bakatuma batumwa shango yose ye Filisitiya kuandamisa thawu dzinozipa dzekukunda ku midzimu yabo neku bathu babo.

¹⁰Bakatola zwiambalo zwe ngwa bakazwibiga mu ng'umba ye midzimu yabo ngono bakalembeledza nsholo uwe mu ng'umba ye ndzimu wabo Dagoni.

¹¹Ngono kwakati bathu be Jabeshi bamu Giliyadi behwa kuti Bafilisitiya bakathamani Saulo,

¹²balume bakasima bakayenda bakanotola itumbo tja Saulo ne zwe bakololo babe ngono bakazwizhisa ku Jabeshi. Bakabiganya mafupa abo kusi kwe nti nkulu umu Jabeshi bakazwinyima zojiwa mazhuba ali kutendeka.

¹³Saulo kafa saikoko ngoshaya bugalimoyo kukwe, wakabe asina bugalimoyo muna Yahwe ngobe wakabe asingabhulutane dama la Yahwe ne kuti wakabe ekumbila gumbuludzo mu mmwe wakabe elebeleka ne badzimu,

¹⁴kakale ne kuti aazoshaka gumbuludzo muna Yahwe. Ndizo Yahwe bakan'letjedzela kuti afe ngono bakatola bushe bakagupa Dafite nkololo wa Jesi.