Read Kalanga 2 Zwiyitikalo 8 Bible Online

2 Zwiyitikalo 8 - Kalanga bible

2 Zwiyitikalo 8

¹Ku bupelo gwe makole ali makumi mabili, Solomoni asinobe abaka Ng'umba ya Yahwe ne iye,

²Solomoni kamusa mizi mikulu yaakabe apiwa ndi Huramu ngono kabiga Baiziraela muili.

³Solomoni kayenda ku Hamatizoba ngono kaitapa,

⁴kabaka nzi we Tadimori mu tjilambanyika ne mizi mikulu yose ye matula yaakabe abaka mu Hamati.

⁵Solomoni kamusa Bhetihoroni wakatathila ne Bhetihoroni wakakungulukila kube mizi ye matizhilo yakabakwa nge makuma ne mikoba ne zwizhalilo zwe butale,

⁶kamusa ne Bhaalati ne mizi yose ye matula ya Solomoni yaakabe anayo ne mizi mikulu yose yakabe igala koloyi dzidze dze ngwa ne yakabe igala bataswi babe be mbizi ne tjimwe ne tjimwe tja Solomoni tjaakabe eshaka kutjibaka mu Jerusalema neku Lebanoni ne mu shango ye mbuso uwe wose.

⁷Malimbelimbe e bathu be Bahiti ne Baamori ne Baperizi ne Bahivite ne Bajebusi ibo bakabe basi be Iziraela,

⁸hwuti, Baiziraela bakabe basabalobesa bose, ibabo ndibo Solomoni baakathama balanda kudzina kube nasi.

⁹Koga Baiziraela ibo Solomoni kasibathame balanda ku nshingila koga bakabe babhayani ne balauli be babhayani babe ne balauli be koloyi dzidze dze ngwa ne bataswi babe be mbizi.

¹⁰Mambo Solomoni wakabe ana batungamili bali mazana mabili ana bali makumi mashanu (250) bakabe bali balingilili bana simba mu bathu.

¹¹Solomoni kadusa nkololokadzi wa Faro mu nzi nkulu wa Dafite ku ng'umba yaakabe ambakila ngono kabe eti, “Nfumakadzi wangu angagale mu ng'umba ya Dafite mambo we Iziraela ngobe magalo mamwe ne mamwe akatongogala Bhokisi le Tjidumano akayengemala.”

¹²Ipapo Solomoni wakadusila Yahwe zwibhayilo zwinopisiwa mu tjibeso tjinopisigwa zwibhayilo tja Yahwe tjaakabe abaka mbeli kwe Ng'umba ye Ndzimu,

¹³wakadusa zwibhayilo zwinopisiwa kuyendidzana na zose zwinoshakiwa mu milayo ya Mushe ngekwe mazhuba wose akayengemala ali mazhuba e Ndzimu ekunyaluluka abo Sabata neye Mwedzi ugala ne mizano mitatu ye gole ne gole: Nzano we tjiwunga tjisina mbidzo ne Nzano we zwavung'wa mu minda ne Nzano we Mishasha.

¹⁴Kuyendidzana nge milayo ya Dafite tate babe wakabiga makupo e bapirisiti nge mishingo yabo ne Balevi nge nshingo wabo we kumba mu misi ye mazhuba wose e mishingo, kabiga balisi be mikoba ku mikoba ngo siyana kwayo, koga Dafite sekwa akalaula.

¹⁵Ndizo abazopambuka muna tjakabetjadwiwa bapirisiti ne Balevi ndi mambo muna zose ngekwe zwe matula.

¹⁶Nge tjibaka itjetjo ndiyo mishingo yose iyeyi yakashingwa ndi Solomoni. Kudwa tjose mu tjibaka tje kuteyiwa kwe Ng'umba ya Yahwe kudzina inopelela.

¹⁷Ipapo Solomoni kayenda ku Eziyonigeberi mamilo e zwikepe ne ku Eloti ku nsupho we gungwa mu shango ye Edomu.

¹⁸Mambo Huramu kantumila zwikepe ne balanda ne bamwe balanda bana luzibo nge gungwa ngono bakayenda ku Ofira kose ne balanda ba Solomoni ngono bakanotola talenta dze golide dzili zana lina makumi mashanu (150), ngono bakadziyisa kuna Mambo Solomoni.