Read Kalanga 2 Zwiyitikalo 20 Bible Online

2 Zwiyitikalo 20 - Kalanga bible

2 Zwiyitikalo 20

¹Shule kwaikoku, bathu be Moabu ne be Amoni ne bamwe be nshanganyila[5] bakazha kuwogwa na Jehoshafati.

²Ngono bamwe balume bakazha kuna Jehoshafati bakati, “Kwaswika mbunga usinshoma kudwa seli ye gungwa unodwa ku Edomu kowogwa namwi, batjibe mu Hazazonitamari kale!” Hazazonitamari ilimwe zina le Enigedi.

³Ngono Jehoshafati kapalukamoyo kwazo kabona kuti ashake gumbuludzo muna Yahwe kakale kalaula kuti kube ne kuzwinyima zojiwa mu Juda yose.

⁴Bathu be Juda bakakubungana kukumbila bhatsho muna Yahwe, mizi mikulu ikabuya kuwoshaka gumbuludzo muna Yahwe.

⁵Kudwapo Jehoshafati kamilika mbeli kwe gubungano le Juda ne Jerusalema lakabe lili pa tjibata tje Ng'umba ya Yahwe,

⁶ngono kabe eti, “Yahwe Ndzimu wa bobatategulu bedu, apa ate imwi Ndzimu ukudzimu kene? Apa ate imwi munolaula mibuso yose ye zwitjaba kene? Simba lose limu luboko gwenyu ngono kakale akuna ungama mbeli kwenyu.

⁷Awu Ndzimu wedu, apa ate imwi makatatila kutjena bagali be shango iyeyi mbeli kwe bathu benyu Baiziraela, muipa zwizekugwana ibo zwizekugwana zwa Abhurahama nkwinya wenyu kene?

⁸Ngono bakagala muili bakabakila zina lenyu bugalo gwakayengemala, beti,

⁹‘Ha bubi gungatiwila kene thumo kene kusumikilisiwa kene bugwele kene bhamba towozha mu Ng'umba iyeyi mbeli kwenyu ngobe zina lenyu limu ng'umba iyeyi, tikalilila kumuli mu buyendasi gwedu, ngono imwi mowohwa mukatitjidza.’

¹⁰“Koga ngwenu bonani bathu be Amoni ne Moabu ne Dombo le Seiri ibo bamusakaletja Iziraela ikabanginilila tjibaka Iziraela idwa ku shango ye Egipiti, ibo babakaleya bakasibalobese,

¹¹bonani, botjitiboka nge kuzha betola shango yamakatipa iyo ili thaka.

¹²Awu Ndzimu wedu modwa kuti amungabasumikilise kene? Atina simba le kulingisana ne babhayani bangapa batinginilila. Atitoziba kuti tithame tjini koga tolinga kumuli kutibhatsha.”

¹³Balume bose be Juda bakama mbeli kwa Yahwe, kose ne ngawana dzabo ne bakadzi babo ne bana babo.

¹⁴Kukati pakati gwe gubungano meya ya Yahwe ikadelukila muna Jahaziele nkololo wa Zekariya, Zekariya ali nkololo wa Bhenaya, Bhenaya ali nkololo wa Jeyele, Jeyele ali nkololo wa Mataniya, Jahaziele wakabe ali Nlevi we nsha wa Asafa.

¹⁵Ngono kalebeleka kati, “Bhulutanani imwi mose Bajuta na bose banogala mu Jerusalema na Mambo Jehoshafati! Yahwe bakati kumuli, ‘Musitje kakale musitemeke mafupa ngoti babhayani ibaba bali banjinji. Ngwa iyeyi ate yenyu koga ngeye Ndzimu.

¹⁶Mangwana delukilani ku bali kunobanginilila, bonani, ibo banowotathila nge matathilo e Zizi ngono mowobawana ku bupelo gwe nkuku, bhezhuba kwe tjilambanyika tje Jeruele.

¹⁷Akutowosheteka kuti mugwe ngwa iyeyi, imwi muswike mume nge mamo yenyu koga, mudzikame ngono mowobona kuti Yahwe banokunda tjini. Bathu be Juda ne Jerusalema wee! Musitje kene kuli kutemeka mafupa, mukani muyende mangwana, Yahwe banamwi.’ ”

¹⁸Ipapo Jehoshafati kathigama buso gugwe kwakakutha pasi ne Juda yose ne bagali bose be Jerusalema bakawa nge zwidwi mbeli kwa Yahwe benamata Yahwe.

¹⁹Balevi be Bakohati ne Bakora bakamilika bakakudza Yahwe Ndzimu we Iziraela nge mahwi apezhugwi.

