Read Kalanga 2 Zwiyitikalo 6 Bible Online

2 Zwiyitikalo 6 - Kalanga bible

2 Zwiyitikalo 6

¹Ipapo Solomoni kati, “Yahwe bakati banowogala mu zhalima lakati zwititi.

²Ngono ndakamubakila ng'umba ye tjimo tjipezhugwi, bugalo gwenyu gwamunowogala nge kusingapele.”

³Kukati gubungano lose le Iziraela lili mile ipapo, Mambo Solomoni katendebuka kabakombolela.

⁴Ngono kabe eti, “Ngakukudziwe Yahwe Ndzimu we Iziraela bati nge luboko gwabo bakashingikadza tjabakagadzabgwe tate bangu Dafite beti,

⁵‘Tjinga kwe zhuba landakadusa bathu bangu Baiziraela mu Egipiti, akuna nzi nkulu mu njudzi dzose dze Iziraela wandakashalulila kubakigwa ng'umba inowogala zina langu kakale akuna nthu wandakashalula kubusa bathu bangu Baiziraela.

⁶Koga ngwenu ndashalula Jerusalema kuti ibe iwo nzi wandinowonamatiwa kuuli kakale ndashalula Dafite kuti abe iye unotungamila bathu bangu.’

⁷“Kukagala kuli mu moyo wa tate bangu Dafite kuti banowobakila zina la Yahwe Ndzimu we Iziraela ng'umba.

⁸Koga Yahwe bakadwa tate bangu Dafite bakati, ‘Kwakalulwama kuti kube kuli mu moyo uwo kuti ubakile zina langu ng'umba,

⁹nenguba kwakajalo, aungabakile zina langu ng'umba, koga mwana uwo unowozwagwa ndiye unowobakila zina langu ng'umba.’

¹⁰Ngono ngwenu Yahwe bashingikadza kugadzabgwe, ngobe ndamuka mu bumo gwa tate bangu Dafite, agala mu tjigalo tje bushe gwe Iziraela Yahwe sekwa bakagadzabgwe, kakale ndabakila zina la Yahwe, Ndzimu we Iziraela ng'umba.

¹¹Ngwenu ndathamila Bhokisi le Tjidumano bugalo, ilo lakasenga tjidumano tja Yahwe tjabakathama ne bathu be Iziraela.”

¹²Ndizo Solomoni kama mbeli kwe tjibeso tjinopisigwa zwibhayilo tja Yahwe, mbeli kwe gubungano lose le Iziraela, kamilidza maboko awe akaalingisa ku zhuzhugwi,

¹³Solomoni wakabe athama itubhu nge phangula tjakabe tjakabakiwa pakati kwe nsha, budzilo gwatjo gwakabe guli thambo dzili shanu bupabi gwatjo guli thambo dzili shanu bulefu kuyenda pezhugwi guli thambo dzili thatu. Solomoni wakatatha itubhu kathigama mbeli kwe gubungano lose le Iziraela, kamilidzila maboko kudzimu,

¹⁴ngono katembezela eti, “Imwi Yahwe, Ndzimu we Iziraela, akuna Ndzimu unonga imwi kudzimu pezhugwi kene pasi mu shango, molondolodza tjidumano tjenyu ne ludo gusingazunguzike mu balanda benyu ha be muhwa nge moyo yabo yose.

¹⁵Makalondolodza kugadzabgwe kwenyu kwamakagadzabgwe nlanda wenyu tate bangu Dafite, nasi mashingikadza dama lenyu limwe ne limwe nge masimba enyu.

¹⁶Ndizo ngwenu, Yahwe, Ndzimu we Iziraela, londolodzani tjamakagadzabgwe nlanda wenyu tate bangu Dafite muti, ‘Akutowoshayika nlume mu zwizekugwana zwizo unowogala pa tjigalo tje bushe gwe Iziraela, ha bakololo babo banga be ne njele mu zila dzabo, beyenda mbeli kwangu sekwa wakabe uyenda mbeli kwangu iwe.’

¹⁷Ndizo ngwenu, imwi Ndzimu we Iziraela, thamani kuti dama lenyu lizhadzisike lamakaleba ne nlanda wenyu tate bangu Dafite.

¹⁸“Apa dumbu Ndzimu ungagala mu shango kene? Naiko kudzimu na pezhugwizhugwi akungabe bugalo gwakamulizana. Ngono ng'umba iyeyi yandakabaka ina bukulu gungapani gwaingamulizana kene?

¹⁹Nenguba kwakajalo Yahwe Ndzimu wangu, itilani hanya ntembezelo we nlanda wenyu muamutjile kukumbila kukwe ne ntembezelo waanotembezela mbeli kwenyu nasi,

²⁰kuti zhisho lenyu libe pezhugwi kwe ng'umba iyeyi siku ne sikati, bugalo igogu gwamakaleba muti, ‘Zina langu lowobe muili,’ ndizo muhwe ntembezelo unotembezegwa nge nlanda wenyu akalinga bugalo igogu.

²¹Ihwani kukumbila kwe nlanda wenyu nekwe bathu benyu Baiziraela ha betembezela bakalinga bugalo igogu. Ihwani muli mu bugalo gwenyu kudzimu muamutjile mutizwiibhatigwe.

