Read Kalanga 2 Zwiyitikalo 13 Bible Online

2 Zwiyitikalo 13 - Kalanga bible

2 Zwiyitikalo 13

¹Mu makole ali gumi lina ali zhanakadzi (18) Jeroboamu, Abija katangisa kubusa Juda.

²Wakabusa makole ali matatu mu Jerusalema. Zina la mmeyabe lakabe liyi Maakha ali nkololokadzi wa Urieli we nzi nkulu we Gibiya. Ngono ngwa ikamuka pakati kwa Abija na Jeroboamu.

³Abija wakayenda ne babhayani bakashalugwa bakasima bali zwiwulu zwili mazana manna (400 000) ngono Jeroboamu iye kayenda ne babhayani bakashalugwa bali zwiwulu zwili mazana ali zhanakadzi (800 000).

⁴Ngono Abija katatha Dombo le Zemarayimi limu shango ye matombo ye Ifureimi ngono kabe eti, “Jeroboamu ne Iziraela yose wee munditeedze!

⁵Apa amutoziba kuti Yahwe Ndzimu we Iziraela bakathama tjidumano tje mwenyu tjisingapele na Dafite, tjekumpa iye ne zwizekugwana zwizwe bushe gwe Iziraela kene?

⁶Ngono Jeroboamu nkololo wa Nebati nlanda wa Solomoni nkololo wa Dafite kapandukila tetshi uwe.

⁷Kudwapo kanokubunganya makupo asinapura e batjinyi bakakulila Rehoboamu nkololo wa Solomoni atji ntukununu kakale asina luzibo asingake kamililana nabo.

⁸Ngono ngwenu imwi mozwidwa muti mungamililana ne bushe gwa Yahwe gumu maboko e bakololo ba Dafite ngoti muli mbunga muna zwifano zwe phulu zwe golide zwamakathamigwa ndi Jeroboamu kube midzimu yenyu.

⁹Apa amuzotatila kutjena bapirisiti ba Yahwe ibo bakololo ba Aroni kose ne Balevi mu bumo gwabo mukabiga bapirisiti nge zila ye be zwitjaba kene? Makabe mutola mmwe ne mmwe koga wazha ne nkono kene pkhwizi dzili kutendeka mumbiga mpirisiti we zwithu zwisi midzimu.

¹⁰“Koga iswi titjashingila Yahwe Ndzimu wedu atizobafupatila. Tina bapirisiti banoshingila Yahwe ibo bakololo ba Aroni ne Balevi banoshingabo nshingo wabo.

¹¹Banodusila Yahwe zwibhayilo zwinopisiwa mangwanana mamwe ne mamwe ne madekwana mamwe ne mamwe bepisa zwinonuhwa zwinozipa, banozhisa tjiwunga pa tafuli ye golide mbuyanana, betjengeta zwigadziko zwe mavone zwe golide kuti ndizo mavone azo adwilile ethuta madekwana. Tolondolodza zwinoshakiwa ndi Yahwe Ndzimu wedu koga makaulashila kutjena.

¹²Bonani Ndzimu ndiwo ntungamili wedu ngono bapirisiti bawo bapano bakabhata nyanga bakazwilulwamisila kudzilidza kuti ngwa itangise. Baiziraela wee, musigwe na Yahwe Ndzimu wa bobatategulu benyu ngobe amungatubule!”

¹³Jeroboamu katumila babhayani be balalili kuti bapoteleke tja shule. Bakabe bakalingisana ne Bajuta koga balalili ibo bakabe bali shule kwabo.

¹⁴Ngono Bajuta bakati belinga bakazwiwana bakakombiwa mbeli na shule. Bakamimila belilila kuna Yahwe beshaka bhatsho ngono bapirisiti bakalidza nyanga.

¹⁵Ipapo balume be Juda bakamimila kwazo, bakabanginilila, ngono balume be Juda bakati bemimila, Ndzimu ukakunda Jeroboamu ne Baiziraela bose mbeli kwa Abija na Juda.

¹⁶Baiziraela bakatizha mbeli kwe bajuta, ngono Ndzimu ukabalonga mu maboko abo.

¹⁷Abija ne babhayani babe bakabulaya Baiziraela bali banjinji kwazo, ndizo kwakabulawa Baiziraela bali zwiwulu zwili mazana mashanu (500 000) zwe balume bakashalugwa.

¹⁸Ndizo Baiziraela bayesiwa pasi nge kwaka jalo mu tjibaka itjetjo ngono Bajuta ibo bakasima, ngoti bakabe bakabiga kose muna Yahwe Ndzimu wa bobatategulu babo.

¹⁹Ngono Abija katatana na Jeroboamu ngono katola mizi mikulu munli, wakatola nzi nkulu we Bhetele ne mizana yakaupoteleka ne Jeshana ne mizana yayo ne Efuroni ne mizana yakaipoteleka.

²⁰Masimba a Jeroboamu kapelela tjose kasitongo tjamuka mu misi ya Abija ngono kukati ku bupelo Yahwe bakanloba ngono kafa.

²¹Abija iye simba lile likakula. Kalobola bakadzi bali gumi lina bali banna (14) ngono kabe ne bakololo bali makumi mabili ana babili (22) ne bakololokadzi bali gumi lina tathatu (16).

²²Mishingo yose ya Abija ne zila dzidze dzose ne mapeswa awe zwakakwagwa mu Thawu dza Ido Nlebesambeli.