Read Kalanga 1 Zwiyitikalo 15 Bible Online

1 Zwiyitikalo 15 - Kalanga bible

1 Zwiyitikalo 15

¹Dafite wakazwibakila ng'umba njinji mu nzi nkulu wa Dafite, ngono kalulwamisa bugalo gwe Bhokisi le Ndzimu ngono kalibakila ne nshasha.

²Kudwapo Dafite kabe eti, “Akuna mmwe wakafanila senga Bhokisi le Ndzimu, kuzhe kwe Balevi ngobe ndibo bakashalugwa ndi Yahwe kuti balisenge ne kuti babashingile nge kusingapele.”

³Dafite wakakubunganya Baiziraela bose mu Jerusalema kuti bazhise Bhokisi la Yahwe ku bugalo gwalo gwaakabe alilulwamisila igo.

⁴Dafite kakubunganya bakololo ba Aroni ne Balevi:

⁵Mu bakololo ba Kohati kwakabe kuli Urieli akatungamila bali zana lina makumi mabili (120) e zwikamu,

⁶muna ba Merari kwakabe kuli Asaya akatungamila bali mazana mabili bana bali makumi mabili (220)

⁷mu bakololo ba Gerishomu kwakabe kuli Jowele akatungamila bali zana ling'ompela lina makumi matatu (130),

⁸mu bakololo ba Elizafani kwakabe kuli Shemaya akatungamila bali mazana mabili (200),

⁹mu bakololo ba Heburoni kwakabe kuli Elieli akatungamila bali makumi ali zhanakadzi (80),

¹⁰mu bakololo ba Uziele kwakabe kuli Aminadabu akatungamila bali zana lina gumi lina babili (112).

¹¹Dafite kadana bapirisiti bo Zadoki na Abiathari kose ne Balevi bo Urieli na Asaya na Jowele na Shemaya na Elieli na Aminadabu

¹²ngono kabadwa kati, “Ndimwi misholo ye misha ya botate benyu ye Balevi, muzwitjenapadze, imwi ne zwikamu zwenyu kuti ndizo mukowozhisa Bhokisi la Yahwe Ndzimu we Iziraela ku bugalo gwandalilulwamisila igo.

¹³Se musakalisenga mu kutanga Yahwe Ndzimu wedu bakatiloba ngobe tisakalitjengeta nge zila yakafanila.”

¹⁴Ndizo bapirisiti ne Balevi bakazwitjenapadzila kuzhisa Bhokisi la Yahwe Ndzimu we Iziraela.

¹⁵Ngono Balevi bakasenga Bhokisi le Ndzimu mu mathudzi lili mu mapango koga Mushe sekwa akaleba kuyendidzana nge dama la Yahwe.

¹⁶Dafite kakale kadwa batungamili be Balevi kuti bashalule mu zwikamu zwabo bambi bangalidzila pezhugwi zwilidzo zwe matende ne zwe laya ne dzisimbali kuthama zhoba inoshathisa.

¹⁷Ndizo Balevi bakashalula Hemani nkololo wa Jowele ne ikamu tjitje Asafa nkololo wa Bherekiya ne bakololo ba Merari ne zwikamu zwabo na Ethani nkololo wa Kushaya

¹⁸ne zwikamu zwabo bebubili mu mamo bakabe bali bo Zekariya na Jaziele na Shemiramoti na Jehiele na Uni na Eliabu na Bhenaya na Maseya na Mathitiya na Elifelehu na Mikineya ne balindi be mikoba bali Obediedomu na Jeyele.

¹⁹Bambi bakabe bali bo Hemani na Asafa na Ethani bakabe belidza dzisimbali dze phangula,

²⁰Zekariya na Shemiramoti na Jehiele na Uni na Eliabu na Maseya na Bhenaya bakabe belidza matende sekwa akabe elidziwa ndi Alamoti,

²¹koga Mathitiya na Elifelehu na Mikineya na Obediedomu na Jeyele na Azaziya bakabe bakatungamila kulidza zwilidzo zwe laya sekwa kwakabe kulidza Sheminiti.

²²Khenaniya ntungamili we Balevi kumba wakabe embisa ngobe akabe ana luzibo gwako.

²³Bherekiya na Elikana bakabe bali balisi be nkoba weku Bhokisi.

²⁴Shebaniya na Joshafati na Nethanele na Amasayi na Zekariya na Bhenaya na Eliezeri ne bapirisiti bakabe belidza lunyanga mbeli kwe Bhokisi le Ndzimu. Obediedomu na Jehiya bakabe bali bamwebo be balindi be nkoba weku Bhokisi.

²⁵Ndizo Dafite ne bakulu be Baiziraela ne balauli be babhayani be bali zwiwulu (1 000) bakayenda kunotola Bhokisi le Tjidumano tja Yahwe ku ng'umba ya Obediedomu nge shatho.

²⁶Ngobe Ndzimu wakabhatsha Balevi bakabe bakasenga Bhokisi le Tjidumano tja Yahwe, badusa zwibhayilo zwe mikono ili kutendeka ne nyundo dzili kutendeka.

²⁷Dafite wakabe akaambala hazu ye jila lakanaka ne Balevi bose bakabe bakasenga Bhokisi ne bambi na Khenaniya ntungamili we bambi, Dafite wakabe akaambala efodi.

²⁸Ndizo Baiziraela bose bakazhisa Bhokisi le Tjidumano tja Yahwe nge mpululu ne kulidziwa kwe nyanga ne dzisimbali ngono bakathama zhoba nge matende ne laya.

²⁹Ngono kwakati Bhokisi le Tjidumano tja Yahwe liswika mu nzi wa Dafite, Mikali nkololokadzi wa Saulo kashozhela nge fensitere ngono kabona Dafite ezana akashatha ngono kan'nyunda.