²⁰Bakamuka bebinduka beyenda ku tjilambanyika tje Tekowa ngono bakati bemilika, betangisa gwendo Jehoshafati kama ngono kabe eti, “Munditeedze imwi bathu be Juda ne bagali be Jerusalema! Galanibgwe muna Yahwe Ndzimu wenyu ngono mowosima, galanibgwe mu balebesambeli babo ngono mowokunda.”

²¹Wakati apedza lebeleka ne bathu Jehoshafati kashalula balume kuti bambile Yahwe babakudze bali mu gudzo lakayengemala se bakabe bali mbeli kwe bhayani beti, “Kudzani Yahwe! Ngobe ludo gwabo gusingazunguzike gugelile tjatjose.”

²²Bakati betangisa kumba ne kukudza Yahwe, Yahwe bakakomba bathu be Amoni ne Moabu ne bagali be Dombo le Seiri bakabe bazha kuwonginilila bathu be Juda ngono bakabakunda.

²³Ngobe bathu be Amoni ne Moabu bakamukila bagali be Dombo le Seiri bakabalobesa tjoselele ngono bakati balobesa bagali be Seiri bakamukilana tjekwabo ngono bakalobesana.

²⁴Ngono babhayani be Juda bakati bazha pa thungamakole yakabe yakalingisana ne ku tjilambanyika kulingisana ne babhayani babo basi bashoma, bakawana kuli kuti bose bakakandalala pasi, kusina ndodwa ne limbelimbe.

²⁵Ndizo Jehoshafati ne babhayani babe bakati bezha kunotapa thundu yabo, bakawana matanga e ng'ombe ne thundu dze zwija ne zwiambalo ne zwimwe zwe ntengo upezhugwi ngono bakazwitolegwa izo kudzina bema pabanoshaka. Bakatola mazhuba ali matatu betuta ngoti kwakabe kuli kunjinji.

²⁶Mu zhuba le bunna bakanokubunganila pa Nkuku we Bheraka ngono ikoku bakakudza Yahwe, ndizo zina le pathu ipapo lakadang'wa kuyi Nkuku we Bheraka kuswikila nasi.

²⁷Kudwapo Jehoshafati katungamila balume be Juda ne Jerusalema mmwe ne mmwe kabgwilila ku Jerusalema akashatha ngobe Yahwe bakabe babashathisa ngokunda zwita zwabo.

²⁸Bakaswika ku Ng'umba ya Yahwe mu Jerusalema belidza zwilidzo zwe matende ne nyele ne nyanga.

²⁹Ngono kutja Ndzimu kukawila mibuso yose ye shango abehwa kuti Yahwe bakagwa ne zwita zwe Iziraela.

³⁰Ndizo mbuso wa Jehoshafati ukabe ne kunyalala ngobe Ndzimu wakabe wampa kunyaluluka kose koga.

³¹Ndizo Jehoshafati kabusa Juda. Wakabe ana makole ali makumi matatu ana bushanu (35) ha ebe mambo we Juda ngono kabusa mu Jerusalema kwe makole ali makumi mabili ana bushanu (25). Mmeyabe bakabe bedang'wa Azuba, Azuba ali nkololokadzi wa Shilihi.

³²Jehoshafati kangina mu thambo dza Asa tate babe, kasipambuke mu dzili kathama tjakabe tjakalulwama mbeli kwa Yahwe,

³³nenguba magalo apezhugwi e kunamata asakakolomogwa, bathu bakabe basinga namate Ndzimu wa bobatategulu babo nge mimoyo yabo yose.

³⁴Tjimwe ne tjimwe tjakashingwa ndi Jehoshafati kudwa tjose mu kutangisa kwe mbuso uwe kunoti ku bhelelo le mbuso uwe zwakakwagwa mu zwiyitikalo zwa Jehu nkololo wa Hanani izo zwakatshambisiwa mu Lukwalo gwa Bomambo be Iziraela.

³⁵Ngono shule kwa ikoku Jehoshafati kathama nshanganyila na Ahaziya mambo we Iziraela, Ahaziya wakabe ethama mbipo inotjenamisa.

³⁶Bakashanganyila kuthama zwikepe zwinoyenda ku Tashishi, bakathama zwikepe zwe gungwa be zwithamila ku mamilo e zwikepe e Eziyonigeberi.

³⁷Koga Eliezeri nkololo wa Dodavahu wakabe edwa ku nzi we Mareshahi kalebelambeli Jehoshafati nge kwako ngono kandwa kati, “Ngoti wathama nshanganyila na Ahaziya, Yahwe bawokolomola kose kwawathama.” Ngono zwikepe zwikafa kukasheta ne tjayenda ku Tashishi.