Read Kalanga 2 Zwiyitikalo 22 Bible Online

2 Zwiyitikalo 22 - Kalanga bible

2 Zwiyitikalo 22

¹Bagali be Jerusalema bakabiga Ahaziya kologwe tja Jehoramu mambo katola muna tate babe, se goko lakabe lazha ne Baarabu ku bukotokelo lakabe labulaya bakololo bose ba mambo bahwola.

²Ahaziya wakabe ana makole ali makumi manna ana mabili (42) aetangisa kubusa, wakabusa gole ling'ompela mu Jerusalema. Mmeyabe bakabe bali Athaliya bali mwana we mwana wa Omiri.

³Naiyebo wakatshamba pakatshamba be nsha wa Ahabu, ngoti mmeyabe ndibo bakabe bali nkumbuludzi uwe kuthama zwakabipa.

⁴Wakathama mbipo mbeli kwe mesho a Yahwe, koga sekwa kathama be nsha wa Ahabu ngobe kwakati shule kwe lufu gwa tate babe, ndibo bakabe bakumbuludzi babe muna zwaakathama.

⁵Naiko kabuya katobela gumbuludzo labo kuti azwishanganye na Joramu nkololo wa Ahabu mambo we Iziraela bayende banonginilila mambo we Siriya Hazaele ku Ramotigiliyadi. Ngono Basiriya bakakubadza Joramu.

⁶Joramu kabgwilila ku Jezirele kunozwiyengela hwubadzi dzaakawana ku Rama paakabe anogwa na mambo we Siriya. Ngono Ahaziya nkololo wa Jehoramu mambo we Juda kayenda kuna Joramu nkololo wa Ahabu ku Jezirele kunon'shola.

⁷Koga kwakabe kwabigwa ne Ndzimu kuti kuwa kwa Ahaziya kuzhe nge kunoshogwa kwa Joramu ndi Ahaziya, ngoti wakati eswika ikoku wakabhuda na Joramu kunoshangamidza Jehu nkololo wa Nimishi iye Yahwe bakabe banzhodza kuti alobese nsha wa Ahabu.

⁸Ngono kwakati Jehu atjaloba nsha wa Ahabu kawana makulukota e Juda ne bana be nkulu wa Ahaziya bakabe bayenda naye kunoshola Joramu ngono Jehu kababulaya.

⁹Ahaziya kanoshakiwa ngono kanowang'wa akabgwata ku Samariya, ngono kazhisiwa kuna Jehu ngono kambulaya. Koga bakambiganya beti ngoti wabe ali mwana we mwana wa Jehoshafati, iye wakabe eshingayilila kushingila Yahwe nge moyo uwe wose. Nsha wa Ahaziya wakabe usina iye unotubula kubusa mu bumo gugwe.

¹⁰Kwakati Athaliya mme ba Ahaziya bebona kuti nkololo wabo wafa, bakamilika bakabulaya bose be ng'umba ye bushe gwe Juda.

¹¹Koga Jehoshabeti nkololokadzi wa mambo katola Joashi nkololo wa Ahaziya, kankwiba mu bakololo ba mambo bakabe bowobulawa ngono kanlonga mu ng'umba ye buizelo ne mbhabhi uwe. Ngoti Jehoshabeti nkololokadzi wa Mambo Jehoramu kakale ali nkadzi wa Jehoyada we mpirisiti wakabe ali hazwadzi ya Ahaziya ngono kasumbikila Athaliya mwana kuti ndizo asimbulaye.

¹²Bakagala naye bakansumbika mu Ng'umba ye Ndzimu kwe makole ali tathatu Athaliya atjabusa shango.