Read Kalanga 2 Zwiyitikalo 23 Bible Online

2 Zwiyitikalo 23 - Kalanga bible

2 Zwiyitikalo 23

¹Koga kwakati mu gole le butendeka Jehoyada kasimisa moyo kathama tjidumano ne balauli be bali zana, Azariya nkololo wa Jehorahamu na Ishimaele nkololo wa Jehohanani na Azariya nkololo wa Obedi na Maaseya nkololo wa Adaya na Elishafati nkololo wa Zikiri.

²Ngono bakatendeleka ne Juda yose bekubunganya Balevi ne misholo yose ye misha ye Iziraela mu mizi mikulu yose ye Juda bakabazhisa ku Jerusalema.

³Ngono gubungano lose likathama tjidumano na mambo mu Ng'umba ye Ndzimu. Jehoyada kati ku bali, “Bonani nkololo wa mambo, ndiye unowobusa koga Yahwe sekwa bakaleba ngekwe zwizekugwana zwa Dafite.

⁴Ngono tjamakafanila shinga ndi etji: Imwi bapirisiti ne Balevi banoyenda benonyaluluka nge Sabata, bang'ompela mu butatu banowobe balindi be mikoba,

⁵bang'ompela mu butatu gumwe banowobe ku ng'umba ya mambo ngono bang'ompela mu butatu gumwe kakale banowobe balindi ku Nkoba we Thiwa ngono bathu bamwe bose bagale ku zwibata zwe Ng'umba ya Yahwe.

⁶Kushete wangina mu Ng'umba ya Yahwe kuzhe kwe bapirisiti ne Balevi banoshinga, ibo bangangina ngobe bakayengemala koga bathu bamwe bose batjengete yendiso ya Yahwe.

⁷Balevi bagale bakapoteleka mambo, mmwe ne mmwe akabhata thumo lile nge maboko, iye ungangina mu ng'umba abulawe. Mube na mambo abengina nebe bhuda.”

⁸Balevi ne bathu bose be Juda bakashingikadza tjimwe ne tjimwe tjabakadwiwa ndi Jehoyada we mpirisiti. Mmwe ne mmwe katola goko le balume babe bakabe bakafanila kuyenda ku Sabata kunonyaluluka bakabashanganya na ibabo bakabe bakafanila kuzha ku nshingo ne zhuba le Sabata, ngoti Jehoyada we mpirisiti wakabe asapaladza makupo.

⁹Ngono Jehoyada we mpirisiti kapa balauli be babhayani mathumo ne matati makulu ne matukununu akabe akabigwa mu Ng'umba ye Ndzimu ali a Mambo Dafite.

¹⁰Kabiga bathu bose kuti bagale bakalinda mambo nlume mmwe ne mmwe akabhata thumo mu maboko awe bakapoteleka ng'umba ne tjibeso tjinopisigwa zwibhayilo.

¹¹Kudwapo kadusila Joashi nkololo wa mambo kuzhe, bakan'ambadza tjiala tje bumambo, kampa ntutshi we nlayo ngono kaleba ha ali mambo. Jehoyada ne bakololo babe bakan'zhodza mafuta ngono bakabe beti, “Mambo ngabatjile tjibaka tjilefu!”

¹²Ngono Athaliya kahwa nsindo we bathu belabuka labuka bekudza mambo, ngono kayenda ku bathu mu Ng'umba ya Yahwe.

¹³Ngono wakati elinga kabona kuna mambo umile pa phanda iye ku nkoba ne balauli ne balidzi be nyanga bali mile hwunde naye ngono bathu bose bakabe bepululudza belidza nyanga ne bambi bakabhata zwilidzo zwabo bakatungamila nzano. Ngono Athaliya kapalula zwiambalo zwizwe emimila eti, “Bupanduki! Bupanduki!”

¹⁴Ngono kudwapo Jehoyada kazhisa balauli be babhayani kabe eti ku bali, “Mun'duse na pakati kwe zijana dze balisi ngono mmwe ne mmwe unogwisa kun'gwila abulawe nge thumo.” Ngoti mpirisiti wakabe ati, “Musimbulayile mu Ng'umba ya Yahwe.”

¹⁵Ndizo bakambhata ngono bakan'yisa kunonging'wa ku nkoba we mbizi we ng'umba ya mambo, ngono bakambulaila ipapo.

¹⁶Mpirisiti Jehoyada kathama tjidumano pakati kukwe ne bathu bose na Mambo Joashi kuti banowobe bathu ba Yahwe.

¹⁷Ipapo bathu bakamilika bose bakayenda ku Ng'umba ya Bhaale bakaikolomola. Bakapkhwanya zwibeso ne zwifano zwizwe zwikasala zwili zwikwetje kwetje, bebuya bebulaila mpirisiti wa Bhaale Matani mbeli kwe zwibeso.

¹⁸Jehoyada wakabiga balindi kulinda Ng'umba ya Yahwe bakatungamigwa ne Balevi be bapirisiti ne Balevi bakabe babigwa ndi Dafite kuti batjengete Ng'umba ya Yahwe kuti badusile Yahwe zwibhayilo zwinopisiwa sekwa kwakakwagwa mu Nlayo wa Mushe[7], bakathama beijalo ngoshatha bakabhata bemba koga sekwa kwakaleba Dafite.

¹⁹Johoyada kabiga balisi be mikoba ku mikoba ye Ng'umba ya Yahwe kuti kusiyite wangina muili ungadwa akatemapala nge zila imwe.

²⁰Wakatola balauli be babhayani bali zana ne banokudziwa ne balauli be bathu ne bathu bose bakapeleka mambo kudwa mu Ng'umba ya Yahwe betshamba bebhuda ne nkoba ukunotathila ku Ng'umba ya mambo. Ngono bakagadza Mambo Joashi mu tjigalo tje bumambo.

²¹Ndizo bathu bose be shango iyeyo bakashatha kwazo. Ngono nzi ukabe ne kunyalala, ngobe Athaliya wakabe abulawa nge thumo.