Read Kalanga 1 Zwiyitikalo 16 Bible Online

1 Zwiyitikalo 16 - Kalanga bible

1 Zwiyitikalo 16

¹Bakazhisa Bhokisi le Ndzimu ngono bakalibiga mu nshasha walakabe laubakigwa ndi Dafite, bakadusila Ndzimu zwibhayilo zwinopisiwa ne zwibhayilo zwe mbakisano.

²Ngono Dafite wakati epedza dusa zwibhayilo zwinopisiwa ne zwibhayilo zwe mbakisano kakombolela bathu mu zina la Yahwe,

³kadwapo kakobela balume ne bakadzi bose be Iziraela mmwe ne mmwe kampa tjiwunga ne nyama ne khekhe le thewa dzakawanikiwa.

⁴Dafite wakashalula Balevi bamwe kuti bashingile pa Bhokisi la Yahwe kulikudza ne kuboka ne kudza Yahwe Ndzimu we Iziraela.

⁵Asafa wakabe ali iye ntungamili etobegwa ndi Zekariya na Jeyele na Shemiramoti na Jehiele na Mathitiya na Eliabu na Bhenaya na Obediedomu na Jeyele bakabe bakalingisana ngolidza matende ne laya. Asafa wakabe akalingisana nge zwilidzo zwe dzisimbali

⁶na Bhenaya na Jahaziele be bapirisiti bakabe bakalingisana ngodwilila belidza manyanga mbeli kwe Bhokisi le Tjidumano le Ndzimu.

⁷Ngono mu zhuba ilelo Dafite wakabiga kuti njimbo dzinoboka dzi mbigwe Yahwe ndi Asafa ne zwikamu zwizwe.

⁸Tendani Yahwe, danani zina labo, zibisani njudzi ngekwe mishingo yabo!

⁹Mubambile, mubambile njimbo dze gudzo, Lebani ngekwe mishingo yabo yose inotjenamisa!

¹⁰Gudzo limu zina labo, ibo be mimoyo inoshaka Yahwe ngaba shathe!

¹¹Shakani Yahwe nenge simba labo, mubashake nge kusingapele!

¹²Kumbulani mishingo inotjenamisa yabakathama, ne matjenamiso ne sumikiliso dzabakathama.

¹³Imwi bana ba Iziraela nlanda uwe, imwi bakololo ba Jakubo, imwi bawakashalula!

¹⁴Ndibo Yahwe Ndzimu wedu, sumikiliso yabo imu shango yose.

¹⁵Banogala bakakumbula ngekwe tjidumano tjabo, ngekwe dama labo labakaleba mu zwizekugwana zwinjinji zwakapinda.

¹⁶Tjidumano tjabakathama na Abhurahama, tuna kwabo kwabakathama kuna Isaki,

¹⁷tjabakasisithila se ndaulo kuna Jakubo, tjili tjidumano tjatjose kuna Iziraela,

¹⁸beti, “Iwe ndowokupa shango ye Kanana, ili ilo gobe le thaka iyo.”

¹⁹Bakati bali bashomanana nge mbalo kakale basi betjimwe bali bataya muili,

²⁰beyenda shango ne shango kudwa mu mbuso umwe benoti ku mmwe,

²¹akuna wabakaletjedza kubatshambilidza, bakabatjemelela bomambo nge kwabo,

²²beti, “Musitongo kuma bakashalugwa, musitongo kubadza balebesambeli bangu!”

²³Mbilani Yahwe imwi shango yose! Lebani ngekwe jidzo labo zhuba ne zhuba.

²⁴Zibisani gudzo labo zwitjaba, zibisani mishingo yabo inotjenamisa bathu bose!

²⁵Ngobe Yahwe bankulu banofanigwa ngo kudziwa, bakafanila tetiwa kupinda midzimu yose.

²⁶Ngobe midzimu yose ye bathu zwithu koga koga Yahwe bakathama zhuzhugwi.

²⁷Dendo ne bomambo nge zwabo simba ne shatho zwimu magala abo.

²⁸Ipani Yahwe imwi misha yose ye bathu, mubape gudzo ne simba.

²⁹Ipani Yahwe gudzo lakafanila zina labo zhisani zwibhayilo, izhani mbeli kwabo! Namatani Yahwe mu bubuya gwabo gwakayengemala

³⁰tetemani mbeli kwabo imwi shango yose ee, shango igelile tjatjose aingatshedusiwe.

³¹Zhuzhugwe ngalishathe ne shango ipululudze, ngono ngazwilebe mu zwitjaba zwiti, “Yahwe banobusa!”

³²Gungwa ngaliwone ne tjimwe ne tjimwe tjimulili, ne minda ne zose zwimuili zwishathe.

³³Miti imu ishaka ngaishathe mbeli kwa Yahwe ngobe banozha kuwosumikilisa shango.

³⁴Tendani Yahwe ngobe bakalulwama ngobe ludo gwabo gusingazunguzike ndegusingapele!

³⁵Kakale muti, “Mutitjidze, imwi Ndzimu we jidzo, mutibuze mutitjidze mu zwitjaba, kuti ndizo titende zina lenyu lakayengemala ne kumukudza.

³⁶Ngakukudziwe Yahwe Ndzimu we Iziraela kudwa kusingapele kunoti kusingapele!” Ngono bathu bose bakabe beti, “Ngakujalo” ngakukudziwe Yahwe.

³⁷Ndizo Dafite kasiya Asafa ne zwikamu zwizwe mbeli kwe Bhokisi le Tjidumano tja Yahwe kuti bashingile ipapo tjatjose zhuba ne zhuba sekwa kwakabe kushakika,

³⁸ha Obediedomu ne bashingi naye bali makumi matatu ana bali zhanakadzi (68) bakabe banabo. Obediedomu nkololo wa Jeduthuni na Hosa bakabe bakalingisana ngotjengeta nkoba.

³⁹Ngono kasiya Zadoki mpirisiti ne zwikamu zwizwe beshingila pa bugalo gwe Ndzimu gwakabe guli ku Gibiyoni,

⁴⁰kupisila Yahwe zwibhayilo mu tjibeso tjinopisigwa zwibhayilo zwinopisiwa mangwanana ne madekwana sekwa kwakakwagwa mu nlayo wa Yahwe iwo wabakalaulila Iziraela.

⁴¹Mubali kwakabe kuna Hemani na Jeduthuni na bose bakabe bashalugwa batendekwa kutenda Yahwe ngobe ludo gwabo gusingazunguzike guli gusingapele.

⁴²Hemani na Jeduthuni bakabe bakalingisana ngotjengeta dzisimbali ne zwilidzo zwimwe zwe njimbo zwinoshingisiwa mukunamata. Bakololo ba Jeduthuni ibo bakabigwa ku nkoba.

⁴³Kudwapo bathu bose bakabe bepalala mmwe ne mmwe eyenda ku nzi uwe, Dafite kayenda kukombolela be nsha uwe.