Read Kalanga 2 Zwiyitikalo 19 Bible Online

2 Zwiyitikalo 19 - Kalanga bible

2 Zwiyitikalo 19

¹Jehoshafati mambo we Juda kabgwilila ku nzi uwe ku Jerusalema nge mbakiso.

²Koga nlebesambeli Jehu nkololo wa Hanani kayenda kunonshanganidza ngono kadwa Mambo Jehoshafati kati, “Apa kwakafanila kubhatsha banothama mbipo ne kuda ibabo banobenga Yahwe kene? Ngekwa ikoku bushongola gwa Yahwe gowodelukila mukuli.

³Nenguba kwakajalo kuna bubuya gunowang'wa mu kuli ngoti wakakolomodza Ashera mu shango ngono ukazwimisila kushingila Yahwe.”

⁴Nenguba Jehoshafati akabe egala mu Jerusalema wakabe eyenda ku bathu kudwa mu Bheerisheba kunoti ku shango ye matombo ye Ifureimi ebashandusila kuna Yahwe Ndzimu wa bobatategulu babo.

⁵Wakabiga basumikilisi mu mizi mikulu ye matizhilo yose imu Juda,

⁶ngono kalaya basumikilisi eti, “Mube ne njele kwazo muna tjamunothama, muzibe kuti amutosumikilisila nthu koga mosumikilisila Yahwe, Yahwe ba namwi mukusumikilisa kwenyu.

⁷Ndizo ngwenu kutja Yahwe ngakube mu muli, ibeni nge njele muna tjamunothama ngobe akuna kulelekesa ndulamo muna Yahwe Ndzimu wedu kene kulelekela ntome kene kutola zwizwimba nlomo.”

⁸Pezhugwi kwa ipapo Jehoshafati wakabiga Balevi ne bapirisiti bamwe ne misholo ye misha ye Iziraela mu Jerusalema kuti bape busumikilisi bumo gwa Yahwe neku pedzisa ndebo. Bakabe begala ku Jerusalema.

⁹Ngono wakabalaya eti, “Mushinge ikoko ngotja Yahwe ne kugalikabgwe nenge mimoyo yenyu yose.

¹⁰Ndebo imwe ne imwe inozhisiwa kumuli idwa ku bathu bakanyi kwenyu bakabaka ku mizi yabo ipoga, ingabe ili ye kubulaya kene ye salondolodza nlayo makafanila kuti mu batjenjedze kuti basidwe bezwilonga mu nlandu mbeli kwa Yahwe kungathama kuti bushongola gwa Yahwe gudelukile mu muli ne mu bathu bakanyi kwenyu. Muthame saikoko ndizo amungatilikwe nlandu.

¹¹Ngono bonani, Amariya mpirisiti nkulu unamwi muna zose zwa Yahwe na Zebadiya nkololo wa Ishimaele nlauli we Juda banamwi muna zose zwa mambo, Balevi banowobepo kubona kuti zose zwe lubazhe zwadumigwana zoshingikadziwa. Shingani makasima, atshene Yahwe bangabe ne banoshinga ndulamo!”