Read Kalanga 1 Zwiyitikalo 17 Bible Online

1 Zwiyitikalo 17 - Kalanga bible

1 Zwiyitikalo 17

¹Dafite wakabe wogala mu ng'umba iye ye bushe ngono kadwa nlebesambeli Nathani kati, “Bona ndogala mu ng'umba yakabakwa ne mapango e nti we sida koga Bhokisi le Tjidumano tja Yahwe litji mu nshasha.”

²Ngono Nathani kati kuna Dafite, “Thama tjipa moyo uwo ngobe Ndzimu unawe.”

³Koga kwakati busiku igogo dama la Yahwe likazha kuna Nathani liti,

⁴“Yenda unobudza nlanda wangu Dafite uti ndikati, ‘Aungandibakile ng'umba yandinga gala,

⁵ngobe andizotongo gala mu ng'umba kudwa mu zhuba landakatungamila Iziraela kudwa mu Egipiti kuswika ngwenu koga ndakagala kudwa mu nshasha kunoti ku mmwe nshasha mu bugalo wogu kunoti woguje.

⁶Mu magalo wose andakayenda ne Baiziraela apa ndakatongo dwa mmwe we basumikilisi be Iziraela, ibo bandakalaula kuti batjengete bathu bangu, nditi andibakile ng'umba ye mapango e sida kene?’

⁷Ndizo ngwenu ubudze nlanda wangu Dafite uti Yahwe Masimbawose bakati, ‘Ndakakudusa mu mafulilo wakalisa pkhwizi kuti ndizo ube nlauli we bathu bangu Iziraela.

⁸Ndakabe nawe pamwe ne pamwe pawakabe uyenda, atatila kutjena zwita zwizo, ngono ndowothama ukabe ne tjilumbi se batungamili bakulu bakabepo mu shango.

⁹Kakale ndowoshalula bugalo gwe bathu bangu Baiziraela, ndowobabiga mu magalo abo ngono akutjina unowobadziyidza kene bakabe bali balume be mbipo abanga tjabayite tjimwe se mu kutanga,

¹⁰kudwa tjose mu tjibaka tjandakapa bathu bangu Baiziraela basumikilisi. Ndowokunda zwita zwabo zose. Kakale ndokubudza kuti imi Yahwe ndowokubakila ng'umba ye bumambo.

¹¹Unowotiwafa ndowothama kuti mmwe we bakololo babo aku gale thaka abe mambo.

¹²Ndiye unowondibakila ng'umba, ngono bushe gugwe gowogalila tjose.

¹³Ndowobe tate babe ngono iye unowobe nkololo wangu. Ludo gwangu gusingazunguzike agungatothole sekwa ndakathama muna wakabe ali mbeli kuko.

¹⁴Koga ndowombiga kabe nlauli we ng'umba yangu newe mbuso wangu kakale bushe gugwe gowogalila tjatjose.’ ”

¹⁵Nathani kabudza Dafite matama iyawa wose koga kuyendidzana ne mbono.

¹⁶Kudwa ipapo Dafite kangina mu nshasha wa Yahwe ngono katembezela eti, “Dumbu ndiani wali Yahwe Ndzimu? Ne nsha wangu ndiupi wamungati mukandiswikisa pano wali?

¹⁷Se ingati kwakabe kusakalizana mbeli kwenyu Ndzimu, makagadzabgwe nlanda wenyu zwikule zwinowozha, makandilakidza zwizekugwana zwinowozha imwi Yahwe Ndzimu wangu!

¹⁸Ngono dumbu Dafite ungatjamudwani wali ngobe makakudza nlanda wenyu kene? Kana moziba nlanda wenyu.

¹⁹Yahwe ngekwe nlanda wenyu, imwi Yahwe ne kuyendidzana nge tjamunoshaka, makathama kose ikoku kukulu kakale makathama kuti zose zwikulu zwamakagadzabgwe zwizibgwe.

²⁰Yahwe akuna unofanana namwi naikobo akuna mmwe Ndzimu kuzhe kwenyu muna zose zwatakahwa nge zebe dzedu.

²¹Itjaba tjipi mu shango tjinofanana ne itjaba tjenyu Iziraela, Ndzimu tjawakanodzutunula kuti ndizo uzwithamile zina mu zwithu zwikulu ne zwinotjisa ngotatila kutjena zwitjaba kule ne bathu bawo ibo bawakadzutunula mu Egipiti kene?

²²Ngono bathu benyu Iziraela makabathama bathu benyu nge kusingapele, imwi Yahwe mukabe Ndzimu wabo.

²³“Ngono ngwenu Yahwe dama lenyu lamakaleba ngekwe nlanda wenyu ne ngekwe nsha uwe wamakabiga kuti unowogalila tjose lishingikadzeni sekwa makagadzabgwe.

²⁴Ndizo zina lenyu lowosimisiwa, likakudziwa nge kusingapele kose kunowodza kukayi ‘Yahwe Masimbawose, Ndzimu we Iziraela u Ndzimu we Iziraela,’ ngono nsha wa Dafite unowogalila tjose mbeli kwawo.

²⁵Ngobe imwi Ndzimu wangu makazumbunulila nlanda wenyu kuti ndimwi munowombakila ng'umba, ndizo nlanda wenyu alumbidzika kumutembezela.

²⁶Ngono imwi Yahwe, mu Ndzimu, makagadzabgwe nlanda wenyu zwithu izwezwi zwakanaka.

²⁷Ndizo ngwenu ngakumushathise kukombolela nsha we nlanda wenyu kuti ndizo utjilile tjatjose mbeli kwenyu ngobe imwi Yahwe tjamakombolela tjobe tjakombolelegwa tjatjose.”