Read Kalanga 1 Zwiyitikalo 12 Bible Online

1 Zwiyitikalo 12 - Kalanga bible

1 Zwiyitikalo 12

¹Aba ndibo balume bakazha kuna Dafite ku Zikilagi, mu tjibaka itjetjo Dafite wakabe asakasunonguka kuyenda yenda ngobe wakabe etja Saulo nkololo wa Kishi, ibaba bakabe bali bamwe be balume bakasima bakambhatsha mu ngwa.

²Bakabe bali balume be dati ne nsebe betubula kuposa misebe ne mabgwe nge maboko wose gwe lumeshwe kene gwe luji, balume ibaba bakabe bali be ludzi gwa Bhenjamini.

³Ntungamili wakabe ali Ahiezeri na Joashi bubili bali bakololo ba Shema we ku Gibiya na Jeziyele na Peleti bali bakololo ba Azimaveti Bheraka na Jehu bedwa ku Anatoti

⁴na Ishimaiya kudwa ku N'gibiyoni iye wakabe ali mbhayani nkulu kakale ali mmwe we bali makumi matatu (30) kakale ali ntungamili we bali makumi matatu (30) na Jeremiya na Jahaziele na Johanani na Jozabadi kudwa ku Gedera

⁵na Eluzayi na Jerimoti na Bhealiya ne Shemariya na Shefatiya kudwa ku Harifi na

⁶Elikana na Isihiya na Azareli na Joeza na Jashobimu we ludzi gwa Kora

⁷na Joela na Zebadiya bali bakololo ba Jerohamu bedwa ku Gedori.

⁸Kudwa mu ludzi Gadi ibaba ndibo balume bakayenda kuna Dafite ku matizhilo amu tjilambanyika, bakabe bali babhayani bana luzibo, bazibi bekushingisa dati ne thumo, njiso dzabo dzakabe dzinga dze shumba, bali lubilo benga ngululu pezhugwi kwe matombo.

⁹Ezeri ali ntungamili we bubili ali Obadiya we butatu ali Eliyabu,

¹⁰Eliyabu etobegwa ndi Mishamana, Mishamana etobegwa ndi Jeremiya,

¹¹Jeremiya etobegwa ndi Atayi, Atayi etobegwa ndi Elieli ali we butendeka,

¹²Elieli ali we butendeka etobegwa ndi Johanani ali we buzhanakadzi, etobegwa ndi Elizabadi we buzhanalume,

¹³Elizabadi we buzhanalume etobegwa ndi Jeremiya ali we bugumi, Jeremiya we bugumi etobegwa ndi Makibanayi ali we bugumi lina nng'ompela.

¹⁴Balume ibaba bakabe bedwa mu ludzi gwa Gadi bakabe bali batungamili be babhayani bali tjiwulu (1 000) bamwe bali batungamili be mamo apasi bali batungamili be babhayani bali zana (100).

¹⁵Ndibo bakatjuluka gwizi gwe Jorodani mu mwedzi we kutanga, pagwakabe gulizhele gututa matanda ngono bakakunda na ibabo bose bakabe bali mu mikuku iku Bhezhuba neku Golombedzo.

¹⁶Ngono bamwe be balume be ludzi gwa Bhenjamini ne be ludzi gwa Juda bakazha ku matizhilo a Dafite.

¹⁷Dafite wakayenda kanobashangamidza ngono kabadwa kati, “Ha mazha kundili nge buzwalani kowondibhatsha, ndowozwishanganya namwi nge moyo wangu wose koga ha mazha kuwondiwonga neku ndilonga mu maboko e zwita nenguba ndisina nlandu mmwe wandathama nge maboko angu, ipapo Ndzimu wa bobatategulu unowomubona uka mu loba shamu.”

¹⁸Ngono meya ikadelukila muna Amasai ntungamili we bali makumi matatu ngono kati, “Tibabo, Dafite, tinawe, nkololo wa Jesi! Kunyalala, kunyalala ngakube ku kuli, ne babhatshi babo! Ngobe Ndzimu unokubhatsha.” Dafite wakabaamutjila ngono kabathama batungamili be babhayani babe.

¹⁹Bamwe be balume be ludzi gwa Manase bakafupatila be ludzi gwabo bakabe ba Dafite, Dafite pa akayenda ne Bafilisitiya kunogwa na Saulo. Nenguba iye ne babhayani babe basakabhatsha Bafilisitiya ngoti kwakati shule kwekukumbuludzana balauli babo bakantata beti, “Tingadwa tithubugwa misholo ha angayenda kuna Saulo tetshi uwe.”

