Read Kalanga 2 Zwiyitikalo 24 Bible Online

2 Zwiyitikalo 24 - Kalanga bible

2 Zwiyitikalo 24

¹Joashi wakatangisa kubusa ali makole ali kutendeka, ngono wakabusa mu Jerusalema makole ali makumi manna (40). Zina la mmeyabe lakabe liyi Zibiya bezwagwa mu nzi we Bheerisheba.

²Ngono Joashi kathama ndulamo mbeli kwa Yahwe mu tjibaka tjose tja Jehoyada we mpirisiti.

³Jehoyada wakanshakila bakadzi bali babili ngono kabe ne bakololo ne bakololokadzi.

⁴Shule kwa ikoku Joashi kapedza nkumbulo kuti unowolulwamisa Ng'umba ya Yahwe.

⁵Ngono wakakubunganya bapirisiti ne Balevi kabadwa kati, “Yendani ku mizi mikulu ye Juda mukubunganye mari mu Baiziraela bose kuti towomusa Ng'umba ye Ndzimu wenyu gole ne gole. Bonani kuti molibilidza kuthama ikoku.” Koga Balevi bakanonoka.

⁶Mambo bakadana Jehoyada ntungamili we bapirisiti ngono bakan'dwa bakati, “Ini usathama kuti Balevi badusise bathu be Juda ne be Jerusalema lukhetho gwakabigwa ndi Mushe nlanda wa Yahwe mbeli kwe gubungano le Iziraela gudusigwa nshasha we bushanganilo kene?”

⁷Bakololo ba Athaliya nkadzi iwouje mbiimbi bakabe bapkhwanya bakangina mu Ng'umba ye Ndzimu ngono bakashingisa zwija zwakayengemala bezwishingisa kuna bo Bhaale.

⁸Ngono nge ndaulo ya mambo bakathama Bhokisi bakalibiga kuzhe kwe nkoba we Ng'umba ya Yahwe

⁹Ngono bakazibisa bathu mu Juda ne mu Jerusalema kuti nthu mmwe ne mmwe wakafanila dusila Yahwe lukhetho gwakati Mushe nlanda we Ndzimu kabudza Baiziraela kuti gudusiwe tjibaka tjabakabe bali mu tjilambanyika.

¹⁰Ikoku kukashathisa makulukota ne bathu bose ngono bakazhisa lukhetho gwabo bakagulashila mu bhokisi kuswikilila bapelela.

¹¹Ngono kwakabe kuti Balevi abayisa bhokisi le lukhetho ku makombgwa a mambo ngono bakabe bebona kuti labe ne mari manjinji, nkwalili wa mambo ne nshingi we mpirisiti nkulu banowobe bedusa kose kumu bhokisi bekolibgwiliza ku magalo alo. Bakabe be shinga ikoku tjibaka ne tjibaka ngono bekubunganya mari asi mashoma.

¹²Ndizo mambo na Jehoyada bakapa batungamili be nshingo we Ng'umba ya Yahwe, bakatapa babezhi be mabgwe ne babezhi be mapulanka ne butale ne phangula kuti kumusiwe Ng'umba ya Yahwe.

¹³Ngono bose koga bakabe beshinga nge buzhalo bakamusa Ng'umba ye Ndzimu kudza isala ili sekwa yakabe ili iko mukutanga yakasima.

¹⁴Bakati bapedza bakatola mari akabe asala bakanoapa mambo na Jehoyada ngono nawo bakathama zwishingisiwa zwe Ng'umba ya Yahwe ne zwishingisiwa zwe nshingo we Ng'umba ya Yahwe ne zwinoshingisiwa mu zwibhayilo zwinopisiwa ne zwikutili ne zwimwe zwakathamwa nge golide ne siliva. Ngono mu bupenyu gwa Jehoyada zwibhayilo zwinopisiwa zwakabe zwipisiwa nge kusingapele mu Ng'umba ya Yahwe.

¹⁵Ngono Jehoyada kakwegula kabe ne makole manjinji ngono kafa, wakafa abe ne makole ali zana lina ali makumi matatu (130).

¹⁶Ngono bakanombiganya ku nzi nkulu wa Dafite na bomambo bamwe ngoti wakabe ashinga zwakanaka mu Iziraela eshingila Ndzimu nenge Ng'umba ye Ndzimu.

¹⁷Ngono kwakati Jehoyada asinofa makulukota e Juda kazha kuna Mambo Joashi ngono kabateedza.

¹⁸Ngono bathu bakasiya kunamata mu Ng'umba ye Ndzimu ya Yahwe, Ndzimu wa bobatategulu babo ngono bakatangisa kuthigamila midzimu, bethigamila ndzimukadzi Ashera. Ngono bushongola gwa Yahwe gukadelukila mu bathu be Juda ne Jerusalema ngekwe nlandu wabo.

¹⁹Nenguba Yahwe bakatumila balebesambeli kuti babatjenjedze kuti ndizo bashandukile ku bali, betendeka nge kwabo koga bathu ibo bakasibateedze.

²⁰Ngono kudwapo Meya ye Ndzimu ikadelukila muna Zakhariya nkololo wa Jehoyada we mpirisiti ngono kama pakatuthumala mbeli kwe bathu ngono kati ku bali, “Ndzimu unobhuzwa kuti ini mutjuluka milayo ya Yahwe kunothama kuti musibhudilile kene? Ngono ngoti makafupatila Yahwe na Yahwe bamufupatila.”

²¹Ngono bakalukila Zakhariya gwanga ngono nge ndaulo ya mambo bathu bakakikithidza Zakhariya nge mabgwe pa nsha we Ng'umba ye Ndzimu.

²²Saikoku Mambo Joashi wakabe atjikangang'wa kale ngekwe buthu gwa tate ba Zakhariya Jehoyada gwabakan'shingila ngono Zakhariya bakapelela bambulaya. Ngono Zakhariya wakati mukufa kukwe kaleba eti, “Atshene Ndzimu bangabona ngono babgwilizile.”

²³Ngono kwakati ku bupelo gwe gole babhayani be Basiriya bakamukila Joashi. Bakazha ku Juda ne Jerusalema ngono bakalobesa balauli bose ngono bakatapa thundu dzisishoma bedziyisa ku Damasiko.

²⁴Babhayani be Basiriya bakabe basimuni koga Yahwe bakathama kuti bakunde babhayani be Bajuta ngoti bathu bakabe bafupatila Yahwe Ndzimu wa bobatategulu babo. Nge zila iyeyo yakabe ili kuloba Joashi.

²⁵Ngono bakati bemilika pa nli bakansiya akakubala kwazo, balanda babe bakanlukila gwanga ngekwe lopa le nkololo wa Jehoyada we mpirisiti ngono bakambulaila pa bulawo gugwe. Ndizo kafa ngono bakambiganya mu nzi nkulu wa Dafite koga kasibiganyiwe ku zwikumbu zwa bomambo.

²⁶Ngono ibabo bakanlukila gwanga yakabe ili Zabadi nkololo we nkadzi we N'amoni Shimeyati na Jehozabadi nkololo we nkadzi we N'moabu Shimiriti.

²⁷Ndebeleko ye bakololo babe ne zwinjinji zwakalebgwa zwisakakwagwa nge kukwe nenge kumusa Ng'umba ye Ndzimu zwakakwagwa mu Tjeneso ye Lukwalo gwa Bomambo. Ngono Amaziya nkololo uwe kukabe iye unobusa.