Read Kalanga 1 Zwiyitikalo 13 Bible Online

1 Zwiyitikalo 13 - Kalanga bible

1 Zwiyitikalo 13

¹Dafite kalebesana ne balauli be bali zwiwulu (1 000) ne be mazana (100) ne batungamili bose.

²Ngono Dafite kadwa gubungano lose le Iziraela kati, “Ha kwaka mululwamila kakale ha kuli kuda kwa Yahwe Ndzimu wedu ngati tumileni ndaidzo ku zwikamu zwedu mu mituthu yose ye Iziraela ne bapirisiti ne Balevi mu mizi yabo ngono tibadwe bashangane naswi ipapa.

³Kudwapo ngati buzeni Bhokisi le Ndzimu wedu ku tili ngobe takalilashilila mu misi ya Saulo.”

⁴Gubungano lose likaduma kuthama saikoko ngobe kwakabe kwakalulwama mbeli kwe bathu bose.

⁵Ndizo Dafite kakubunganya Iziraela yose kudwa pa Gwizi gwe Shihori ye Egipiti kunoti ku nkoba we Hamati kuzhisa Bhokisi le Ndzimu kudwa mu Kiriatijearimu.

⁶Dafite ne Iziraela yose bakayenda ku Bhaala hwuti Kiriatijearimu ye Juda kunotola Bhokisi le Ndzimu linodang'wa nge zina la Yahwe ibo bagele pezhugwi kwe dzikherubhu.

⁷Bakasenga Bhokisi le Ndzimu nge kara tshwa kudwa pa ng'umba ya Abinadabu, Uza na Ahio bakabe beyendisa kara,

⁸ha Dafite ne Iziraela yose bakabe bezana mbeli kwe Ndzimu nge mimoyo yabo yose bemba belidza zwilidzo zwe matende ne nyele ne zwe thamborini ne dzisimbali ne manyanga.

⁹Bakati beswika pa libuwa gwe Khidoni ngabe dzikabe dzitshatsharika ngono Uza katambunudza luboko gugwe kubhata Bhokisi.

¹⁰Ngono bushongola gwa Yahwe gukadelukila muna Uza bakanligila pasi ngobe aabilila Bhokisi ngono kafa ipapo mbeli kwe Ndzimu.

¹¹Koga Dafite kagwadza moyo ngobe Yahwe baloba Uza ngono kadana pathu ipapo Pereziuza kuswikila nasi.

¹²Ngono Dafite katja Ndzimu tjose zhuba ilelo ngono kabe eti, “Ndowoyisa Bhokisi le Ndzimu ku nzi wangu tjini wali?”

¹³Ndizo Dafite kasitjayise Bhokisi ku nzi nkulu wa Dafite koga kaliyisa ntome ku ng'umba ya Obediedomu we N'giti.

¹⁴Ngono Bhokisi le Ndzimu likagala mu nsha wa Obediedomu mu ng'umba iye mimwedzi ili mitatu ngono Yahwe bakakombolela nsha wa Obediedomu ne tjimwe ne tjimwe tjaakabe anatjo.