Read Kalanga 2 Zwiyitikalo 16 Bible Online

2 Zwiyitikalo 16 - Kalanga bible

2 Zwiyitikalo 16

¹Nge gole le bumakumi matatu lina tathatu (36) le mbuso wa Asa, Bhaasha mambo we Iziraela kanonginilila Juda ngono kabaka Rama kuti ndizo kusibe ne unobhuda kene unongina kuna Asa mambo we Juda.

²Ipapo Asa katola siliva ne golide mu matula e Ng'umba ya Yahwe ne mu ng'umba ya mambo kazwiyisa kuna Bhenihadadi mambo we Siriya wakabe egala ku Damasiko eti,

³“Ngakube nge tjidumano pakati kwangu nawe koga sekwa kwakabe kuli iko pakati kwa tate bangu na tate babo. Ndakutumilila siliva ne golide. Ndizo ngwenu kolomola tjidumano tjitjo na Bhaasha mambo we Iziraela ngono ndizo aduse babhayani babe mu ntuthu wangu.”

⁴Bhenihadadi kateedza Asa ngono katumila balauli be babhayani babe kuti banonginilila mizi mikulu ye Iziraela. Bakakunda mizi ye Ijoni ne Dani ne Abele Maimu ne mizi mikulu ye mabiganyilo ye Nafutali.

⁵Ngono kwakati Bhaasha ehwa kuti kwashingikalani kamisa baka nzi we Rama kaletjedza nshingo uwe ukama.

⁶Mambo Asa kakubunganya bathu be Juda bose kuti basenge mabgwe ne mapango e Rama nzi wakabe ubakiwa ndi Bhaasha ngono bakanoshingisa ku matizhilo e Geba ne Mizipha.

⁷Mu tjibaka itjetjo Hanani we nlebesambeli kayenda kuna Asa mambo we Juda ngono kaswika kandwa kati, “Ngoti wakabe wakabiga muna mambo we Siriya ngono ukasigalebgwe Yahwe Ndzimu uwo ndizo ngwenu babhayani ba mambo we Siriya bakupudzumuka.

⁸Apa Baitopiya ne Balibhiya bakabe basina mibunga ye babhayani ne koloyi dze ngwa ne bataswi be mbizi banji kene? Koga kwakabe kuti ha ubiga muna Yahwe, bakabalonga mu maboko awo.

⁹Ngoti Yahwe banotjengeta shango yose kulakidza simba labo muna ibabo bakabiga mubali. Iwe wathama bulengwe ngono kudwa nasi unowogala mu ngwa.”

¹⁰Ikoko kukathama kuti Asa azhalile nlebesambeli bushongola ngono kansunga nge ketani kanlonga mu ng'umba ye busungwa. Asa katangisa tjose kubhata bamwe bathu nge bukukutu.

¹¹Mishingo ya Asa kudwa mu kutangisa kunoti ye bupelo yakakwagwa mu Thawu dza Bomambo be Juda ne Iziraela.

¹²Mu gole le bumakumi matatu ana zhanalume (39) le mbuso wa Asa, Asa katangisa kagwadziwa nge makumbo ngono bugwele gugwe gukakulila mbeli ngono ne mu tjibaka tje gwala kukwe azoshandukila kuna Yahwe ngono wakabe eshaka bhatsho ye dzi ng'anga.

¹³Ngono Asa kafa, wakafa mu gole le bumakumi manna ana ling'ompela (41) lekubusa kukwe.

¹⁴Bakanombiganya mu ikumbu tjaakabe azwikobolela itjo mu nzi nkulu wa Dafite, bakashingisa zwipayisi ne mafuta anonuhwa zwinozipa ngono bakabesa moto nkulukulu ili kunteta.