Read Kalanga 2 Zwiyitikalo 21 Bible Online

2 Zwiyitikalo 21 - Kalanga bible

2 Zwiyitikalo 21

¹Jehoshafati kafa katobela botate babe kabiganyiwa pakabiganyiwa bobatategulu babe mu nzi nkulu wa Dafite ngono Jehoramu nkololo uwe kabe iye inobusa.

²Jehoramu wakabe ana banung'una, bali bakololo ba Jehoshafati ibo bakabe bali bo Azariya na Jehiele na Zakhariya na Azariya na Mikaele na Shefatiya, bose ibaba bali bakololo ba Jehoshafati mambo we Juda.

³Tate babo bakabapa zwipo zwili zwinjinji kwazo zwe golide ne siliva ne zwimwe zwe ntengo upezhugwi kushangana ne matizhilo e mizi mikulu ye Juda koga kapa Jehoramu bushe ngoti wakabe ali iye mbano.

⁴Ngono Jehoramu kati asinotola itulo muna tate babe atjisima mutjili kabulaya banung'una babe bose nge thumo ne mamwe makombgwa e Iziraela.

⁵Jehoramu wakatangisa busa ana makole ali makumi matatu ana mabili (32), ngono wakabusa mu Jerusalema makole ali zhanakadzi.

⁶Jehoramu wakatshambabo pakatshamba bomambo be Iziraela be nsha wa Ahabu, ngoti wakabe akalobola nkololokadzi wa Ahabu. Jehoramu kathama mbipo mbeli kwa Yahwe.

⁷Nenguba kwakajalo Yahwe bakabe basingade kulobesa ludzi gwa Dafite, ngekwe tjidumano tjabakathama na Dafite, se bakabe ban'gadzabgwe kuti zwizekugwana zwizwe zowodwilila zwibusa nge kusingapele kose.

⁸Mu misi ye mbuso wa Jehoramu, Baedomu bakapandukila Juda, bakazwibigila mambo wabo.

⁹Ipapo Jehoramu kapinda ne balauli babe ne koloyi dzidze dzose dze ngwa bakamuka busiku bakanginilila Baedomu bakabe bakomba Jehoramu ne balauli babe be koloyi dze ngwa bakababulaya.

¹⁰Ndizo tjinga kudwa ipapo Baedomu bakapandukila mbuso we Juda kuswikila nasi. Mu misi iyeyo zwayo Libina na iyobo ikapanduka ngobe wakabe afupatila Yahwe Ndzimu wa bobatategulu babe.

¹¹Pezhugwi kwa ipapo wakabaka magalo anothigamigwa midzimu mu shango ye matombo ye Juda ngono katungamilila bathu be Jerusalema mukusagalikabgwe ngono kathama kuti Juda ilashike.

¹²Ngono kukazha lukwalo kuna Jehoramu gudwa kuna Elija nlebesambeli guti, “Koleba Yahwe Ndzimu wa Dafite tate babo bakati, ‘Ngobe auzotobela zila dza Jehoshafati tate babo kene dza Asa mambo we Juda.

¹³Koga wakatobela zila dza bomambo be Iziraela kakale wakatungamilila bathu be Juda ne be Jerusalema mu kusagalikabgwe koga se ng'umba ya Ahabu yakatungamilila Iziraela mu kusagalikabgwe kakale wakabulaya banung'una babo, bana be nsha wa tate babo ibo bakabe beyita mukuli.

¹⁴Ndizo ngwenu Yahwe babe pejo ne kukuloba bathu babo ne bana babo ne bakadzi babo ne thundu iyo yose,

¹⁵ngono iwe unowogwala kwakabangalala ugwadziwa nge bugwele gwe mabula kudza bugwele igogu guthama kuti mabula awo abhudile kuzhe kuko, bugwele gugo gowokula zhuba ne zhuba.’ ”

¹⁶Ngono Yahwe bakathama saikoku bakashongodza Jehoramu mu Bafilisitiya ne Baarabu bakabe begala pejo ne Baitopiya,

¹⁷ngono bakamukila Juda bakanoinginilila bakatola thundu dzabo dzose dzabakawana dze ng'umba ya mambo bakatapa bakadzi ba mambo ne bakololo ba mambo. Akuna ndodwa ne nkololo ng'ompela wa mambo wakasala kuzhe kwa Jehoahazi[6] wakabe ali kologwe.

¹⁸Ngono shule kwe zwithu izwezwi zose Yahwe bakaloba Jehoramu ngono kagwala bugwele gusingalapike gwe mabula.

¹⁹Ngono kwakati mazhuba eyenda kwe makole mabili asinopinda mabula awe katangisa kubhudila kuzhe eyikhwa ne bugwele ngono kafa ali muzogwadza zwikulu. Ngono bathu babe bakasipise bhuba le moto mu kunteta sekwa bakathamila botate babe.

²⁰Jehoramu wakabe ali makole ali makumi matatu ana mabili (32) aegala tjigalo tje bomambo ngono wakabusa makole ali zhanakadzi mu Jerusalema kafa kukabe kusina unon'hwila zogwadza. Bakanombiganyila ku nzi nkulu wa Dafite koga kusi ku zwikumbu zwa bomambo.