Read Kalanga 1 Zwiyitikalo 14 Bible Online

1 Zwiyitikalo 14 - Kalanga bible

1 Zwiyitikalo 14

¹Mambo Hiramu we Tire katumila batumwa bakasenga mapango e miti ye sida ne babezhi be mabgwe ne babezhi kuna Dafite kuti babakile Dafite ng'umba ye bushe.

²Dafite kabona kuti Yahwe bambiga mambo we Iziraela kakale bushe gugwe gukudziwa kwazo ngekwe bathu babe Baiziraela.

³Ngono Dafite kalobola bakadzi banjinji mu Jerusalema ngono kabe ne bakololo ne bakololokadzi banjinji.

⁴Awa mazina e bana baakabe nabo ku Jerusalema: Shamuya na Shobabu na Nathani na Solomoni

⁵na Ibihari na Elishuwa na Elipheleti

⁶na Nogha na Nefegi na Jafiya

⁷na Elishama na Bheliyada na Elifeleti.

⁸Kwakati Bafilisitiya behwa kuti Dafite wa zhodziwa kube mambo we Iziraela, Bafilisitiya bose bakabhuda itethela kunoshaka Dafite ngono Dafite kati ehwa nge kwako kabhuda kanobanginilila.

⁹Bafilisitiya bakabe bazha pa nkuku we Refaimu ngono bakatapa kose.

¹⁰Ngono Dafite kashakisisa ku Ndzimu eti, “Ndiyende kunonginilila Bafilisitiya kene? Apa mowothama kuti ndibakunde kene?” Ngono Yahwe bakan'dabila beti, “Yenda! Ndowobalonga mu maboko awo.”

¹¹Ngono katathila ku Bhaaleparazimu ngono Dafite kabakunda ikoko, ngono Dafite kabe eti, “Ndzimu wandishingisa kuti ndipaladze zwita zwangu se nkubila unothwa nge shango.” Ndizo zina la ipapo likadang'wa kuyi Bhaaleparazimu.

¹²Bafilisitiya bakasiya midzimu yabo ipapo ngono Dafite kalaula kuti ipisiwe.

¹³Ngono Bafilisitiya bakanginilila nkuku kakale.

¹⁴Ngono kukati Dafite ebhuzwa Ndzimu ngono Ndzimu ukadabila uti, “Usitongobashangamidza ubapoteleke shule ngono ubanginilile udwa ku lubizho gwe miti ye malibheri.

¹⁵Ngono uti uhwa nsindo we makumbo mu theswi dze malibheri, ipapo ube utangisa gwa, ngobe Ndzimu wayendila mbeli kuko kubulaya babhayani be Bafilisitiya.”

¹⁶Ngono Dafite wakathama sekwa akadwiwa nge Ndzimu ngono bakabulaya ngwa ye Bafilisitiya kudwa ku Gibiyoni kunoti ku Gezeri.

¹⁷Ngono tjilumbi tja Dafite tjikaandama nge shango dzose kakale Yahwe bakathama kuti atjiwe nge zwitjaba zose.