Read Kalanga 1 Zwiyitikalo 21 Bible Online

1 Zwiyitikalo 21 - Kalanga bible

1 Zwiyitikalo 21

¹Satani kamukila Iziraela ngono kathama kuti Dafite azhigwe nge nkumbulo we kubala Baiziraela.

²Ndizo Dafite kadwa Joabu ne balauli be babhayani kati, “Yendani munobala Baiziraela kudwa mu Bheerisheba kunoti ku Dani ngono undizhisile mbiko kuti ndizo ndizibe mbalo yabo.”

³Koga Joabu kashandula eti, “Tshene Yahwe bangawatsha bathu babo kupinda kwabali iko ngwenu ka zana (100)! Tetshi wangu mambo wangu atenti balanda benyu bose, ini munga shaka kuti babagwe kene? Ini muzhisila Iziraela nlandu kene?”

⁴Koga matama a mambo kakulila Joabu, ndizo Joabu kamilika kayenda Iziraela yose kudwapo kashandukila ku Jerusalema.

⁵Joabu kabikila Dafite mbalo yose ye balume be ngwa sahwou: Mu Iziraela yose kwakabe kuli balume bali miliyoni ingo'ompela ina zwiwulu zwili zana lina (1 100 000) banobhata mathumo, mu Juda bakabe bali zwiwulu zwili mazana manna ana makumi ali kutendeka (470 000) bakalizana ngwa.

⁶Koga aazobalilanya ne Balevi ne Babhenjamini ngobe akabe asingadumane ne ndaulo ya mambo.

⁷Koga Ndzimu ukasishathile ikoko kose ngono ukaloba Iziraela.

⁸Ngono Dafite kabe edwa Ndzimu eti, “Ndatjinya kwakabangalala ngothama tjandathama. Koga ngwenu ndomukumbila bukushani jinyo le nlanda wenyu ngobe ndathama bulengwe.”

⁹Ngono Yahwe bakalebeleka na Gadi nlebesambeli wa Dafite bakati,

¹⁰“Yenda unodwa Dafite uti, ‘Yahwe bakati, ndokupa zwithu zwili zwitatu, ushalule ku ng'ompela mu zwili kuti ndikuthamile iko.’ ”

¹¹Ndizo Gadi kazha kuna Dafite ngono kati kunli, “Yahwe bakati, ‘Shalula kwaunoshaka,

¹²makole matatu e bhamba kene mimwedzi mitatu ye kuthukudziwa nge thumo le zwita zwizo, ha thumo le zwita zwizo likukulila, kene mazhuba matatu e thumo la Yahwe ne bugwele mu shango ne ntumwa wa Yahwe ekolomodza ntuthu wose we Iziraela.’ Ngwenu shalula tjaunoshaka, kuti ndizo ndiyise dabilo kuna wandituma.”

¹³Ipapo Dafite kashandula Gadi eti, “Ndimu tjimo tjinomanikanya, koyita kuti ndiwile mu maboko a Yahwe ngono ibo bana ngoni pana kuti ndiwile mu maboko e nthu.”

¹⁴Ndizo Yahwe bakatumila bugwele mu Iziraela, kukafa balume be Iziraela bali zwiwulu zwili makumi ali kutendeka (70 000).

¹⁵Kudwapo bakatumila ntumwa we kudzimu ku Jerusalema ku ikolomola koga wakati abe pejo ne kuyilobesa Yahwe bakabuza moyo ngono bakabe bedwa ntumwa we kudzimu we golomodzo beti, “Kwagala, misa!” Ngono ntumwa we kudzimu we golomodzo wakabe ali mile pa lubuwa gwa Orinani we N'jebusi.

¹⁶Dafite kamilidza mesho kabona ntumwa we kudzimu wa Yahwe ali mu phepo pakati kwe shango ne kudzimu akabhata thumo akalitambunudzila ku Jerusalema. Dafite ne bakulu bakabe bakaambala masaka e tjililo bakawa nge njiso dzabo.

¹⁷Ngono Dafite kabe eti ku Ndzimu, “Apa ate imi ndakadusa ndaulo ye kuti babhayani babagwe kene? Apa ate imi ndakathama jinyo athama bubi kene? Koga bathu ibaba ibo bakatjinyani kene? Ndomukumbila Yahwe Ndzimu wangu lobani imi ne be nsha wangu koga musiletje bugwele gukawila bathu benyu.”

¹⁸Ipapo ntumwa we kudzimu wa Yahwe ukadwa Gadi kuti adwe Dafite kuti atathile pezhugwi anobakila Yahwe tjibeso tjinopisigwa zwibhayilo mu lutombo gwa Orinani we N'jebusi.

¹⁹Ndizo Dafite kabhulutana matama a Gadi aakabe aleba mu zina la Yahwe.

²⁰Ngono Orinani wakabe e pula mathunde mu lutombo ngono kati etendebuka kabona ntumwa we kudzimu ngono bakololo babe bali banna baakabe anabo bakanobgwata.

²¹Ngono Dafite wakati ezha kuna Orinani, Orinani kalinga ngono kabona Dafite kabhuda pa lutombo kawa nge buso kathigamila Dafite.

²²Ngono Dafite kandwa kati, “Unditengesele lutombo gugo kuti ndibakile Yahwe tjibeso tjinopisigwa zwibhayilo, ndowotenga nge themba izhele kuti ndizo bugwele gume gusipedze bathu.”

²³Orinani kabe eti kuna Dafite, “Mugutoleni, tetshi wangu mambo bangu ngabathame tjabanobona tjakabalulwamila. Bonani ndomupa mangabe ali zwibhayilo zwinopisiwa ne zwileyi zwinopula ne mathunde e tjibhayilo tje mathunde. Ndomupa kose.”

²⁴Koga Mambo Dafite bakashandula beti, “Aa ndowogutenga nge themba izhele. Andingape Yahwe zwithu zwizo kene kuli kudusila Yahwe tjibhayilo tjinopisiwa tjandisatukutilila.”

²⁵Ndizo Dafite kalipa Orinani themba ye mazana ali tathatu (600) e shekele dze golide.

²⁶Ngono Dafite kabakila Yahwe tjibeso tjinopisigwa zwibhayilo ngono kazhisa zwibhayilo zwinopisiwa ne zwibhayilo zwe mbakisano ngono kadana Yahwe ngono Yahwe bakan'dabila nge moto kudwa kudzimu udelukila mu tjibeso tjinopisigwa zwibhayilo zwinopisiwa.

²⁷Ngono Yahwe bakadwa ntumwa we kudzimu kuti abgwilize thumo mu hwomo.

²⁸Mu tjibaka itjetjo Dafite wakati ebona kuti Yahwe ban'dabila ali mu lutombo gwa Orinani we N'jebusi, kadusila zwibhayilo ipapo.

²⁹Bugalo gwa Yahwe igo Mushe gwaakabaka ali mu tjilambanyika ne tjibeso tjinopisigwa zwibhayilo zwinopisiwa zwakabe zwitji ku bugalo gwakatathila ku Gibiyoni,

³⁰koga Dafite wakabe asingake kayenda kunoshakisisa ku Ndzimu ngobe akabe etja thumo le ntumwa wa Yahwe.