Read Kalanga 1 Zwiyitikalo 5 Bible Online

1 Zwiyitikalo 5 - Kalanga bible

1 Zwiyitikalo 5

¹Aba bakololo ba Rubheni mbano ya Iziraela. Rubheni wakalashikigwa nge fanilo dze bumbano gugwe asinolengudza ndobolo ya tate babe ngowalilana ne mmwe we bakadzi ba tate babe ngono fanilo dzidze dzikapiwa bakololo ba Josefa nkololo wa Iziraela, ndizo Rubheni asakakwalisiwa nge mazwago awe e bumbano.

²Nenguba kwakajalo Juda wakabe akasima mu banung'una babe nlauli wakabhuda munli koga fanilo dze mbano dzakabe dza Josefa.

³Rubheni mbano ya Iziraela wakabe ana bakololo bali banna bo Hanoki na Phalu na Hezironi na Khami.

⁴Zwizekugwana zwa Jowele bakabe bali bo Shemaya, Shemaya ali tate ba Gogi, Gogi ali tate ba Shimeyi,

⁵Shimeyi ali tate ba Mika, Mika ali tate ba Reya, Reya ali tate ba Bhaale,

⁶Bhaale ali tate ba Bheera iye wakatapiwa ndi mambo we Asiriya Tiligati Filineseri. Bheera wakabe ali ntungamili we Barubheni.

⁷Hama dzabo nge misha yadzo dzakalongolosiwa mu nkwalo: She wabo wakabe ali Jeyele kube kuti Zekariya,

⁸na Bhela nkololo wa Azazi, Azazi ali nkololo wa Shema, Shema ali nkololo wa Jowele. Bakagala mu Aroeri kunoti ku Nebo neku Bhaale Meyoni.

⁹Ku bhezhuba bakabe batola shango yose kunoti ku tjekelo dze tjilambanyika kukwebela ku gwizi gwe Yufuratesi ngobe zwithuwo zwabo zwakabe zwawanda mu Giliyadi.

¹⁰Mu misi ye mbuso wa Saulo Barubheni bakanginilila Bahagiri bakababulaya mu ngwa ngono bakagala mu mishasha yabo kuyenda nge ntuthu wose ku bhezhuba kwe Giliyadi.

¹¹Bakololo ba Gadi bakabe begala kubapa ne Barubheni bali ku bunandzwa mu shango ye Bhashani kunoti ku Saleka.

¹²Jowele wakabe ali she wabo, etobegwa ndi Shefamu kube kuti Janai na Shafati mu Bhashani.

¹³Hama dzabo kuyenda nge misha yabo bakabe bali bo Mikaele na Meshulamu na Sheba na Jorayi na Jakani na Ziya na Eberi bose bose bakabe bali kutendeka.

¹⁴Aba bakololo ba Abihaile, Abihaile ali nkololo wa Huri, Huri ali nkololo wa Jarowa, Jarowa ali nkololo wa Giliyadi, Giliyadi ali nkololo wa Mikaele, Mikaele ali nkololo wa Jeshishayi, Jeshishayi ali nkololo wa Jado, Jado ali nkololo wa Bhuzi.

¹⁵Ahi wakabe ali nkololo wa Abidiele wakabe ali iye she we misha yabo, Abidiele wakabe ali nkololo wa Guni, Guni wakabe ali she mu nsha wabo.

¹⁶Bagadi bakabe begala mu Giliyadi ne mu Bhashani ne mizi yakaipoteleka betendebukila ku shango ye mafulilo e Sharoni.

¹⁷Bose ibaba bakakwagwa mu lukwalo gwe mazwago mu misi ye mbuso wa Jothamu mambo we Juda na Jeroboamu mambo we Iziraela.

¹⁸Barubheni ne Bagadi ne gwamu le ludzi gwa Manase bakabe bana balume bali zwiwulu zwili makumi manna ana banna ana mazana ali kutendeka ana bali makumi ali tathatu (44 760) bakabe balulwamisigwa ngwa. Bakabe bali balume bakasima bangatubula bhata tjivikili ne thumo, bakabe betubula shingisa dati, bali balume bakadiyiwa ngwa.

¹⁹Bakabanga ngwa mu Bahagiri ne Jetu ne Nafishi ne Nodabu.

²⁰Ngono bakati bewana bhatsho kugwisa bathu ibaba, Bahagiri na bose babakabe banabo bakakundiwa, ngobe bakati bali mu ngwa bakalilila ku Ndzimu ngono Ndzimu ukahwa mitembezelo yabo.

²¹Bakatolela Bahagiri zwithuwo zwabo: Kamela dzili zwiwulu zwili makumi mashanu (50 000) ne pkhwizi ne mbudzi dzili zwiwulu zwili mazana mabili ana makumi ali mashanu (250 000) ne madonki ali zwiwulu zwibili (2 000). Bakatapa bathu bali zwiwulu zwili zana ling'ompela (100 000),

²²bunji gwe bathu gwakabulawa ngobe ngwa yakabe ili ye Ndzimu, ngono bakagala mu magalo abo kudzina beyenda mukutapiwa.

²³Bathu be gwamu le ludzi gwa Manase bakagala mu ntuthu we Bhashani kunoti Baale Hemoni ne Seniri betendebukila ku Dombo le Hemoni ngono bakawanda kwazo.

²⁴Aba ndibo bakabe bali boshe be misha yabo: Eferi na Ishi na Elieli na Aziriele na Jeremiya na Hodaviya na Jadieli. Bakabe bali babhayani bakasima, balume banozibgwa kakale bali boshe mu misha yabo.

²⁵Koga bakabe ne kusagalikabgwe mu Ndzimu wa botate babo ngono bakazwipa midzimu ipoga ye Bezwitjaba, ibo Ndzimu bawakabe wabatatila kutjena.

²⁶Ndizo Ndzimu we Iziraela ukadzonga meya dza Puli mambo we Asiriya iye wakabe edang'wa Tigilati Pileseri kuti unonginilila shango yabo. Katapila tjatjose Barubheni ne Bagadi ne gwamu le ludzi gwa Manase ku Hala neku Habori neku Hara ne hwunde ye gwizi gwe Gozani.