²⁰Ngono kayenda ku Zikilagi balume ibaba be ludzi gwa Manase bakatizhila kunli: Adina na Jozabadi na Jediale na Mikaele na Jozabadi na Elihu na Zilethayi ibaba bali batungamili be bali tjiwulu (1 000) be ludzi gwa Manase.

²¹Ibo bakabhatsha Dafite kugwisa gupo le zwita ngobe bose bakabe bakasima bali balume bana tjilopa bali batungamili be ngwa.

²²Zhuba ne zhuba balume bakabe begala bezha kuwobhatsha Dafite kudza kube ne balume be ngwa banjinji be fanana ne be ngwa ye Ndzimu.

²³Edzi ndidzo mbalo dze gupo le babhayani sekwa bakabe bathubukanyiwa, ibo bakazha kuna Dafite ku Heburoni kuwotola mbuso wa Saulo kuupa Dafite sekwa kwakaleba dama la Yahwe.

²⁴Balume be ludzi gwa Juda bakabe bebhata zwivikili ne mathumo bakabe bali zwiwulu zwili tathatu zwina mazana ali zhanakadzi (6 800) bakazwilulwamisila ngwa.

²⁵Balume bakasima bana tjilopa mu ngwa be ludzi gwa Simiyoni bakabe bali zwiwulu zwili kutendeka zwina zana ling'ompela (7 100).

²⁶Be Balevi bakabe bali zwiwulu zwili zwinna zwina mazana ali tathatu (4 600).

²⁷Ntungamili Johoida we nsha wa Aroni wakabe ana bali zwiwulu zwili zwitatu zwina mazana ali kutendeka (3 700).

²⁸Zadoki nzhuzha wakasima una tjilopa wakabe akatungamila bali makumi mabili ana babili (22) kudwa mu nsha wa tate babe.

²⁹Babhejamini bakanyi kwa Saulo bakabe bali zwiwulu zwili zwitatu (3 000) bunji gwabo gwakabe gwakabhata gukweba ne be nsha wa Saulo.

³⁰Be Baifureimi bakabe bali zwiwulu zwili makumi mabili ne mazana ali zhanakadzi (20 800) e balume bakasima bana tjilopa bakabe bezibgwa mu nsha wa tate babo.

³¹Gwamu le ludzi gwa Manase bakabe bali zwiwulu zwili gumi lina bali zhanakadzi (18 000) bakabe bashalugwa nge mazina kuti banobiga Dafite mambo.

³²Baisakari bakabe behwisisa zwimo zwe tjibaka bakabe beziba kuti Baiziraela bakafanila thamani bakabe bali batungamili bali mazana mabili (200) bana bakanyi kwabo.

³³Be Zebuluni bakabe bali zwiwulu zwili makumi mashanu (50 000) bakathubukanyiwa bakashakatila mathumo wose e ngwa kubhatsha Dafite nge moyo ung'ompela.

³⁴Be Nafutali bakabe bali tjiwulu (1 000) tje balauli bana balume bali zwiwulu zwili makumi matatu ana kutendeka (37 000) bakazwilulwamisa nge zwivikili ne mathumo.

³⁵Badani bakabe bali makumi mabili ana bali zhanakadzi ana mazana ali tathatu (28 600) bakazwilulwamisila ngwa.

³⁶Baasheri bakabe bali zwiwulu zwili makumi manna (40 000) bakazwilulwamisila ngwa.

³⁷Barubheni ne Bagadi ne gwamu le Manase baseli kwe Jorodani bakabe bali zwiwulu zwili zana lina makumi mabili (120 000) e balume bakashakatila mathumo wose e ngwa.

³⁸Bose babhayani ibaba bakabe bakazwilulwamisila ngwa bakayenda ku Heburoni bakasunga nkumbulo kubiga Dafite mambo we Iziraela yose, saikoku koga Iziraela yose yakabe ina nkumbulo nng'ompela wekubiga Dafite mambo.

³⁹Bakabe na Dafite ikoko mazhuba ali matatu beja beng'wa ngobe zwikamu zwabo zwakabe zwabalulwamisila zojiwa.

⁴⁰Babakidzani nabo bakabe bedwa bukule gungapa Isakari na Zebuluni ne Nafutali bakazha bakazhisa zojiwa bakasenga ne madonki ne dzikamela ne dzimoulo ne mangabe ne zojiwa zwinjinji ne mitjelo yakaswabisiwa ne nkumbi we zhambi ne mafuta ne mangabe ne pkhwizi kulakidza shatho mu Iziraela.