Read Kalanga Ezera 10 Bible Online

Ezera 10 - Kalanga bible

Ezera 10

¹Kwakati Ezera akabhata etembezela, ezwileba milandu iye, elila ezwilashila pasi mbeli kwe Ng'umba ye Ndzimu, kukazha mbunga we bathu be Iziraela, balume, bakadzi ne bana ngono bakankubunganila. Bakalila kunowisazogwadza.

²Ngono Shekaniya nkololo wa Jehiele mmwe we zwizekugwana zwa Elamu, kabe eti kuna Ezera, “Takashaya kugalamoyo mu Ndzimu wedu nge kulobola bakadzi be njudzi dzipoga, be bathu batakabakidzana nabo. Ngono kuzhe kwa ikoko, kutjina kugalabgwe mu Iziraela.

³Ngono ngwenu ngatithameni tjidumano ne Ndzimu tje kuti titate bakadzi ibaba ne bana babo, kuyendidzana ne ikumbuludzo tja she wangu ne tja ibabo banotja nlayo we Ndzimu wedu. Ngakuthamwe sekwa kuli iko mu nlayo.

⁴Tola thambo, ngekuti nshingo uwo, kakale tinawe, sima ndizo uthame uijalo.”

⁵Ezera wakamilika katola bapirisiti banolaula ne Balevi ne itjaba tje Iziraela kabatunisa kuti bathame tja lebgwa. Ngono bakatuna.

⁶Ezera wakadwa pa Ng'umba ye Ndzimu kayenda ku ng'umba ya Jehohanani nkololo wa Eliyashibi. Ngono wakati ali ikoko, wakabe asingaje zojiwa asingang'we vula, nge kuti wakabe akadwilila nge kulila, ngobe bathu bakabuya kutapiwa bakabe basagalamoyo.

⁷Zibiso yakadusiwa kukazibisiwa ntuthu wose we Juda ne Jerusalema kuti bose bakabuya kutapiwa bakubungane ku Jerusalema.

⁸Ngono unokong'wa ngekuzha mu mazhuba matatu unowotolegwa zwija zwizwe zose, se tjidumano tje batungamili ne makulukota tjakadumaniwa, ngono unowodusiwa mu gubungano le bakabuya kutapiwa katatiwa.

⁹Kwakati mu mazhuba matatu balume bose be nsha wa Juda ne wa Bhenjamini bakakubungana mu Jerusalema. Mu mwedzi we zhanalume ushwa mazhuba ali makumi mabili bathu bose bakabe baligele mu tjibata tjimbeli kwe Ng'umba ye Ndzimu, betetemesiwa nge tjimo ne nge vula yakabe ina kwazo.

¹⁰Ezera we mpirisiti wakamilika kabadwa kati, “Amuzobe ne kugalamoyo, makalobola bakadzi be njudzi dzipoga mupaphidza nlandu we Iziraela.

¹¹Ngono gwenu mu zwilebe milandu yenyu kuna Yahwe Ndzimu wa bobatategulu benyu, ngono mu thame kuda kwawo. Mu zwithubukanye mu bathu be njudzi dzipoga bamakabapa nabo ne mu bakadzi benyu be njudzi dzipoga.”

¹²Mbunga wose ukadabila nge hwi lipezhugwi uti, “Unolebesa takafanila thama sekwa unoleba.

¹³Koga kuna bathu banjinji ipapa kakale tjibaka tje vula ina, ndizo atingame kuzhe, koga ikoku ate uli nshingo we zhuba ling'ompela kene mabili ngoti takathama nlandu nkulukulu kwazo.

¹⁴Makulukota edu ngaamilile gubungano lose. Mmwe ne mmwe wakalobola nkadzi we ludzi gupoga azhe nge tjibaka tjakabigwa, azhe ne bakulu ne basumikilisi mu nzi nkulu mmwe ne mmwe, kuswikilila bushongola gwe Ndzimu wedu gunotjisa ngekwa ikoku gupela mutili.”

¹⁵Jonatani nkololo wa Asahele na Jahazeya nkololo wa Tikiva ndibo koga bakabe basingadumane na itjetji, Meshulamu na Shabethayi we Nlevi bema nabo.