²²“Ha nthu atjinyila ikamu tjitje kube kuyi atune, ebe ezha etuna mbeli kwe tjibeso tjenyu tjinopisigwa zwibhayilo mu ng'umba iyeyi,

²³ipapo Yahwe, muhwe muli kudzimu mutole thambo. Musumikilisa balanda benyu, mulobe shamu una nlandu nge kunkhiga nlandu uwe mu nsholo, mubuzile nlulwami kuyenda nge ndulamo iye.

²⁴“Ha bathu benyu Baiziraela bamutjinyila, bebe bekundiwa nge zwita zwabo mbeli kwenyu, koga bebe beshandukila kumuli, bedana zina lenyu, betembezela bemukumbila bali mu ng'umba iyeyi,

²⁵mubahwe muli kudzimu, muzwiibhatigwe zwibi zwe bathu benyu Baiziraela, mube mubabgwiliza ku shango yamakapa bobatategulu babo.

²⁶“Ha kudzimu kwazhaligwa vula isingane ngobe bathu benyu bamutjinyila, ngono ha beshandukila zwibi zwabo, belinga ku ng'umba iyeyi, betembezela bedana zina lenyu, ngoti mubaloba,

²⁷mubahwe muli kudzimu, muzwiibhatigwe zwibi zwe balanda benyu Baiziraela. Mubadiye ndulamo, kuyenda mu zila yabakafanila yenda muili. Mube mubanisila vula mu shango yabo, yamakabapa kube thaka.

²⁸“Ha kuna bhamba mu shango, ha kuna bugwele kene mathunde ali zwimbubgwi kene ana hwuzwi kene ejiwa nge phashu kene nge zwikonyana, kene bathu banginiligwa nge zwita zwabo mu mizi yabo, kene kuna gatekate le bugwele kene kuna bugwele gwawa,

²⁹muhwe mitembezelo yabo. Ha mmwe we bathu benyu Baiziraela, ezha nge kuhwa zogwadza, bemilidzila maboko abo ku ng'umba iyeyi betembezela,

³⁰muhwe mitembezelo yabo. Mubahwe muli mu nzi wenyu kudzimu, mubabhatshe. Ndimwi moga munoziba zwimu moyo ye bathu. Mubhatshe nthu mmwe ne mmwe kuyendidzana ngokumbila kukwe.

³¹Kuti ndizo bathu benyu bamuhwe mu zwibaka zose bali mu shango yamakapa bobatategulu bedu.

³²“Nenge ntaya usi we ludzi gwe bathu benyu Baiziraela, ha angazha edwa ku shango ikulekule, ezhila zina lenyu ne simba lenyu gulu ne luboko gwenyu gwamakatambunudza, ha ezha wotembezela akalingisana ne ng'umba iyeyi,

³³muhwe muli kudzimu ku bugalo gwenyu ngono muthame ikoko kuti ndizo bathu bose be shango bazibe zina lenyu kakale bamutje se bathu benyu Baiziraela. Banowoziba kuti Ng'umba iyeyi yandamubakila ndipo pamakafanila zina lenyu lidang'wepo.

³⁴“Ha bathu benyu bebhuda beyenda ku ngwa, kunogwa ne zwita zwabo, bebe betembezela bakalinga nzi nkulu uwoyu wamakashalula ne ng'umba iyeyi yandakabakila zina lenyu,

³⁵muhwe mitembezelo ne kukumbila kwabo muli kudzimu, ngono mubape gwendo.

³⁶“Ha bathu benyu bangamuthamila tjibi, ngoti akuna nthu usingake kathama tjibi, ngono kube kuti nge bushongola gwenyu mube mubalonga mu maboko e zwita zwabo, kuti ndizo batapigwe ku shango ye zwita zwabo, kule kule kene pejo pejo,

³⁷bebe beti bali ku shango yabakatapigwa ko bebe bemukumbula mu moyo yabo, ngono bebe beshanduka, bemutembezela bali mu shango ya bakabatapa beti, ‘Takatjinya, ngono tikabhuda mu zila tikathama mbipo,’

³⁸ha bashanduka mu mikumbulo yabo yose ne mu moyo yabo yose bali mu shango ye zwita zwabo, zwakabatapa, bebe betembezela bakalinga ku shango yabo yamakapa bobatategulu babo, nzi nkulu wamakashalula, ne ku ng'umba iyeyi yandakabakila zina lenyu,

³⁹muhwe mitembezelo ne kukumbila kwabo muli mu bugalo gwenyu kudzimu, mubahwile ngoni.

⁴⁰Ngono ngwenu Ndzimu wangu, zhulani mesho ne zebe muhwe ntembezelo iwoyu we magalo iyawa.

⁴¹“Ngono ngwenu Yahwe Ndzimu tjimilikani ne Bhokisi le Tjidumano ilo simba lenyu gulu muzhe ku bugalo gwenyu gwe kunyaluluka. Ambadzani bapirisiti benyu jidzo mu nshingo wabo ngono bayengemali benyu bose ngabashathile bubuya gwenyu.

⁴²Yahwe Ndzimu, musindifupatile imi nzhodziwa wenyu! Kumbulani ludo gwenyu gusingazunguzike mu nlanda wenyu Dafite.”