Read Kalanga 2 Zwiyitikalo 5 Bible Online

2 Zwiyitikalo 5 - Kalanga bible

2 Zwiyitikalo 5

¹Ndiwo nshingo wose wakashingwa ndi Mambo Solomoni mu Ng'umba ya Yahwe kudzina uwila. Solomoni wakazhisa zwija zose Dafite tate babe zwabakabe bazwipa Ndzimu, siliva ne golide ne zwishingisiwa zwakayengemala ngono kazwibiganya mu matula e Ng'umba ya Yahwe.

²Ipapo Mambo Solomoni kadana sholotjena dze Iziraela, misholo yose ye njudzi na boshe be misha ye Iziraela kuti bazhe kunli ku Jerusalema kuti batole Bhokisi le Tjidumano tja Yahwe mu Ziyoni nzi nkulu wa Dafite, balizhise ku Ng'umba ya Yahwe.

³Bathu bose bakakubunganila kuna mambo nge tjibaka tje nzano mu mwedzi we kutendeka.

⁴Sholotjena dzose dze Iziraela dzikazha, ngono Balevi bakatola Bhokisi le Tjidumano.

⁵Bapirisiti ne Balevi bakatola Bhokisi le Tjidumano tja Yahwe ne nshasha we bushanganilo ne zwija zose zwakayengemala zwakabe zwili mu nshasha.

⁶Ngono Mambo Solomoni ne gubungano le Baiziraela lakabe lakubunganila mbeli kukwe, lakabe lili mbeli kwe Bhokisi le Tjidumano lipisa zwibhayilo zwe pkhwizi ne ng'ombe dze bunji gusibushoma, gusinga balike.

⁷Ndizo bapirisiti bakatola Bhokisi le Tjidumano tja Yahwe bakalibiga ku bugalo gwakayengemala gutjamukati gwe Ng'umba ye Ndzimu igo Bugalo gwakayengemala kupindisa, kusi kwe mapapilo e dzikherubhu.

⁸Mapapilo e dzikherubhu akabe akaangama pezhugwi kwe bugalo gose gwe Bhokisi le Tjidumano kuyitila kuti dzikherubhu dzizwimbe kose ne mapango alakabe lakagadzikwa muali.

⁹Ngono mapango akabe ali malefu kwakabe theswi dzawo dziboneka uli pa bugalo gwakayengemala mbeli kwe bugalo gwakayengemala kupinda magalo wose akayengemala. Koga dzisingake dzikabong'wa nge ukuzhe. Ngono mapango iyawo atjiyapo na nasi.

¹⁰Kwakabe kusina tjimwe mu Bhokisi le Tjidumano kuzhe kwe mabgwe mabili e zwileiti akabe alongwa ndi Mushe ku Horebu, Yahwe pabakathama tjidumano ne Baiziraela, basinobe babhuda mu shango ye Egipiti.

¹¹ Bapirisiti bakadwapo bakabhuda mu bugalo gwakayengemala kupinda magalo wose. Bapirisiti bose bakabe bali ipapo bakabe bazwitjenapadza koga bose basakalingilila makupo abo,

¹²Balevi bose bakabe bali bambi bo Asafa na Hemani na Jeduthuni ne bakololo babo kose ne makamu abo bakama ku bhezhuba kwe tjibeso tjinopisigwa zwibhayilo bakabe bakaambala matyila akanaka matjena belidza zwilidzo zwe simbali ne zwe laya ne matende. Bakabe bana bapirisiti bali zana ling'ompela lina bali makumi mabili (120) ibo belidza nyanga.

¹³Balidzi be nyanga ne bambi bakabe bali tjithu tjingompela bemba bekudza kakale beboka Yahwe, bakabe bemba beijalo belidza nyanga ne dzisimbali ne zwimwe zwilidzo bembila pezhugwi kukudza Yahwe beti, “Kudzani Yahwe ngobe bakalulwama Ludo gwabo gusingazunguzike nge gusingapele.” Ng'umba ya Yahwe ikaambadziwa nge gole,

¹⁴kwakathama kuti bapirisiti basitubule kushinga nshingo wabo beyitiwa nge gole ngoti gudzo la Yahwe lakabe lazhala Ng'umba ye Ndzimu.