Read Kalanga 2 Zwiyitikalo 29 Bible Online

2 Zwiyitikalo 29 - Kalanga bible

2 Zwiyitikalo 29

¹Hezekiya wakatangisa kubusa ana makole ali makumi mabili ana mashanu (25) ngono wakabusa makole ali makumi mabili ana makole ali zhanalume (29) mu Jerusalema. Mmeyabe bakabe bedang'wa Abija nkololokadzi wa Zakhariya.

²Wakathama ndulamo mbeli kwa Yahwe, wakatobela thambo dza batategulu babe Dafite.

³Mu gole le kutanga le mbuso uwe, mu mwedzi we kutanga, kazhula mikoba ye Ng'umba ya Yahwe ngono kaimusa.

⁴Wakazhisa bapirisiti ne Balevi ngono kabakubunganyila ku tjibata tjikunobhuda zhuba kwe Ng'umba ye Ndzimu,

⁵ngono kabadwa kati, “Munditeedze Balevi! Muzwitjenapadze mube mutjenapadza Ng'umba ya Yahwe Ndzimu wa bobatategulu benyu, muduse shambgwa yose mu bugalo gwakayengemala.

⁶Bobatategulu bedu bakabe ne kusagalikabgwe kakale bakathama mbipo mbeli kwa Yahwe Ndzimu wedu, bakabalashila kutjena bakasibe ne hanya ne magalo abo bepapha bebafupatila.

⁷Bakazhalila mikoba ye Ng'umba ye Ndzimu bakadzima mavone ayo, bakasipise motsha kene kudusa zwibhayilo mu bugalo gwakayengemala bedusila Ndzimu we Iziraela.

⁸Ndizo bushongola gwa Yahwe gwakadelukila mu Juda ne Jerusalema, ngono bakadzithama zwithu zwinopalusamoyo ne zwinotjenamisa sekwa munozwibonegwa nge mesho enyu.

⁹Bonani, botate bedu bakabulawa nge thumo, bana ne bakadzi bedu bakatogwa bakathamiwa basungwa.

¹⁰“Ngono ngwenu ndoshakathama tjidumano na Yahwe Ndzimu we Iziraela kuti ndizo bushongola gwabo gutileye.

¹¹Ngono ngwenu bakololo bangu musisimbapale ngobe Yahwe bakashalula imwi kuti ndimwi munowozha mbeli kwabo kubashingila ne kubapisila motsha.”

¹²Ipapo Balevi bakamilika; Mahati nkololo wa Amasayi na Jowele nkololo wa Azariya, kudwa mu bakololo be Bakohati kwakabe kuli bakololo ba Merari na Kishi nkololo wa Abidi na Azariya nkololo wa Jehaleleli, kudwa mu bakololo be Bagereshoni kwakabe kuli Joahi nkololo wa Zima na Edeni nkololo wa Joahi,

¹³kudwa mu bakololo ba Elizafani kwakabe kuli Shimiri na Jeuele, kudwa mu bakololo ba Asafa ndi Zakhariya na Mataniya,

¹⁴kudwa mu bakololo ba Hemani kwakabe kuli Jehiele na Shimeyi, kudwa mu bakololo ba Jeduthuni kwakabe kuli Shemaya na Uziele.

¹⁵Bakakubunganya bamwe babo bakazwitjenapadza ngono bakangina koga mambo sekwa bakalaula nge matama a Yahwe, kuti kutjenapadziwe Ng'umba ya Yahwe.

¹⁶Ipapo bapirisiti bakangina mu Ng'umba ye Ndzimu kuitjenapadza ngono bakadusila kuzhe zose zwakatemapala zwabakawana mu Ng'umba ya Yahwe bezwidusila ku nsha we Ng'umba ya Yahwe ngono Balevi ibo bekowozwitola bezwisengela ku nkuku we Kidironi.

¹⁷Bakatangisa kuyengemadza ng'umba mu zhuba le kutanga le mwedzi we kutanga ngono mu zhuba le buzhanakadzi le mwedzi iwoyu bakaswika pa nsha wa Yahwe umbeli ku nkoba, bakayengemadza Ng'umba ya Yahwe ngono bakati mu zhuba le bugumi lina tathatu (16) le mwedzi we kutanga bakawidza.

¹⁸Balevi bakayenda kuna Hezekiya ngono bakaswika bakan'dwa bakati, “Tatjenapadza Ng'umba ya Yahwe yose ne tjibeso tjinopisigwa zwibhayilo ne zwishingisiwa zwatjo zose ne tafuli ye tjiwunga ne zwishingisiwa zose zwayo.

¹⁹Tabuza zwishingisiwa zose zwakati zwikatogwa ndi Mambo Ahazi tjibaka atjabusa asingagalikebgwe ku Ndzimu ngono naizo tazwitjenapadza. Zose zwimbeli kwe tjibeso tjinopisigwa zwibhayilo tja Yahwe.”

