Read Kalanga 1 Zwiyitikalo 29 Bible Online

1 Zwiyitikalo 29 - Kalanga bible

1 Zwiyitikalo 29

¹Kudwapo Mambo Dafite kalebeleka ne gubungano eti, “Solomoni nkololo wangu iye wakashalugwa ne Ndzimu utji ntjetjana kakale aathu kabe ne luzibo ngono nshingo we mbako njinji ngoti ng'umba iyeyi ate ye bathu ndeya Yahwe Ndzimu.

²Ndizo ndagwisa kululwamisa zwinowoshakika mu mbako ye Ng'umba ye Ndzimu nge matatabuko angu wose ingabe siliva kene golide kene phangula kene butale kene mapango kene thakwala kene mabgwe mamwe akanaka.

³Kakale pezhugwi kwe zwithu zose izwezwi ndadusa siliva ne golide mu thundu yangu ngobe ndina ludo mu Ng'umba ye Ndzimu.

⁴Ndadusa dzitalenta dzili zana ling'ompela (100) dze golide ne dzitalenta dzili mazana mabili ana makumi ali tathatu ne bushanu dze golide dze siliva kunakisa makuma e Ng'umba ye Ndzimu,

⁵golide iyeyi ibe ye zwithu zwe golide siliva ibe ye zwithu zwe siliva na zose zwinowoshakiwa ne nyambi dze bathuli be mabgwe, ndiani mmwe unodadusa nasi edusila Yahwe?”

⁶Misholo ye misha ne makulukota ne balauli be babhayani be bali zwiwulu ne balauli be babhayani be bali mazana ne bashingi bakalingisana nge nshingo wa mambo bakadusa zwipo nge mimoyo mitjena.

⁷Bakadusila nshingo we Ng'umba ye Ndzimu dzitalenta dzili zwiwulu zwili zwishanu (5 000) ne golide ye bulemo gwe zwiwulu zwili makumi ali gumi (10 000) ne dzitalenta dze siliva dzili zwiwulu zwili makumi ali gumi (10 000) ne dzitalenta dzili zwiwulu zwili gumi lina zhanakadzi (18 000) dze phangula ne zwiwulu zwili zana (100 000) zwe butale.

⁸Ibabo bakabe bana mabgwe akanaka bakadusila matula e Ng'umba ye Ndzimu ya Yahwe yakabe ili pasi kwa Jehiele we Nlevi we ludzi gwa Geshoni.

⁹Bathu bakashatha ngobe bakabe badusila Yahwe zwipo zwabo nge mimoyo mitjena, Mambo Dafite naiye wakashatha kwazo.

¹⁰Dafite wakakudza Yahwe mbeli kwe gubungano lose eti, “Gudzo ngalibe kumuli Yahwe Ndzimu wa tate bedu Iziraela, nge kusingapele kose!

¹¹Imwi Yahwe mu nkulu kakale muna simba mopenyelela muna tjibombo kakale mu she ngobe tjimwe ne tjimwe tjikudzimu ne mu shango nde tjenyu. Ngobe bushe nde gwenyu, Mokudziwa muli mbusi nkulu mu magalo wose.

¹²Fumwa ne gudzo zose zodwa kumuli, mobusa tjimwe ne tjimwe nge matatabuko ne simba, munako kuthama nthu kuti abe nkulu abe ne simba.

¹³Ndizo ngwenu Ndzimu wedu, tomutenda, tokudza zina lenyu gulu.

¹⁴“Koga imi ndiani ne bathu bangu ndiboani? Kwatingadusa kungapa kene? Tjimwe ne tjimwe tjodwa kumuli, ngono tamupa iko kunodwa kumuli zwako.

¹⁵Tibazhi ne bataya mbeli kwenyu koga sa bobatategulu bedu bose. Mazhuba edu mu shango anonga ntutshi koga atina kugalabgwe.

¹⁶Yahwe Ndzimu wedu, zwithu zose izwezwi tamupaizo kuti kubakiwe ng'umba kukudza zina lenyu lakayengemala, koga zodwa kumuli nde zwenyu.

¹⁷Ndoziba Ndzimu wangu, kuti moshakisisa moyo we nthu mmwe ne mmwe mukashathila bathu bana ntutshi. Nge malebeswa wose ndamupa zose izwezwi nge moyo ntjena kakale ndabona kuti bathu bose bapano bakashathila kungapani kumupa zwipo.

¹⁸Yahwe Ndzimu wa bobatategulu bedu Abhurahama na Isaki na Iziraela, thamani kuti moyo ntjena iwoyu ugalile tjose mu bathu benyu kakale ne mikumbulu yabo igale yakalinga imwi.

¹⁹Thamani kuti nkololo wangu Solomoni atukutilile kulondolodza milayo yenyu ne kuthama tjimwe ne tjimwe kubaka Ng'umba ye Ndzimu iyo yandalulwamisila.”

²⁰Ipapo Dafite kadwa gubungano lose eti, “Kudzani Yahwe Ndzimu wenyu!” Ndizo bose bakakudza Yahwe Ndzimu wa bobatategulu babo bakakotamisa misholo bakathigama mbeli kwa Yahwe kakale bali mambo.

²¹Mu zhuba linotobela bakadusila Yahwe zwibhayilo zwinopisiwa, bakadusa mikono ili tjiwulu (1 000) ne nyundo dzili tjiwulu (1 000) ne pkhwizana dzili tjiwulu (1 000) bakadusila Yahwe kose ne zwibhayilo zwe zwing'o ne zwibhayilo zwinopisiwa zwili zwinjinji zwe Iziraela yose.

²²Bakabiga Solomoni nkololo wa Dafite mu tjigalo tje bushe gwe bubili nge zina la Yahwe bakanzhodza kube nlauli wabo Zadoki iye kabe mpirisiti. Ndizo Solomoni kagala tjigalo tja tate babe tjakabambiwa ndi Yahwe. Wakabhudilila kwazo mu bumambo gugwe kakale itjaba tjose tje Iziraela tjakabe tjinteta kwazo.

²³Ndizo Solomoni kagala tjigalo tja tate babe Dafite mu tjigalo tjakabigwa ndi Yahwe. Wakabe mambo wakabhudilila ngono ne itjaba tjose tje Iziraela tjikan'hwa.

²⁴Balauli bose be babhayani ne balume bakasima nenge bakololo ba Dafite bamwe bakagadzabgwe kuti banoteedza Solomoni se ali mambo.

²⁵Yahwe bakathama kuti Iziraela yose itje Solomoni, bakanthama kuti abe tjilumbi pana boshe bose bakatongo busa Iziraela.

²⁶Dafite nkololo wa Jesi wakabe ali mambo mu Iziraela.

²⁷Wakabusa Iziraela makole ali makumi manna (40) ali mu Heburoni ne ali makumi matatu ana matatu (33) mu Jerusalema.

²⁸Wakafa akula kwazo apedza butjilo, ana fumwa kakale etetiwa kwazo. Nkololo uwe Solomoni kagala tjigalo tja Dafite ali mambo.

²⁹Thawu ngekwa Mambo Dafite kudwa mukutangisa kunoti kubupelo dzakakwagwa mu hwalo dze balebesambeli batatu bo Samuele na Nathani na Gadi.

³⁰Hwalo idzedzi dzolakidza kuti Dafite wakabusa tjini ne kuti wakabe akasima kungapani ne tjimwe ne tjimwe tjakanshingikalila ne zwakashingikalila Iziraela ne mibuso yakapoteleka Iziraela.