Read Kalanga 2 Zwiyitikalo 7 Bible Online

2 Zwiyitikalo 7 - Kalanga bible

2 Zwiyitikalo 7

¹Solomoni kati afidza ntembezelo uwe, moto ukadwa kudzimu ukapisa zwibhayilo zwinopisiwa ne zwimwe zwibhayilo zwakabe zwadusiwa, ngono tjedza tja Yahwe tjikazhala Ng'umba ye Ndzimu.

²Bapirisiti bakabe basingatubule ngina mu Ng'umba ya Yahwe ngobe tjedza tja Yahwe tjakabe tjilizhele mu Ng'umba ya Yahwe.

³Baiziraela bose bakati be bona moto udeluka ne tjedza tja Yahwe mu Ng'umba ye Ndzimu bakathigama bakawa nge njiso mu budzilo, bakanamata ngono bakaboka Yahwe beti, “Yahwe bakanaka, ngobe ludo gwabo gusingazunguzike gugelile tjatjose.”

⁴Ipapo Mambo Solomoni ne bathu bose be Iziraela bakadusila Yahwe zwibhayilo.

⁵Mambo Solomoni wakadusa zwibhayilo zwili zwiwulu zwili makumi mabili ana zwibili (22 000) zwe mikono ne pkhwizi dzili zwiwulu zwili zana lina makumi ali mabili (120 000). Mambo ne bathu bose be Iziraela bakabe betola Ng'umba beipa Yahwe.

⁶Bapirisiti bakatola magalo abo ne Balevi bo bakabe balimile bakalingisana nabo bakabhata zwilidzo zwakabe zwathamwa ndi Mambo Dafite kuti zwilidziwe mukukudza Yahwe ngobe ludo gwabo gusingazunguzike gugelile tjatjose, bapirisiti bakabe belidza nyanga ngono Baiziraela bakama nge makumbo.

⁷Solomoni wakayengemadza pakati kwe nsha wakabe uli mbeli kwe Ng'umba ya Yahwe. Kadusila zwibhayilo zwinopisiwa ne tjipo tje mathunde ne mafuta e zwibhayilo zwe mbakisano ipapo, ngobe tjibeso tjinopisigwa zwibhayilo tje phangula tjakabe tjili mbeli kwa Yahwe tjakabe tjisingaswike kupisigwa zwipo zose zwakabe zwakafanila pisiwa.

⁸Ipapo Solomoni ne gubungano lose le Iziraela bakadwa babhata Nzano we Mishasha wakatola mazhuba ali kutendeka. Kwakabe kuli mbunga nkulu we bathu kudwa ku nkoba we Hamati kunoti ku lukobana gwe Egipiti.

⁹Kukati mu zhuba le buzhanakadzi bakabe ne nshangano nkulu ngobe bakabe batola mazhuba ali kutendeka beshinga nshingo we kupa tjibeso tjinopisigwa zwibhayilo Yahwe ne mazhuba mamwe ali kutendeka mu nzano.

¹⁰Ngono wakati mu zhuba le bumakumi mabili ana matatu mambo kapaladza bathu kuti bayende ku makanyi abo, bakayenda bakashathila bubuya gose gwa Yahwe gwabalakidza Dafite na Solomoni ne bathu babo Baiziraela.

¹¹Ngono kwakati Solomoni apedza kubaka Ng'umba ye Ndzimu ne kubaka ng'umba ye bushe na zose zwaakabe eshaka kuzwithama mu Ng'umba ye Ndzimu ne iye,

¹²Yahwe bakazwilakidza kuna Solomoni busiku ngono bakati kunli, “Ndahwa ntembezelo uwo ngono ndazwishalulila kakale ndaamutjila bugalo igogu kuti ndipo panowothamigwa zwibhayilo zwangu.

¹³Ha ndizhalila kudzimu kuti vula isine kene nditumila phashu kuti dziwodukudza shango kene nditumila bugwele ku bathu bangu,

¹⁴ha bathu bangu banodang'wa nge zina langu bangashandukila zila dzabo mbiimbi ha benditembezela ndowobahwa ndili kudzimu ngono azwiibhatigwa matjinyo abo ngono apodza shango yabo.

¹⁵Ngwenu mesho angu anowozhuka ne zebe dzangu dzowoteedza mitembezelo inothamwa mu bugalo igogu,

¹⁶ngoti ndashalula ng'umba iyeyi kakale ndaiyengemadza kuti ibe ipo panowobe ne zina langu nge kusingapele. Mesho angu ne moyo wangu zowobe ipapo zwibaka zose.

¹⁷Koga iwe, haunganditobela koga sa Dafite tate babo bakanditobela, ukalondolodza zose zwandakakudwa nditi uzwishinge kakale ukabhulutana milayo yangu,

¹⁸ndowobambila bushe gugo tjatjose sekwa ndakagadzabgwe tate babo Dafite nditi, ‘Aakutowosheteka nthu ungabusa Iziraela.’

¹⁹Koga haungafupatila milayo yangu yandabiga mbeli kuko ukathigamila midzimu ipoga,

²⁰ndowokutatila kuzhe kwe shango iyeyi yandakakupa ne Ng'umba iyeyi yandakayengemadzila zina langu, inowobe tjiseko mu bathu kakale ikalingigwa pasi.

²¹“Ngono mmwe ne mmwe unopinda Ng'umba iyeyi inokudziwa unowokaabala ngono kabhuzwa kati, ‘Ini Yahwe bathama tjakajali mu shango ne Ng'umba iyeyi?’

²²Ipapo banowoti, ‘Ngoti bakalashila kutjena Yahwe Ndzimu wa bobatategulu babo, ibo bakabadusa mu shango ye Egipiti, ngono bakatobela midzimu ipoga bakainamata kakale bakaishingila ndizo babazhisila mbipo yose iyeyi.’ ”