Read Kalanga 2 Zwiyitikalo 33 Bible Online

2 Zwiyitikalo 33 - Kalanga bible

2 Zwiyitikalo 33

¹Manase wakabe ana makole ali gumi lina makole mabili (12) tjibaka tjaakatangisa busa, wakabusa kwe makole ali makumi mashanu ana makole mashanu (55) mu Jerusalema.

²Wakathama mbipo mumesho a Yahwe, etobela zwiyito zwakabipa zwe zwitjaba zwakabe zwatatiwa na Yahwe bezwitatila kutjena ne Baiziraela.

³Wakamusa magalo apezhugwi akabe akolomogwa ndi tate babe Hezekiya kakale kamusa zwibeso zwa bo Bhaale, kamisa phanda dze ndzimukadzi Ashera, kanamata zose zwe zhuzhugwi.

⁴Wakabaka zwibeso zwe midzimu mu Ng'umba ya Yahwe, ipo Yahwe pa bakati, “Zina langu lowogalila tjatjose mu Jerusalema.”

⁵Mu zwibata nge bubili zwe Ng'umba ya Yahwe wakabaka zwibeso kuti kuthigamigwe midzimu ye nyenyedzi

⁶Wakapisa bakololo babe ebathama zwibhayilo mu nkuku we nkololo wa Hinomi, kathama mishingo ye malipa neye midzimu eshinga ne mashabi ne baloyi. Wakathama mbipo isi shoma mu mesho a Yahwe ngono kathama kuti bazhale bushongola.

⁷Wakabiga ifano tje ndzimu wakabezhiwa mu Ng'umba ye Ndzimu, iyo Ndzimu yawakadwa Dafite na Solomoni nkololo uwe uti, “Mu Ng'umba iyeyi, ne mu Jerusalema iyo yandakashalula mu zwitjaba zose zwe Iziraela, ndowobiga zina langu muili nge kusingapele,

⁸kakale anditowothama kuti Baiziraela babhude mu shango yandakapa bobatategulu babo, koga ha bangabe ne njele bakalondolodza tjandakababudza kakale bakalondolodza milayo yabapiwa ne nlanda wangu Mushe.”

⁹Koga Manase kapambusa bathu be Juda ne bagali be Jerusalema, bakathama bubi gunopinda gwe zwitjaba izo Yahwe zwabakalobesa mbeli kwe bathu be Iziraela.

¹⁰Ngono Yahwe bakalebeleka na Manase ne bathu babe koga bakasiteedze.

¹¹Ndizo Yahwe bakazhisa balauli be babhayani be ngwa ya mambo we Asiriya bakabhata Manase nge zwiweko ngono bakansunga nge ketani dze phangula ngono bakan'yisa ku Bhabhiloni.

¹²Mukudziyidzika kukwe kazwiyisa pasi ngono kashandukila kuna Yahwe Ndzimu uwe kakumbila bhatsho.

¹³Wakabatembezela, ngono Yahwe bakahwa tjililo tjitje ne kukumbila kukwe ngono bakan'yisa kakale ku Jerusalema ku mbuso uwe. Ipapo Manase kaziba kuti Yahwe Ndzimu.

¹⁴Shule kwa ikoku Manase kabaka guma litja kuzhe kwe nzi nkulu wa Dafite kapapha bulefu gwe guma litja kuzhe le nzi nkulu wa Dafite kunomila zhuba kwe Gihoni ku nkuku kunoti ku Nkoba we Hwobe ngono kalipoteledza Ofele. Kabiga balauli be babhayani mu mizi ye matizhilo mu Juda.

¹⁵Kadusa midzimu ne ifano tjaakabe abiga mu Ng'umba ya Yahwe kakolomola kose ne zwibeso zwaakabe abaka mu duthu lakabe lili ilo lakabakwa Ng'umba ya Yahwe ne zwimwe mu magalo mamwe mu Jerusalema, katola zwithu izwezwi zose kanozwilashila kuzhe kwe nzi nkulu.

¹⁶Kudwapo kamusa tjibeso tjinopisigwa zwibhayilo tja Yahwe ngono kadusila zwibhayilo mutjili zwili zwibhayilo zwe mbakisano ne zwe mboko ngono kalaula Juda kuti bashingile Yahwe Ndzimu we Iziraela.

¹⁷Ne kwakajalo bathu ibo bakadwilila koga bedusila zwibhayilo mu magalo a pezhugwi koga bepisila Yahwe Ndzimu wabo.

¹⁸Zose zwe mishingo ya Manase ne ntembezelo uwe ku Ndzimu ne matama e balebesambeli bakabe belebeleka naye mu zina la Yahwe Ndzimu we Iziraela zose zwakakwagwa mu Zwiyitikalo zwabo Mambo be Iziraela.

¹⁹Ntembezelo uwe ne Ndzimu sekwa wakadabila ntembezelo uwe ndiko ne ndongoloso ye jinyo laakathama asathu ashanduka, mbipo yose yaakathama ne magalo a pezhugwi aakabaka ne zwifano zwe ndzimukadzi Ashera zwaakathama kuti zwithigamigwe zose zwakakwagwa mu Thawu dze Balebesambeli.

²⁰Manase kafa, kabiganyiwa mu ng'umba ye bushe ngono nkololo uwe Amoni kan'gala thaka.

²¹Amoni wakabe ana makole ali makumi mabili (22) tjibaka tjaakatangisa busa, wakabusa makole ali mabili mu Jerusalema.

²²Wakathama mbipo mbeli kwa Yahwe, sa tate babe Manase. Amoni wakabe ethigamila kakale edusila midzimu yakabe yathamwa ndi Manase zwibhayilo.

²³Koga iye aazothama sa tate babe, azozwiyisa pasi mbeli kwa Yahwe kene kuli kushandukila ku bali. Wakabe mbi kupinda tate babe.

²⁴Balanda ba Amoni bakan'lukila gwanga kuti bambulaye mu ng'umba iye ye bushe.

²⁵Koga bathu be Juda bakabulaya bose bakabe balukila mambo gwanga, koga bakabiga Josiya nkololo kube mambo.