Read Kalanga 2 Zwiyitikalo 36 Bible Online

2 Zwiyitikalo 36 - Kalanga bible

2 Zwiyitikalo 36

¹Bathu be shango ye Juda bakashalula Jehoahazi nkololo wa Josiya ngono bakambiga mambo mu Jerusalema shule kwa tate babe.

²Johoahazi wakabe ana makole ali makumi mabili ana matatu (23) tjibaka tjaakatangisa busa, ngono wakabusa mimwedzi ili mitatu mu Jerusalema.

³Mambo Neko we Egipiti wakansunga kanthama nsungwa kakale kathama kuti bathu be Juda balipe tjilizanyo tje seme dze siliva dzili zwiwulu zwitatu zwina mazana manna (3 400) ne tjilizanyo tje seme dze golide dzili makumi matatu ana dzili nna (34).

⁴Mambo Neko wakabiga Eliyakimu nnung'una wa Jehoahazi kube mambo we Juda ne Jerusalema ngono akashandula zina la Eliyakimu kube Jehoyakimu. Koga katola nkulu wa Eliyakimu Jehoahazi, kan'yisa ku Egipiti.

⁵Jehoyakimu wakabe ali makole ali makumi mabili ana mashanu ha ebigwa mambo mu Jerusalema wakabusa makole ali gumi lina ling'ompela. Wakathama mbipo mu mesho a Yahwe Ndzimu uwe.

⁶Mambo Nebukadineza mambo we Bhabhiloni kanginilila Juda katola Jehoyakimu kansunga nge dziketani dze phangula kan'yisa ku Bhabhiloni.

⁷Nebukadineza wakatola zwimwe zwija zwe Ng'umba ya Yahwe ngono kanozwibiga ku ng'umba iye ye ntembezelo ku Bhabhiloni.

⁸Tjimwe ne tjimwe tjakathamwa ndi Jehoyakimu na zose zwinoshimisa zwaakathama ne zwaakatilikwa nlandu, bonani zwakakwagwa mu Lukwalo gwa Bomambo be Iziraela ne Juda. Nkololo uwe Jehoyakini kan'gala thaka.

⁹Jehoyakini wakabe ana makole ali gumi lina zhanakadzi (18) paakabe mambo we Juda ngono kabusa Jerusalema kwe mimwedzi mitatu ne mazhuba ali gumi. Na iyebo kathama mbipo mu mesho a Yahwe.

¹⁰Ngono mu tjilimo Mambo Nebukadineza katolela Jehoyakini ku Bhabhiloni ali nsungwa ngono katola zwija zose zwe Ng'umba ye Ndzimu. Nebukadineza ngono kabiga nnung'una uwe Zedekiya mambo we Juda ne Jerusalema.

¹¹Zedekiya wakabe ana makole ali makumi mabili ana gole (21) tjibaka tjaakabe mambo, wakabusa makole ali gumi lina gole mu Jerusalema.

¹²Zedekiya wakathama mbipo mbeli kwa Yahwe kakale aazozwiyisa pasi kwe nlebesambeli Jeremiya iye wakabe eleba dama la Yahwe.

¹³Zedekiya wakapandukila Mambo Nebukadineza iye wakabe ankombeledza kutuna nge zina le Ndzimu. Kathama bukomba tjose kalamba kushandukila kuna Yahwe Ndzimu we Iziraela.

¹⁴Kakale, batungamili be Juda ne bapirisiti ne bathu bo bakatobela zila dze mbipo dze be zwitjaba zwakabapoteleka ngo thigamila midzimu ngono ngekwa ikoku bakatemapadza Ng'umba ye Ndzimu iyo Yahwe nge kwabo yabakabe bayengemadza.

¹⁵Yahwe Ndzimu wa bobatategulu babo bakatumila batumwa ku bali be paphulula ngoti bakabe bana ngoni mu bathu babo ne nge mu Ng'umba ye Ndzimu.

¹⁶Koga bakadadila batumwa be Ndzimu bakalingila pasi matama e Ndzimu ne kuseka balebesambeli kudzina bushongola gwa Yahwe mu bathu babo gukakula kwakasala kusitjina kuti bangatini.

¹⁷Ndizo Yahwe bakazhisa mambo we Khaladiya kuti ewobanginilila, bakabulaya bazhuzha be Juda ne bakabe bali ku bugalo gwakayengemala, akuna waakasiya nlume kene nkadzi bahwola kene batjetjana. Ndzimu wakabalonga mu maboko a Nebukadineza.

¹⁸Mambo we Khaladiya katapa zwithu zose zwe Ng'umba ye Ndzimu, wakatola kose kwakabe kuli mu matula ne fumwa yose ya mambo ne makulukota abo ngono bakatolela tjimwe ne tjimwe ku Bhabhiloni.

¹⁹Wakapisa Ng'umba ye Ndzimu ne nzi nkulu ne ng'umba dzose dze bushe ne fumwa yadzo kakolomola makuma e Jerusalema.

²⁰Katapila malimbelimbe akabe apudzumuka mu thumo ku Bhabhiloni ngono kaswika kabathama balanda babe ne be bakololo babe kudzina kuswika mbuso we Pheshiya.

²¹Shango ikashathila bo Sabata bayo, ikanyaluluka mu mazhuba wose ayo ekuthukudzika, kudzina makole ali makumi ali kutendeka (70) awila, kuthamila kuti matama a Yahwe akalebgwa ndi Jeremiya asiwile pasi.

²²Mu gole le kutanga le mbuso wa Sirasi mambo we Pheshiya, dama la Yahwe, lakabe lalebgwa nge nlomo we nlebesambeli Jeremiya, Yahwe bakathama kuti lishingikadziwe saikoku. Yahwe bakamusa meya ya Sirasi kuti azibise ndaulo iyeyi mu mbuso uwe wose, abuye aikwale:

²³“Woku ndiko kunolebgwa ndi Sirasi mambo we Pheshiya eti, ‘Yahwe, Ndzimu we kudzimu, bakandipa mibuso yose ye shango, bakandishalula kuti ndibabakile ng'umba yabo ku Jerusalema mu Juda. Ha kuna mmwe we bathu bawo pakati kwenyu, Ndzimu uwe ngaube naye, ngono ayende ku Jerusalema.’ ”