Read Kalanga 1 Zwiyitikalo 22 Bible Online

1 Zwiyitikalo 22 - Kalanga bible

1 Zwiyitikalo 22

¹Ipapo Dafite kabe eti, “Ipapa ndipo pakunowobe Ng'umba ya Yahwe Ndzimu ne pakunowobe tjibeso tjinopisigwa zwibhayilo zwinopisiwa zwe Iziraela.”

²Ngono Dafite kadusa ndaulo ye kuti kukubunganyiwe bataya bamu shango ye Iziraela, ngono kabiga babezhi be mabgwe kuti babezhe mabgwe anobaka Ng'umba ye Ndzimu.

³Dafite wakadusa butale bunjinji gunothama zwipikiri zwili zwinothama zwizhalilo zwe mikoba ne zwinobhatshanya, kadusa kakale ne phangula isi shoma,

⁴ne mapulanka e nti we sida manjinji ngobe Basidoni ne Batire bakabe bapa Dafite mapulanka manjinji.

⁵Ngono Dafite wakabe akumbula eti, “Solomoni nkololo wangu utji ntjetjana kakale aathu kabe ne luzibo ngono Ng'umba ye Ndzimu yakafanila bakiwa yakanaka kupindisisa, ina tjilumbi kakale yakanaka kupinda mu ntuthu wose. Ndizo ikoko ndowokululwamisila.” Ndizo Dafite kalulwamisa zwishingisiwa zwili zwinjinji asathu kafa.

⁶Kudwa ipapo Dafite kadana nkololo uwe Solomoni kanlaya kuti abake Ng'umba ya Yahwe Ndzimu we Iziraela.

⁷Wakadwa Solomoni kati, “Nkololo wangu, ndakabe nako mu moyo wangu kuti ndibakile zina la Yahwe Ndzimu wangu ng'umba.

⁸Koga dama la Yahwe likazha kundili liti, ‘Wakatebula lopa njinji kakale wakagwa ngwa dzili njinji, ndizo aungandibakile ng'umba ngoti wakatebula malopa manjinji mbeli kwangu mu shango.

⁹Ngono bona unowozwala mwana we tjilisana, unowobe nthu we mbakiso. Ndowompa mbakiso mu zwita zwizwe zose kupoteleka, ngono zina lile unowodang'wa kuyi Solomoni ngono ndowopa Iziraela mbakiso ne kunyalala mu mazhuba awe wose.

¹⁰Unowobakila zina langu ng'umba kukudza zina langu. Unowobe nkololo wangu, ndowobe tate babe ngono ndowosimisa tjigalo tjitje tje bushe mu Iziraela tjatjose.’

¹¹“Ndizo ngwenu nkololo wangu, Yahwe ngababe nawe kuti ndizo ubhudilile mukubaka Ng'umba ya Yahwe Ndzimu uwo sekwa bakaleba nge kuko.

¹²Tshene Yahwe bangakupa butjenjedu ne hwisiso kuti ndizo ubuse Iziraela kuyendidzana nge nlayo wa Yahwe Ndzimu uwo.

¹³Unowobhudilila ha ungabe ne njele kulondolodza milayo Yahwe yabakapa Mushe kuipa Iziraela. Sima ube nge tjilopa, usitje usitemeke mafupa.

¹⁴Ndakatukutila kubi ndilulwamisila Ng'umba ya Yahwe, ndakakubunganya talenta dze golide dzili zwiwulu zwili zwinna ne dzimiliyoni dze talenta dze siliva ne phangula ne butale bunjinji gusina mbalo, mapango ne mabgwe zwiyapo, ngono wakafanila kuti uzwipaphidze.

¹⁵Una bashingi bali banjinji: una bathuli be mabgwe ne babaki be mabgwe ne babezhi ne nyambi dze mishingo ngo siyana kwadzo kusina mbalo,

¹⁶una bashingi bana luzibo gwe golide ne siliva ne phangula ne butale. Tangisa ushinge, Yahwe babe nawe.”

¹⁷Dafite kadwa batungamili bose be Iziraela kuti babhatshe Solomoni nkololo uwe eti,

¹⁸“Apa Yahwe Ndzimu wenyu abanamwi kene? Apa abazomupa mbakiso kumwe ne kumwe kene? Ngoti bakathama kuti ndikunde bagali bose be shango iyeyi ngono ngwenu bapasi kwa Yahwe ne bathu babo.

¹⁹Ndizo ngwenu longa meya mu nyama kushaka Yahwe Ndzimu uwo. Milika bakila Yahwe Ndzimu bugalo gwakayengemala kuti ndizo Bhokisi le Tjidumano tja Yahwe ne zwishingisiwa zwakayengemala zwizhisiwe ku ng'umba inokudza zina la Yahwe.”