Read Kalanga 1 Zwiyitikalo 28 Bible Online

1 Zwiyitikalo 28 - Kalanga bible

1 Zwiyitikalo 28

¹Dafite wakadusa ndaulo kuti kudang'we makulukota wose e Iziraela, ndizo batungamili be njudzi ne makulukota akabe eshinga ali pasi kwa mambo ne balauli be babhayani bali zwiwulu (1 000) ne bali mazana (100) ne batjengeti be thundu ne ng'ombe dza mambo nedze bakololo babe kose ne makulukota e ng'umba ya mambo ne balume bakasima bakakubungana ku Jerusalema.

²Mambo kamilika kalebeleka ne bathu eti, “Mundibhulutane zwikamu zwangu namwi bathu bangu. Ndakabe ndiyemula kubaka ng'umba inowobe bugalo gwe kunyaluluka gwe Bhokisi le Tjidumano tja Yahwe, tjigalo tje makumbo e Ndzimu wedu kakale ndakabe ndina ndongoloso yandakathama kuibaka.

³Koga Ndzimu wakandidwa ukati, ‘Aungandibakile ng'umba yandinga gala, ngobe u mbhayani kakale wakatebula lopa.’

⁴Ngono koga Yahwe Ndzimu we Iziraela bakandishalula muna be nsha wangu bose kuti ndibuse Iziraela tjatjose. Bakashalula Juda kube ntungamili ngono kudwa mu ng'umba ya Juda bakashalula nsha wangu ngono mu bakololo ba tate bangu bakashathila kundibiga mambo we Iziraela yose.

⁵Yahwe bakandipa bakololo ngono mubali bakashalula Solomoni kuti abuse Iziraela bushe gwa mambo.”

⁶Yahwe bakandidwa beti, “Solomoni nkololo uwo ndiye unowobaka ng'umba yangu ne thama zwibata zwangu ngobe ndashalula iye kube nkololo wangu ngono imi ndowobe tate babe.

⁷Ngono ndowosimisa bushe gugwe nge kusingapele ha angashingikadza milayo yangu sekwa anothama ngwenu.”

⁸“Ndizo ngwenu, bathu bangu, mbeli kwe Ndzimu wedu na mbeli kwe gubungano ileli le Iziraela ilo bathu ba Yahwe, ndomudwa nditi londolodzani tjimwe ne tjimwe tjatakadwiwa ndi Yahwe Ndzimu wedu kuti ndizo mudwilile mubhudilile mukutola shango yakanaka ne kuti muzhe muipe zwizekugwana zwinozha.

⁹“Ngono iwe nkololo wangu Solomoni, ziba Ndzimu wa tate babo uushingile nge moyo uwo wose nenge ludo, ngobe Yahwe banolingisisa tjimu moyo kakale banoziba njalakang'wa dzose. Ha ubashaka unowobabona. Koga ausina hanya nabo, banowokufupatilila tjatjose.

¹⁰Hwisisa ke, ngoti Yahwe bashalula iwe kuti ubabakile Ng'umba ye Ndzimu kube bugalo gwakayengemala. Sima ngono uthame saikoku.”

¹¹Ngono Dafite kapa nkololo uwe Solomoni ifaniso tje Ng'umba ye Ndzimu ne tje matula ne tje ng'umbana dzi pezhugwi ne dzimwe ng'umba ne tje ng'umbana ye tjigalo tje ngoni,

¹²ne ifaniso tje zwithu zose zwaakabe anazo mu nkumbulo uwe ngekwe misha ye Ng'umba ya Yahwe ne dzimwe ng'umbana dzakatjipoteleka ne matula e Ng'umba ye Ndzimu ne tje matula e zwipo.

¹³Dafite wakapa Solomoni ndongoloso ye bapirisiti ne Balevi kuti banowobe betjengeta zwija ne kobana mishingo yabo ye Ng'umba ya Yahwe tjini.

¹⁴Wakampa ndongoloso ye kuti bashingise golide ingapani mukuthama zwija zwe golide ne ndongoloso ye kuti bashingise siliva ingapani mu nshingo mmwe ne mmwe,

¹⁵ne kuti bashingise golide ingapani kuthama zwigadziko zwe mavone ne mavone azo,

¹⁶neye kuthama tafuli ne imwe ne imwe ye golide yakabe ibigwa tjiwunga tjakayengemadziwa.

¹⁷Dafite wakapa Solomoni ndongoloso bo ye kuti bashingise golide mbuyanana ingapani kuthama mbambo dzinobhaya nyama ne zwikutili ne majegwa ne kuti bashingise siliva ingapani kuthama mabhavu,

¹⁸ne kuti bashingise golide mbuyanana ingapani kuthama tjibeso tjinopisigwa zwibhayilo itjo tjakabe tjipisigwa motsha ne golide mbuyanana ingapani kuthama koloyi dze ngwa dze dzikherubhu dzinogala pezhugwi kwe Bhokisi le Tjidumano tja Yahwe.

¹⁹Dafite kandwa kati, “Kose ikoko kwakakwagwa mu ifaniso tje mbako itjetji kwakakwagwa kuyenda nge ndaidzo yandakapiwa ndi Yahwe ne bukwabo kuti ndikushingikadze.”

²⁰Ipapo Dafite kadwa Solomoni nkololo uwe eti, “Sima ube ne tjilopa ngono uthame saikoko. Usitje, kene kuli kutemeka mafupa ngobe Yahwe Ndzimu ibo Ndzimu wangu banawe. Abangakulashe kene bakakufupatila kudzina wafidza nshingo we Ng'umba ya Yahwe.

²¹Ngono kakale bona, bapirisiti ne Balevi bakapiwa nshingo we kushinga mu Ng'umba ye Ndzimu, kakale bashingi bana bunyambi ne njele banoshaka kukubhatsha ne bathu koga bose ne butungamili banawe.”