Read Kalanga 2 Zwiyitikalo 25 Bible Online

2 Zwiyitikalo 25 - Kalanga bible

2 Zwiyitikalo 25

¹Amaziya wakatangisa kubusa ana makole ali makumi mabili ana mashanu (25), wakabusa makole ali makumi mabili ana ali zhanalume (29) mu Jerusalema. Zina la mmeyabe lakabe liyi Jehodani bedwa ku Jerusalema.

²Ngono Amaziya wakashinga bubuya mbeli kwa Yahwe koga asingashinge nge moyo uwe wose.

³Ngono wakati koga atjisima mu bushe kabulaya makombgwa akabe abulaya mambo ibo tate babe.

⁴Koga aazobulaya bana babo koga sekwa kwakakwagwa mu nlayo wa Mushe pa Yahwe pabakalaula beti, “Botate abatobulayigwa milandu ye bana babo ne bana abatobulayigwa milandu ya botate babo. Koga nthu mmwe ne mmwe unofila tjibi tjitje.”

⁵Amaziya wakakubunganya balume be Juda ngono kababiga nge misha ya botate babo bali pasi kwe balauli be bali tjiwulu (1 000) ne bebali zana (100) be Bajuda bose ne be Bhenjamini. Ngono kabala ibabo bakabe bana makole ali makumi mabili ne kuyenda pezhugwi ngono kawana ili kuti bakabe bali zwiwulu zwili mazana matatu (300 000) e balume bakabe bakalizanila ngwa, betubula bhata thumo ne dati.

⁶Pezhugwi kwa ibabo katapa babhayani bamwe bali zwiwulu zwili zana ling'ompela (100 000) bedwa mu Iziraela bakahiriwa nge talenta dze siliva dzili zana (100).

⁷Koga nlume we Ndzimu kazha kuna mambo kaswika eti, “Mambo, babhayani be Baiziraela basitongo yenda namwi ku ngwa, ngobe Yahwe abatebalimile ne Baiziraela nanga ibo Baifureimi.

⁸Nenguba mungayenda munogwa makasima ku ngwa, Ndzimu unowomukunda mbeli kwe zwita zwenyu. Ndzimu ndiwo unopa kukunda ne kukundiwa.”

⁹Amaziya kabhuzwa nlume we Ndzimu eti, “Ndithame tjini ngono nge talenta dze siliva dzili zana dzandapa babhayani be Baiziraela kene?” Nlume we Ndzimu kashandula eti, “Yahwe banotubula kukupa kupinda ikoku.”

¹⁰Ndizo Amaziya kadwa babhayani bakabe batapiwa kuti babgwilile ku mizi yabo. Ngono bakabgwilila ku mizi yabo bali zhele bushongola kwazo nge kwe balume be Bajuta.

¹¹Amaziya kasimisa moyo ngono katungamila bathu babe ngono bakayenda ku Nkuku we Mwenyu ngono bakabulaya balume be babhayani be Seiri bali zwiwulu zwili gumi (10 000),

¹²bakatapa bamwe bali zwiwulu zwili gumi (10 000) betjila ngono bakabatola bakabatathisa shongwe bakati babe pezhugwi kwe shongwe bakabasundila pasi bakanowila pasi bakasala bali zwitibhutibhu.

¹³Kwakati kutjakajalo balume be babhayani bakashandusiwa ndi Amaziya kuti basitongo yenda naye ku ngwa bakanonginilila mizi mikulu ye Juda kudwa mu Samariya kunoti ku Bhetihoroni ngono bakabulaya bathu bali zwiwulu zwili zwitatu (3 000) ngono bakatapa thundu isishoma.

¹⁴Ngono Amaziya wakati ebuya kugwa ne Baedomu kazha akasenga midzimu ye bathu be Seiri kaibiga kube midzimu iye ngono kaithigamila kaidusila zwibhayilo.

¹⁵Ngono ikoku kwakathama kuti Yahwe bazhale bushongola ngono bakatuma nlebesambeli kuna Amaziya ngono kaswika kan'dwa kati, “Ini uthigamila midzimu ya kong'wa ne tjidza bathu bayo mu simba lilo kene?”

¹⁶Koga wakati atjalebeleka Amaziya kangina mu nlomo kandwa kati, “Gala takakubiga lini kuti ube nkumbuludzi wedu? Uti tuu, ausingashake lufu gugo!” Ndizo nlebesambeli kanyalala koga kansiya ne dama linoti, “Ndoziba kuti Ndzimu wakazwimisila kukubulaya ngobe wakathama kose ikoku kakale walamba gumbuludzo langu.”

¹⁷Ipapo kukati limwe zhuba Amaziya awana gumbuludzo katumila dama kuna Joashi nkololo wa Jehoahazi, Jehoahazi ali nkololo wa Jehu, mambo we Iziraela kati, “Buya tilingisane.”

¹⁸Joashi mambo we Iziraela kashandula Amaziya mambo we Juda eti, “Kwakati tjimwe tjibaka denjana le mihwa ku Lebanoni likatumila dama ku nsida we Lebanoni liti, ‘Lobodza nkololo wangu nkololokadzi uwo, kukati kutjakajalo kukapinda tjibandana tjikatshamba denjana le mihwa.

¹⁹Ngwenu wakakunda Edomu dumbu, ndizo wali uzwikudza. Gala ku ng'umba iyo, ngobe kobhatshani kuzwidanila mbatsha iwe ne bathu babo kene.’ ”

²⁰Koga Amaziya kasiteedze, ngobe kwakabe kuli kuda kwe Ndzimu kuti Amaziya alongwe mu maboko e zwita zwizwe ngoti wakabe wonamata midzimu ye Baedomu.

²¹Ndizo Joashi mambo we Iziraela kamilika kayenda kunolingisana na Amaziya mambo we Juda mu ngwa ku Bhetishemeshi mu Juda.

²²Ngono Juda kakundiwa ne Iziraela, kwakati balume bose bakatizhila ku mizi yabo.

²³Joashi mambo we Iziraela wakatapa Amaziya mambo we Juda, nkololo wa Joashi, nkololo wa Ahaziya ku Bhetishemeshi ngono kan'yisa ku Jerusalema, ngono kaswika kaliga guma le Jerusalema kazhula nkoba ungabe thambo dzili mazana mabili (200), kudwa pa nkoba we Ifureimi kunoti ku nkoba uku ndzibo.

²⁴Katola golide ne siliva yose ne zwija zose zwaakawana mu Ng'umba ye Ndzimu ne fumwa yaakawana mu ng'umba ya mambo yakabe yakalindiwa ne zwizekugwana zwa Obediedomu, katapa kose ne bathu ngono kabgwilila ku Samariya.

²⁵Mambo Amaziya nkololo wa Joashi mambo we Juda wakatjila makole ali gumi lina mashanu (15) shule kwe lufu gwa Joashi nkololo wa Jehoahazi wakabe ali mambo we Iziraela.

²⁶Mishingo yose ya Amaziya kudwa mu kutangisa kunoti ku bupelo gwe mbuso uwe yakakwagwa mu Thawu dza Bomambo be Juda ne Iziraela.

²⁷Kudwa tjose tjibaka tjaakapandukila Yahwe bakanlukila gwanga mu Jerusalema. Kwakati kubupelo katizhila ku nzi nkulu we Lakhishi koga zwita zwizwe zwikantobela ngono zwikambulaila ko.

²⁸Itumbu tjitje tjakasengegwa ku Jerusalema nge mbizi ngono kanobiganyiwa ku zwikumbu zwa bomambo ku nzi nkulu wa Dafite.