Read Kalanga 1 Zwiyitikalo 18 Bible Online

1 Zwiyitikalo 18 - Kalanga bible

1 Zwiyitikalo 18

¹Kwakati shule kwa ikoku Dafite kakunda Bafilisitiya bakabe pasi kukwe ngono katola Gati ne mizi yakabe ili pasi kwayo mu maboko e Bafilisitiya.

²Wakakunda Moabu ngono Bamoabu bakabe balanda ba Dafite kakale bedusa mimwiso.

³Dafite kakale wakakunda Hadadezeri mambo we Zoba kuyendila ku Hamati, Hadadezeri wakabe atathila kunotola ntuthu uku gwizi gwe Yufuratesi.

⁴Ngono Dafite kantolela koloyi dze ngwa dzili tjiwulu (1 000) ne bataswi be mbizi bali zwiwulu zwili kutendeka (7 000) ne babhayani banoyenda nge makumbo bali zwiwulu zwili makumi mabili (20 000), ngono Dafite kathubula makanyu e mbizi dzinokweba koloyi dze ngwa, koga kasiya bakakwana kuyendisa koloyi dze ngwa dzili zana ling'ompela.

⁵Ngono kwakati Basiriya be Damasiko bezha kuwobhatsha mambo Hadadezeri mambo we Zoba, Dafite kabulaya balume bali zwiwulu zwili makumi mabili ana babili (22 000) be Basiriya.

⁶Kudwapo Dafite kabiga gupo le babhayani mu Siriya ye Damasiko ngono Basiriya bakabe balanda ba Dafite kakale bedusa mimwiso. Yahwe bakathama kuti Dafite akunde kumwe ne kumwe kwaakabe eyenda.

⁷Dafite katola zwivikili zwakathamwa nge golide zwakabe zwakasengwa ne balanda ba Hadadezeri ngono kazwiyisa ku Jerusalema.

⁸Dafite wakabe atapa phangula ili njinji mu mizi mikulu ya Hadadezeri ku Tibhathi neku Khuni, ndiyo Solomoni yaakatola kathama gungwa gwe phangula ne phanda ne zwija zwinoshingisiwa mu Ng'umba ye Ndzimu.

⁹Ngono kwakati Tou mambo we Hamati ehwa kuti Dafite wakakunda babhayani bose ba Hadadezeri mambo we Zoba,

¹⁰katumila nkololo uwe Hadoramu kuna Mambo Dafite kuti anon'lezwa kakale ayite matjena kunli ngobe akagwa na Hadadezeri kankunda, ngobe Tou wakabe egala egwa na Hadadezeri ngono Hadadezeri e nkunda. Tou katumila zwija zwakathubukana zwakathamwa nge golide ne zwakathamwa nge siliva ne zwakathamwa nge phangula.

¹¹Zwija izwezwi Dafite kazwitola kazwipa Yahwe kose ne siliva ne golide yaakabe atapa mu zwitjaba kudwa ku Edomu ne Moabu ne mu Baamoni ne mu Bafilisitiya neku Amaleki.

¹²Ngono Abishayi nkololo wa Zeruya kabulaya Baedomu bali zwiwulu zwili gumi lina zhanakadzi (18 000) mu Nkuku we Mwenyu,

¹³ngono kabiga gupo le babhayani mu Edomu ngono Baedomu bakabe balanda ba Dafite kakale bedusa mimwiso. Yahwe bakathama kuti Dafite akunde kumwe ne kumwe kwaakabe eyenda.

¹⁴Ndizo Dafite kabusa mu Iziraela yose kakale kathama kuti kushingikadziwe ndulamo ne ndizandizano mu bathu babe bose.

¹⁵Joabu nkololo wa Zeruya wakabe akatungamila ngwa, Jehoshafati nkololo wa Ahiludi wakabe ali nkwalili,

¹⁶Zadoki nkololo wa Ahitubu na Ahimeleki nkololo wa Abiathari bakabe bali bapirisiti, Shavisha iye ali nkwalili,

¹⁷Bhenaya nkololo wa Jehoyada wakabe ali ntungamili we Bakereti ne Bapeleti; bakololo ba Dafite bakabe bali batungamili mu nshingo wa mambo.