²⁰Tjimuka Hezekiya mambo kabinduka kakubunganya makulukota e nzi nkulu ngono bakayenda bose ku Ng'umba ya Yahwe.

²¹Bakadusa mikono ili kutendeka ne nyundo dzili kutendeka ne pkhwizana ndume dzili kutendeka ne mbudzi ndume dzili kutendeka, bedzidusa dzili tjibhayilo tje tjibi be tjidusila mbuso ne bugalo gwakayengemala gwe Juda. Mambo wakabe adwa bapirisiti ibo zwizekugwana zwa Aroni kuti badusile zwibhayilo izwezwi pa tjibeso tjinopisigwa zwibhayilo tja Yahwe.

²²Ndizo bakabhaya mikono ngono bapirisiti bekotola malopa ayo bebebenyasa malopa mu tjibeso tjinopisigwa zwibhayilo, bakabhaya nyundo ngono malopa adzo kanyasiwa mu tjibeso tjinopisigwa zwibhayilo, kudwapo bakabhaya phkwizana ngono malopa adzo akanyasiwa mu tjibeso tjinopisigwa zwibhayilo.

²³Mbudzi dze tjibhayilo tje tjibe dzakazhisiwa mbeli kwa mambo ne gubungano ngono bakabiga maboko abo mudzili.

²⁴Bapirisiti bakadwapo bakabhaya mbudzi idzedzi bekowozhisa malopa adzo ku tjibeso tjinopisigwa zwibhayilo dzili tjibhayilo tje gadzanyo ne Baiziraela bose ngoti mambo wakabe ati kudusiwe tjibhayilo tjinopisiwa ne tjibhayilo tje tjibi tjili tje Baiziraela bose.

²⁵Mambo kabiga Balevi nge mamo abo mu Ng'umba ya Yahwe bakabhata matende ne zwilidzo zwe dzisimbali koga Dafite sekwa akaleba nge mboni wa Mambo Gadi nenge nlebesambeli Nathani, ngoti ndaulo yakabe idwa kuna Yahwe nge balebesambeli babo.

²⁶Ndizo Balevi bakama zubuyanana nge zwilidzo zwa Dafite bapirisiti naibo bakabhata nyanga dzabo.

²⁷Ipapo Hezekiya kadusa ndaulo kuti kudusiwe tjibhayilo tjinopisiwa mu tjibeso tjinopisigwa zwibhayilo. Kwakati kutangisiwa dusiwa tjibhayilo njimbo dza Yahwe dzikatangisa bo kulidziwa nyanga ne zwilidzo zwa Dafite mambo we Iziraela.

²⁸Gubungano lose likathigama likanamata ha bambi ibo bakabhata bemba be nyanga belidza nyanga, bakadwilila koga kudza kupisa zwibhayilo kwapela.

²⁹Kwakati kupisa zwibhayilo kwapela mambo na bose bakabe bali ipapo bakathigama bakanamata.

³⁰Hezekiya mambo ne makulukota awe bakadwa Balevi kuti bambile Yahwe njimbo dzinokudza nge matama a Dafite na Asafa mboni. Ndizo bakamba njimbo dzinokudza ngekushatha ngono bakawa nge zwidwi benamata.

³¹Ipapo Hezekiya kati, “Matjizwipa kuna Yahwe. Sedzelani pejo muzhise zwibhayilo ne zwipo zwe mboko ku Ng'umba ya Yahwe.” Gubungano likazhisa zwibhayilo ne zwipo zwe mboko ne zwipo zwakabe zwidusiwa ne moyo ntjena zwili zwibhayilo zwinopisiwa.

³²Bakazhisa mikono ili makumi ali kutendeka (70) ne nyundo dzili zana (100) ne pkhwizana dzili mazana mabili (200) zose zwili zwibhayilo zwinopisiwa zwipisigwa Yahwe.

³³Zwithuwo zose zwakabe zwadusiwa zwili zwibhayilo zwakabe zwili mazana ali tathatu (600) e mikono ne pkhwizi ne mbudzi dzili zwiwulu zwitatu (3 000).

³⁴Koga bapirisiti bakabe bali bashomanana kuviya zwithuwo zose zwe zwibhayilo zwinopisiwa ndizo makamu abo Balevi bakababhatsha kuswikila nshingo wawila, ngobe Balevi bakabe bakatambunuka kwazo mu mimoyo kupinda bapirisiti bakabe bazwitjenapadza.

³⁵Kuzhe kwe zwibhayilo zwinopisiwa zwinjinji kwakabe kuna mafuta e zwipo zwe mbakiso ne zwipo zwe zwing'o. Ndizo kunamata mu Ng'umba ya Yahwe kukatangisa kakale.

³⁶Hezekiya ne bathu bose bakashatha kwazo muna tjabathamigwa ne Ndzimu ngoti tjimwe ne tjimwe tjakashingwa tjinyolotjo.