Read Kalanga 2 Zwiyitikalo 15 Bible Online

2 Zwiyitikalo 15 - Kalanga bible

2 Zwiyitikalo 15

¹Meya ye Ndzimu ikazha muna Azariya nkololo wa Odedi,

²ngono kayenda kunoshanganidza Asa ngono kati, “Munditeedze, iwe Asa ne Bajuta ne Babhenjamini! Yahwe banamwi ha imwi munabo. Amubashaka banowothama kuti mubabone koga amubafupatila banowomufupatilabo.

³Kwakabe tjibaka tjilefu Baiziraela basina Ndzimu we lebeswa kakale basina bapirisiti kubadiya kakale basina nlayo.

⁴Koga bakati mu mang'oni abo bakashandukila kuna Yahwe Ndzimu we Iziraela, beshaka Yahwe ngono bakabawana.

⁵Mu mazhuba iyawo kwakabe kusina mbakiso kuna unobhuda kene unongina ngoti kwakabe kuna zwinoloba zebe pamwe ne pamwe mu bagali bose be shango.

⁶Bakabe bakathubukana, itjaba tjakabe tjilobesa tjimwe itjaba, nzi nkulu naiwo ulobesa mmwe nzi nkulu ngoti Ndzimu wakabe ubadziyidza nge mang'oni wose koga.

⁷Koga makafanila kuti musime musitongo temeka mafupa. Nshingo wamunoshinga unowobe ne mbhailo.”

⁸Asa wakati ehwa matama iyawa ne bulebesambeli gwa Azariya nkololo wa Odedi kabe ne tjilopa ngono kadusila kutjena midzimu inoshimisa mu shango yose ye Juda ne Bhenjamini ne mu mizi mikulu yaakabe atapa ye shango ye matombo ye Ifureimi. Ipapo kamusa tjibeso tjinopisigwa zwibhayilo tja Yahwe tjakabe tjili mbeli kwe ng'umba ye kutanga ye Ng'umba ya Yahwe.

⁹Wakakubunganya Bajuda ne Babhenjamini bose bakabe bedwa ku Ifureimi ne Manase ne Simiyoni bakabe begala nabo ngoti bunji gwe Baiziraela bakabe banyelukila kuna Asa bebona kuti Yahwe Ndzimu uwe banaye.

¹⁰Bakanokubungana ku Jerusalema mu mwedzi we butatu we gole le bugumi lina bushanu le mbuso wa Asa.

¹¹Ngono mu zhuba ilelo bakadusila Yahwe zwibhayilo bezwitola mu thundu yabakatapa ngono bakadusa ngabe dzili mazana ali kutendeka (700) ne pkhwizi ne mbudzi dzili zwiwulu zwili kutendeka (7 000).

¹²Ngono bakathama tjidumano tjekuti bashake Yahwe Ndzimu wa bobatategulu babo nge mimoyo yabo yose nenge meya dzabo dzose.

¹³Ngono ani kene ani unowolamba shaka Yahwe Ndzimu we Iziraela wakabe akafanila kuti abulawe hwola kene ntjetjana ali nlume kene nkadzi.

¹⁴Ngono bakamilidzila mahwi abo pezhugwi bakatuna kuna Yahwe kuti banowolondolodza tjidumano itjetji ngono bakamilidza mahwi belidza nyanga.

¹⁵Bose be Juda bakabe bakashatha ngoti bathama tjidumano itjetji nge mimoyo yabo yose. Bakashathila kunamata Yahwe ngono Yahwe bakabaamutjila ngono bakabapa kunyalala mu magalo wose, shango dzikasitjagwe nabo.

¹⁶Nanga kuku babe Maaka, Asa wakabadusa mu bumambokadzi ngoti bakabe bathama kunoshimisa ngothama ifano tje ndzimukadzi Ashera. Asa kakolomola ifano katji pkhwanya katjitemelela zwipithu pithu, katjipisila mu nkuku we Kidironi.

¹⁷Nenguba Asa asakakolomodza magalo wose magalo apezhugwi ekunamata e midzimu mu Iziraela, moyo uwe wakabe wakatambunuka mu mazhuba awe wose.

¹⁸Ngono wakazhisa ku Ng'umba ye Ndzimu zwipo zwakayengemala zwa tate babe kose ne zwizwe, zwipo zwe siliva ne golide ne zwimwe zwija.

¹⁹Kwakagala makole angabe makumi matatu ana bushanu (35) e mbuso wa Asa kusina ngwa.