Read Kalanga 1 Zwiyitikalo 24 Bible Online

1 Zwiyitikalo 24 - Kalanga bible

1 Zwiyitikalo 24

¹Awa ndiwo makupo e bakololo ba Aroni. Bakololo ba Aroni bakabe bali bo Nadabu na Abihu na Eleazari na Ithamari.

²Koga Nadabu na Abihu bakafa betangila tate babo basathu bawana bana, ndizo Eleazari na Ithamari bakabe bapirisiti.

³Dafite ebhatshiwa ndi Zadoki tjizekugwana tja Eleazari na Ahimeleki tjizekugwana tja Ithamari bakalongolosa bapirisiti nge mishingo yabo.

⁴Ngono se kwakabe kuna misholo ye misha ili minjinji mu zwizekugwana zwa Eleazari kupinda be nsha wa Ithamari, mu zwizekugwana zwa Eleazari bakathubukanyiwa bakabe makupo ali gumi lina bali tathatu (16), ba Ithamari ibo bakabe makupo ali zhanakadzi.

⁵Bakathubukanyiwa ngoposa hakata ngobe kwakabe kuna makulukota e bugalo gwakayengemala ne makulukota e Ndzimu mu zwizekugwana zwa Eleazari ne zwa Ithamari.

⁶Ngono nkwalili Shemaya nkololo wa Nethanele kakale ali Nlevi wakabakwala bose mbeli kwa mambo ne makulukota na mbeli kwa Zadoki we mpirisiti na mbeli kwa Ahimeleki nkololo wa Abiathari na mbeli kwe misholo ye misha ye bapirisiti ne Balevi, kwakabe kutogwa nsha nng'ompela kudwa mu zwizekugwana zwa Eleazari ne tjing'ompela kuna Ithamari.

⁷Ngono dziba le kutanga likawila Jehoyaribi le bubili likawila Jedaya

⁸le butatu likawila Harimu le bunna kuna Seorimu,

⁹le bushanu likawila kuna Malikija le butathatu likawila kuna Mijamini,

¹⁰le butendeka likawila kuna Hakozi, le buzhanakadzi likawila kuna Abija,

¹¹le buzhanalume likawila kuna Jeshuwa le bugumi likawila kuna Shekaniya,

¹²le bugumi lina nng'ompela (11) likawila kuna Eliyashibi, le bugumi lina bali babili (12) likawila kuna Jakimu,

¹³le bugumi lina batatu (13) likawila kuna Hupa, le bugumi lina banna (14) likawila kuna Jeshebiabu,

¹⁴le bugumi lina bashanu (15) likawila kuna Biliga, le bugumi lina bali tathatu (16) likawila kuna Imeri,

¹⁵le bugumi lina bali kutendeka (17) likawila kuna Heziri, le bugumi lina bali zhanakadzi (18) likawila kuna Hapizezi,

¹⁶le bugumi lina bali zhanalume (19) likawila kuna Pethahiya le bumakumi mabili (20) likawila kuna Jehezikele,

¹⁷le bumakumi mabili ana nng'ompela (21) likawila kuna Jakini, le bumakumi mabili ana babili (22) likawila kuna Gamuli,

¹⁸le bumakumi mabili ana batatu (23) likawila kuna Delaya, le bumakumi mabili ana banna (24) likawila kuna Maziya.

¹⁹Ibaba bose bakabe bapiwa nshingo wekushinga mu Ng'umba ya Yahwe koga sekwa kwakabe kuli mu ndongoloso yakabigwa ndi Aroni batategulu babo iye sekwa akadwiwa ndi Yahwe Ndzimu we Iziraela.

²⁰Ngono bakasala be zwizekugwana zwa Levi bakabe bali: Zwizekugwana zwa Amuramu kuli Shebuweli, mu zwizekugwana zwa Shebuweli kwakabe kuli Jedaya.

²¹Mu zwizekugwana zwa Rihabiya bakabe bali bo Ishiya ali nsholo we nsha.

²²Mu zwizekugwana zwe Baizhari bakabe bali Shelomoti, mu zwizekugwana zwa Shelomoti bakabe bali bo Jahati.

²³Bakololo ba Heburoni bakabe bali bo Jeriya ali nsholo we nsha, we bubili ali Amariya, Jahaziele iye ali we butatu, Jakameamu ali we bunna.

²⁴Nkololo wa Uziele wakabe ali Mika, kudwa mu bakololo ba Mika kwakabe kuli Shamiri.

²⁵Nnunguna wa Mika kwakabe kuli Ishiya, kudwa mu bakololo ba Ishiya kwakabe kuli Zekariya.

²⁶Bakololo ba Merari bakabe bali bo Mahili na Mushi. Nkololo wa Jaziya wakabe ali Bheno.

²⁷Bakololo ba Merari kudwa kuna Jaziya bakabe bali bo Bheno na Shohamu na Zakhuri na Ibiri.

²⁸Kudwa kuna Mahili wakabe ali Eleazari, Eleazari wakabe asina bakololo.

²⁹Kudwa kuna Kishi kwakabe kuli nkololo wa Kishi edang'wa Jerahimeli.

³⁰Bakololo ba Mushi bakabe bali bo Mahili na Ederi na Jerimoti. Ibaba bakabe bali Balevi kuyenda nge misha yabo.

³¹Naibo bakakandila koga se hama dzabo zwizekugwana zwa Aroni, mbeli kwa Mambo Dafite na Zadoki na Ahimeleki ne misholo ye misha ye bapirisiti ne Balevi. Misha ye hama hwola yakabe itobegwa koga sa iyeyi mitukunu.