¹⁶Ngono batapiwa bakashinga sekwalebgwa. Ezera we mpirisiti kashalula balume bakabe bali misholo ye misha kuyenda nge misha yabo ngono kakwala mazina abo. Mu zhuba le kutanga le mwedzi we bugumi bakagala pasi bakashakisisa ngekwe ndebo iyeyi.

¹⁷Ngono mu zhuba le kutanga le mwedzi we kutanga bakapedza ngekwe ndebo ye balume bakalobola bakadzi be njudzi dzipoga.

¹⁸Mu bakololo be bapirisiti bakabe bakalobola bakadzi be njudzi dzipoga: Kudwa mu bakololo ba Jeshuwa nkololo wa Jozadaki ne banung'una babe: Maaseya na Eliezeri na Jaribu na Gedaliya.

¹⁹Bakagadzabgwe kuthubukana ne bakadzi babo be njudzi dzipoga ngono bakadusa tjibhayilo tje nlandu nyundo bedusila nlandu wabo.

²⁰Kudwa mu zwizekugwana zwa Imeri ndi Hanani na Zebadiya.

²¹Kudwa mu zwizekugwana zwa Harimu ndi Maaseya, Elija na Shemaya na Jehiele na Uziya.

²²Kudwa mu zwizekugwana zwa Phashuri ndi Eliyonayi na Ishimaele na Nethanele na Jozabadi na Eleasa.

²³Kudwa mu Balevi ndi Jozabadi na Shimeyi na Kelaya (limwe ili Kelita) na Pethahiya na Juda na Eliezeri.

²⁴Kudwa mu bambi ndi Eliyashibi. Kudwa mu balisi be mikoba ndi Shalumu, Telemu na Uri.

²⁵Kudwa mu bamwe Baiziraela: Kudwa mu zwizekugwana zwa Paroshi ndi Ramiya na Iziya na Malikija na Mijamini na Eleazari na Malikija na Bhenaya.

²⁶Kudwa mu zwizekugwana zwa Elamu ndi Mataniya na Zekariya na Jehiele na Abudi na Jeremoti na Elija.

²⁷Kudwa mu zwizekugwana zwa Zatu ndi Eliyonayi na Eliyashibi na Mataniya na Jeremoti na Zabadi na Aziza.

²⁸Kudwa mu zwizekugwana zwa Bhebayi ndi Jehohanani na Hananiya na Zabhayi na Athilayi.

²⁹Kudwa mu zwizekugwana zwa Bhani ndi Meshulamu na Maluki na Adaya Jashubu na Sheale na Jeremoti.

³⁰Kudwa mu zwizekugwana zwa Pahatimoabu ndi Adina na Kelale na Bhenaya na Maaseya na Mataniya na Bhezaleli na Bhinuyi na Manase.

³¹Kudwa mu zwizekugwana zwa Harimu ndi Eliezeri na Ishiya na Malikija na Shemaya na Simiyoni na

³²Bhenjamini na Maluki na Shemariya.

³³Kudwa mu zwizekugwana zwa Hashumu ndi Matenayi na Matata na Zabadi na Elifeleti na Jeremayi na Manase na Shimeyi.

³⁴Kudwa mu zwizekugwana zwa Bhani ndi Maadayi, Amuramu na Uyele

³⁵na Bhenaya na Bhedeya na Keluhi

³⁶na Vaniya na Meremoti na Eliyashibi

³⁷na Mataniya na Matenayi na Jaasu.

³⁸Kudwa mu zwizekugwana zwa Bhani na Bhinuyi ndi Shimeyi,

³⁹Shelemiya na Nathani na Adaya

⁴⁰na Makanadebayi na Shashayi na Sharayi

⁴¹na Azarele na Shelemiya na Shemariya

⁴²na Shalumu na Amariya na Josefa.

⁴³Kudwa mu zwizekugwana zwa Nebo ndi Jeyele na Mathitiya na Zabadi na Zebina na Jadayi na Jowele na Bhenaya.

⁴⁴Bose ibaba ndibo bakabe bakalobola bakadzi be njudzi dzipoga, bamwe babo bakabe bana bana ne bakadzi ibaba.