Read Kalanga 1 Zwiyitikalo 23 Bible Online

1 Zwiyitikalo 23 - Kalanga bible

1 Zwiyitikalo 23

¹Kwakati Dafite atjikula akwegula kabiga Solomoni nkololo uwe mambo we Iziraela.

²Dafite wakakubunganya batungamili bose be Iziraela ne bapirisiti ne Balevi.

³Balevi bakabagwa bakabe bali be makole ali makumi matatu kuyenda pezhugwi, balume bose bose bakabe bali zwiwulu zwili makumi matatu ana bali zhanakadzi (38 000).

⁴Mu bali Dafite wakabiga bali zwiwulu zwili makumi mabili ana bali banna (24 000) kuti balingisane ne nshingo we Ng'umba ya Yahwe, bali zwiwulu zwili tathatu (6 000) kababiga kuti babe bashingisi ne basumikilisi,

⁵bali zwiwulu zwinna (4 000) kababiga kuti babe balindi be nkoba, kabiga bali zwiwulu zwinna (4 000) kuti balingisane ne kukudza Yahwe nge zwilidzo zwakathamigwa nshingo iwoyu.

⁶Dafite kabathubukanya kuyendidzana nge misha ye bakololo ba Levi: Geshoni na Kohati na Merari.

⁷Bakololo ba Geshoni bakabe bali bo Ladani na Shimeyi.

⁸Bakololo ba Ladani bakabe bali bo Jehiele ali nsholo we nsha na Zethami na Jowele, bose bose bakabe bali batatu.

⁹Bakololo ba Shimeyi bakabe bali bo Shelomoti na Haziele na Harani, bose bose bakabe bali batatu. Ibaba ndibo bakabe bali misholo ye misha ya Ladani.

¹⁰Bakololo ba Shimeyi bakabe bali banna bali bo Jahati na Zina na Jeushi na Bheriya.[9]

¹¹Jahati wakabe ali nsholo we nsha etobegwa ndi Ziza, Jeushi na Bheriya bakabe basina bakololo banjinji ndizo bakabaligwa se nsha nng'ompela.

¹²Bakololo ba Kohati bakabe bali bo Amuramu na Izhari na Heburoni na Uziele bose bose bakabe bali banna.

¹³Bakololo ba Amuramu bakabe bali bo Aroni na Mushe. Aroni wakabigigwa ntome kuti ndizo alingisane ne zwithu zwakapiwa Ndzimu. Iye ne bakololo babe bakabe bakafanila kuti bagale bepisa zwibhayilo mbeli kwa Yahwe ne kubashingila ne kuleba makombolelo mu zina labo misi yose.

¹⁴Koga bakololo ba Mushe nlume we Ndzimu bakabaligwa mu Balevi.

¹⁵Bakololo ba Mushe bakabe bali Gerishomu na Eliezeri.

¹⁶Bakololo ba Gerishomu bakabe bali bo Shebuweli ali nsholo we nsha.

¹⁷Eliezeri, iye wakabe ana nkololo ali nng'ompela edang'wa Rihabiya koga Rihabiya iye wakabe ana bakololo banjinji.

¹⁸Bakololo ba Izhari bakabe bali bo Shelomiti ali nsholo we nsha.

¹⁹Bakololo ba Heburoni bakabe bali bo Jeriya ali nsholo we nsha etobegwa ndi Amariya na Jahaziele ali we butatu na Jekameamu ali we bunna.

²⁰Bakololo ba Uziele bakabe bali bo Mika ali nsholo we nsha na Ishiya ali we bubili.

²¹Bakololo ba Merari bakabe bali bo Mahili na Mushi. Bakololo ba Mahili bakabe bali bo Eleazari na Kishi.

²²Eleazari wakabe asina bakololo koga ana bakololokadzi koga, ibo bakalobogwa ne hama dzabo bakololo ba Kishi.

²³Bakololo ba Mushi bakabe bali bo Mahili na Ederi na Jerimoti bose bose bali batatu.

²⁴Bakololo ba Levi bakabe bakabigwa nge misha ya botate babo ne misholo ye misha sekwa bakakwalisiwa kuyendidzana nge mazina e mmwe ne mmwe kudwa mu makole ali makumi mabili kuyenda pezhugwi ibo bakabe bakafanila kushinga nshingo we Ng'umba ya Yahwe.

²⁵Ngobe Dafite wakabe ati, “Yahwe Ndzimu we Iziraela bapa bathu babo kunyalala kakale banogalila mu Jerusalema tjatjose.

²⁶Ndizo Balevi abatosheta kuti bagale bakasenga bugalo gwe Ndzimu kene tjimwe tje zwithu zwinoshingisiwa mu guli.”

²⁷Nge matama a Dafite e bupelo Balevi bose bakakwalisiwa kudwa muna bana makole ali makumi mabili kuyenda pezhugwi

²⁸ngono bakapiwa nshingo wekubhatsha bakololo ba Aroni mu nshingo we Ng'umba ya Yahwe kutjengeta zwibata zwe kunonamatigwa ne zwing'umbana zwa mukati ne kutjenapadza zose zwakayengemala ne mimwe mishingo ye Ng'umba ye Ndzimu,

²⁹kubhatsha ngolingisana nge lulwamisa tjiwunga tjinobigwa pa tafuli ne bgwisa gwe tjipo tje mathunde ne tjiwunga tjisina mbidzo ne tjiwunga tjakagotjiwa ne tjiwunga tjakashanganyiwa nge mafuta nekukala ne yela zwipo zwe Ng'umba ye Ndzimu.

³⁰Bakabe bakafanila kulingisana ngoma mangwanana mamwe ne mamwe kuboka ne kukudza Yahwe, bethama saikoko nenge mu madekwana

³¹nenge zwibaka zose akudusiwa zwibhayilo zwinopisiwa zwipisigwa Yahwe mu zhuba le kunyaluluka le Sabata ne zhuba le Nzano we Mwedzi ugala ne mu mazhuba e mizano kuyendidzana ne sekwa akakwagwa zwibaka zose mbeli kwa Yahwe.

³²Bakapiwa mazwidabiligo ekutjengeta nshasha we bushanganilo ne bugalo gwakayengemala ne kubhatsha bapirisiti makamu abo e ludzi gwa Aroni mu nshingo we Ng'umba ya Yahwe.