Read Kalanga 2 Zwiyitikalo 4 Bible Online

2 Zwiyitikalo 4 - Kalanga bible

2 Zwiyitikalo 4

¹Mambo Solomoni kathama tjibeso tjinopisigwa zwibhayilo nge phangula tje bulefu gwe thambo dzili makumi mabili (20) ne bupabi gwe thambo dzili makumi mabili (20) ne bulefu kuyenda pezhugwi gwe thambo dzili gumi.

²Wakabumba bhavu gulugulu linodang'wa gungwa nge phangula, kudwa pezhugwi kuyenda pasi lili thambo dzili mbili dzina ipithu tje bubili mu gumi (2.2),

³kusi kwe milomo yalo kukabe kuna mabundo e phangula akalipoteleka ali mizila mibili, lakabe lakateyegwa pezhugwi kwe misemo ye zwifano zwe mikono kuli poteleka.

⁴Bhavu lakabe lakateyegwa pezhugwi kwe misemo ye zwifano zwe mikono ye phangula ili gumi lina ili mibili, mitatu yakalinga ku bunadzwa, mitatu yakalinga ku golombedzo, mitatu yakalinga ku burwa, mitatu yakalinga ku bhezhuba, kushule kwe mikono kwakabe kuli kusi kwe tanka kuyendila pakati kwayo.

⁵Bukodu gwayo gwakabe guli dzithambo dzili makumi ali kutendeka ana kushanu (75). Milomo yayo yakabe yakathamwa se kopi, inga luba linoyi lili, yakabe izhadziwa nge lithara dzingabe zwiwulu zwili makumi manna (40 000).

⁶Wakathama mabhavu anosukila ali gumi ngono mashanu bakaabiga ku burwa mamwe mashanu bakaabiga ku bunandzwa. Mabhavu iyawa akabe esukila zwishingisiwa zwe zwibhayilo zwinopisiwa koga vula imu tanka yakabe ili inongula ne bapirisiti.

⁷ Wakathama zwigadziko zwe mavone zwili gumi nge golide kuyendidzana nge sekwa kwakayi zwibigwe mu Ng'umba ye Ndzimu, zwili zwishanu ku burwa ne zwili zwishanu ku bunandzwa.

⁸Wakathama tafuli dzili gumi ngono akadzibiga mu ng'umba, dzili shanu ku burwa ne dzili shanu ku bunandzwa. Wakathama kakale zwikutili zwe golide zwili zana zwinoshingisiwa kunyasa.

⁹Wakathama lubazhe gwe bapirisiti ne lubazhe bukulu ne matendele e lubazhe ngono kadzulula matendele nge phangula,

¹⁰kabiga tanka ye vula ku theswi iku burwa kuyendila ku bhezhuba burwa.

¹¹Kakale Huramu kathama hali ne maharawo ne zwikutili. Ndizo Huramu kabe apedza nshingo wose waakathamila Mambo Solomoni mu Ng'umba ya Yahwe.

¹²Zwaakathama ndiyezwi: Phanda mbili ne ndilo hwulu mbili dze mishogwana ipezhugwi kwe phanda ne njanga mbili kufukidza ndilo hwulu mbili dzina mishogwana yakabe ili pezhugwi kwe phanda.

¹³Kakale kathamila njanga mbili pomegiranati dzili mazana ali manna (400), ethamila gwanga limwe ne limwe mizila ili mibili ye pomegiranati, kufukidza ndilo hwulu mbili dze mishogwana yakabe ili pezhugwi kwe phanda.

¹⁴Wakathama zwigadziko ne mabhavu azo anongulila kaabiga pezhugwi kwazo.

¹⁵Kathama tanka ye vula ne mikono ili gumi lina ili mibili (12) yakateegwa tanka ye vula pezhugwi kwayo.

¹⁶Hali ne maharawo ne zwikutili ne zwija zose Huramu zwaakathamila Mambo Solomoni mu Ng'umba ya Yahwe zwakabe zwili zwe phangula yakapenyesiwa.

¹⁷Mu lubala gwe gwizi gwe Jorodani mambo kazwitebulila pa vu le ntapkhwi pakati kwe Sukoti ne Zereda.

¹⁸Solomoni kathama zwithu zose izwezwi zwinji kusina ungatubula ziba kuti kwakashingisiwa phangula ingapani.

¹⁹Ndizo Solomoni kathama zwija zose zwimu Ng'umba ya Yahwe, tjibeso tjinopisigwa zwibhayilo tje golide ne tafuli ye golide ye tjiwunga tjinopigwa Ndzimu,

²⁰ne zwigadziko zwe mavone awo e golide mbuyanana zwinomisiwa mbeli kwe bugalo gwakayengemala gutjamukati sekwa kwakalebgwa;

²¹maluba ne mavone ne milipo ye golide mbuyanana,

²²zwidzimi zwe mavone ne zwikutili ne ndigwana dzinopisila motsha ne makambana e moto, zwakathamwa nge golide mbuyanana. Zwija zose izwezwi zwakabe zwakathamwa nge golide mbuyanana. Mikoba ye tjakuzhe ne mikoba inongina ku Bugalo gwakayengemala kupindisa yakabe yakabuiwa nge golide.