Read Kalanga 2 Zwiyitikalo 3 Bible Online

2 Zwiyitikalo 3 - Kalanga bible

2 Zwiyitikalo 3

¹Ipapo Solomoni katangisa kubaka Ng'umba ye Ndzimu mu Jerusalema pezhugwi kwe Dombo le Moriya, ipo Yahwe pa bakazwilakidza kuna Dafite tate babe, pathu pakabe palulwamisiwa ndi Dafite, pa lutombo gwa Orinani we Njebusi.

²Wakatangisa kubaka mu zhuba le bubili le mwedzi we bubili we gole le bunna le busa kukwe.

³Ng'umba ye Ndzimu yakabe ibakiwa ndi Solomoni yakabe ili ye bulefu gwe matshambo ali makumi ali tathatu (60) ngono bupabi ili matshambo ali makumi mabili (20) kuyendidzana ne tjilizanyo tja ntolo.

⁴Pa nkoba we Ng'umba ye Ndzimu kwakabe kuli ng'umbana ye bulefu gunolizana nge bupabi gwayo guli thambo dzili makumi mabili (20), kuyenda pezhugwi yakabe ili bulefu gunobhata makumi mabili (20). Mukati kwakabe kwakadzulugwa nge golide mbuyanana.

⁵Wakawalila ng'umba hwulu ne zwizhalilo zwe misipuri, kaibuwa ne golide mbuyanana kainakisa nge zwifano zwe nlala ne zwe ketani.

⁶Wakanakisa Ng'umba ye Ndzimu nge mabgwe akanaka, golide yakabe ishingisiwa yakabe ili ye Paravaimu.

⁷Wakadzulula ng'umba nge golide, edzulula makwasayile ayo ne mbalilo dzayo ne makuma ayo ne mikoba yayo kakale kanyamba zwifano zwe dzikherubhu mu makuma.

⁸Wakabaka Bugalo gwakayengemala kupindisa bulefu gwago guyenda nge bupabi gwe Ng'umba ye Ndzimu ngono guli thambo dzili makumi mabili (20) bupabi gwago guli thambo dzili makumi mabili (20) ngono kadzulula guma lago nge golide ye dzitani dzili makumi mabili ana bushanu

⁹ne zwipikiri zwe golide zwe bulemo gwe shekele dzili makumi mashanu ne ng'umbana dzi pezhugwi dzakabe dzakadzulugwa nge golide.

¹⁰Mu Bugalo gwakayengemala kupindisa wakabezha dzikherubhu dzili mbili ngono kadzidzulula ne golide.

¹¹Bulefu gwe mapapilo e dzikherubhu gwakabe guli thambo dzili makumi mabili wose, bhapilo le kherubhu ye kutanga lakabe lili bulefu gwe thambo dzili shanu likutha guma le ng'umba, bhapilo limwe le bulefu gwe thambo dzili shanu lakabe likutha bhapilo limwe le kherubhu imwe.

¹²Bhapilo le kherubhu ye bubili lakabe lili bulefu gwe thambo dzili shanu likutha guma limwe le ng'umba, limwe bhapilo lalo lakabe lili bulefu gwe thambo dzili shanu likutha bhapilo le kherubhu ye kutanga.

¹³Mapapilo e dzikherubhu idzedzi akabe akatendebuka kwe thambo dzili makumi mabili (20), dzakabe dzilimile nge makumbo dzakalinga ku ng'umba hwulu.

¹⁴Wakathama tjisitilo tje bugalo gwakayengemala kupinda magalo wose akayengemala nge jila le mbala we gova ne mbala we bushaba gwakabondelela ne shaba ne jena, kanyamba zwifano zwe dzikherubhu mulili.

¹⁵Mbeli kwe Ng'umba ye Ndzimu wakathama phanda dzili mbili dze bulefu gwe thambo dzili makumi matatu ana bushanu (35) dzina misemo yakanakisiwa kwe thambo dzili shanu pezhugwi kwe phanda imwe ne imwe.

¹⁶Wakathama ketani kadzibiga pezhugwi kwe misemo ye phanda kathama dzipomegiranate dzili zana (100) kadzibiga pezhugwi kwe ketani.[2]

¹⁷Wakatshila phanda mbeli kwe Ng'umba ye Ndzimu, imwe phanda ili ku burwa imwe ili ku bunandzwa, phanda iku burwa idang'wa Jakini[3] iku bunandzwa iyo idang'wa Bhoazi.[4]