Read Kalanga 2 Zwiyitikalo 11 Bible Online

2 Zwiyitikalo 11 - Kalanga bible

2 Zwiyitikalo 11

¹Kukati Rehoboamu eswika ku Jerusalema, kakubunganya babhayani bali zwiwulu zwili zana lina makumi ali zhanakadzi (180 000), kudwa mu nsha wose wa Juda ne ludzi gose gwa Bhenjamini. Akazwimisila kunogwa ne Iziraela kubgwilizila mbuso kuna Rehobhoamu.

²Koga dama le Ndzimu likazha kuna Shemaya we nlebesambeli, likandwa likati,

³“Lebeleka na Rehoboamu nkololo wa Solomoni mambo we Juda ne bathu bose ne ng'umba yose ya Juda neya Bhenjamini, ubadwe uti,

⁴‘Yahwe bakati musiyende kunogwa ne bakanyi kwenyu Baiziraela. Mmwe ne mmwe ngaabgwilile ku nzi uwe, ngobe tjashingikala tjodwa kundili.’ ” Ndizo bose bakahwa matama a Yahwe, bakashandukila ku nzi, sekwaleba Yahwe.

⁵Rehoboamu kagala mu Jerusalema ngono kabaka mizi mikulu ye matizhilo mu Juda.

⁶Wakabaka Bhetelehema ne Etamu ne Tekowa ne

⁷Bhetizuri ne Soko ne Adulamu ne

⁸Gati ne Mareshahi ne Zifi ne

⁹Adoraimu ne Lakhishi ne Azekahi ne

¹⁰Zora ne Aijaloni ne Heburoni, iyeyi ndiyo mizi mikulu ye Juda ne Bhenjamini.

¹¹Wakabaka matizhilo iyawa akasima ngono kabiga batungamili mu ali kabiga ne matula e zojiwa ne mafuta ne nkumbi we zhambi.

¹²Wakabiga zwivikisi ne mathumo mu mizi mikulu yose, eisimisa. Ndizo Juda ne Bhenjamini dzakabe dzili dzidze.

¹³Ngono bapirisiti ne Balevi bakabe bali mu Iziraela bakazha kunli bedwa mu magalo akathubukana abakabe begala.

¹⁴Balevi bakasiya shango yabo ye mafulilo ne thundu ngono bakazha ku Juda ne Jerusalema ngoti Jeroboamu ne bakololo babe bakabe babathubula mukushingila Yahwe,

¹⁵ngono kabiga bapirisiti babe kuti bashinge mu magalo pezhugwi ekunamata ne kutungamila mu kunamata midzimu ye zwifano zwe mbudzi ne phulu yaakabe athama.

¹⁶Ngono ibabo bakabe bakazwipa kutobela Yahwe Ndzimu we Iziraela bakabatobela kudwa mu njudzi dzose dze Iziraela bezha ku Jerusalema bewodusila Yahwe zwibhayilo Ndzimu wa botate babo.

¹⁷Bakasimisa bushe gwe Juda, kwe makole matatu bakathama kuti Rehoboamu nkololo wa Solomoni adzikame mu bumambo, ngoti bakatobela zila dza Dafite na Solomoni kwe makole matatu.

¹⁸Rehoboamu kalobola Mahalati, Mahalati ali nkololokadzi wa Jerimoti, Jerimoti ali nkololo wa Dafite, mme ba Mahalati bali Abihaile, Abihaile ali nkololokadzi wa Eliyabu mwana we mwana wa Jesi.

¹⁹Kanzwalila bakololo bali batatu ibo bakabe bali bo Jeushi na Shemariya na Zahamu.

²⁰Kwakati shule katola Maaka nkololokadzi wa Abusalomu ngono iye kazwala Abija na Atai na Ziza na Shelomiti.

²¹Rehoboamu wakabe eda Maaka nkololokadzi wa Abusalomu kupinda bakadzi babe bose ne kupinda bakadzi batukunu bose. Rehoboamu wakabe ana bakadzi bali gumi lina bali zhanakadzi (18) ne balongwana babo bose bali makumi ali tathatu (60) ne bakololo bali makumi mabili ana bali zhanakadzi (28) ne bakololokadzi bali makumi ali tathatu (60),

²²ngono Rehoboamu kabiga Abija nkololo wa Maaka kuti abe iye ntungamili mu banunguna babe ngoti wakabe eshaka kuti azhe ambige mambo.

²³Rehoboamu kakobela bakololo babe mishingo nge butjenjedu ngono kababiga batungamili mu mituthu yose ye matizhilo ye Juda ne Bhenjamini. Ngono wakabatjengeta kwazo kakale kabashakila bakadzi banjinji.