Read Kalanga Ezera 3 Bible Online

Ezera 3 - Kalanga bible

Ezera 3

¹Kwakati mu mwedzi we kutendeka ugala bathu be Iziraela bakabe batjigadzikana mu mizi yabo, bakanokubunganila ku Jerusalema bali tjithu tjing'ompela.

²Kudwapo kukamilika Jeshuwa nkololo wa Jozadaki, ana bapirisiti naye na Zerubhabeli nkololo wa Shealitiyele ne makamu awe bakabaka tjibeso tjinopisigwa zwibhayilo tje Ndzimu we Iziraela, kuti ndizo bapisile zwibhayilo mutjili sekwa kwakakwagwa mu Nlayo wa Mushe,[2] nlume we Ndzimu.

³Bakabaka tjibeso tjinopisigwa zwibhayilo pa thiwa dzatjo dzakale, nenguba bakabe betja bathu be mizi yakabapoteleka nabo, kudwapo bakapisila Yahwe zwibhayilo, mangwanana ne madekwana.

⁴Bakazana Nzano we Mishasha sekwa kwakakwagwa, zhuba ne zhuba bakabe beyisa zwibhayilo zwe palo yakabe ishakiwa mu zhuba ilelo.

⁵Shule kwa ikoko bakayisa zwibhayilo zwe misi yose, ne zwipo zwinoyisiwa pa Nzano we Mwedzi ugala ne zwe mizano yakabigwa yose ya Yahwe ne zwipo zwe mmwe ne mmwe zwe moyo ntjena zwidusigwa Yahwe.

⁶Kudwa mu zhuba le kutanga le mwedzi we kutendeka bakatangisa kudusa zwibhayilo zwinopisiwa kuna Yahwe, nenguba muna itjetjo tjibaka thiwa dze Ng'umba ya Yahwe dzakabe dzisathu dzikateyiwa.

⁷Kakale bakapa babezhi be mabgwe ne be hwuni mari ne zojiwa ne zwinong'wiwa ne mafuta kuti zwitumiligwe ku bathu be Tire ne Sidoni, kuti ndizo bazhise mapango e miti ye misida nge gungwa kudwa ku Lebanoni beayisa ku Jopa, sekwa bakabe bapiwa ndetjedzelo ndi Sirasi mambo we Pheshiya.

⁸Mu mwedzi we bubili we gole le bubili, basinoswika ku Ng'umba ye Ndzimu ku Jerusalema, Zerubhabeli nkololo wa Shealitiyele na Jeshuwa nkololo wa Jozadaki bakatangisa kubaka, bakabe bakashangana ne bathu bose babo, bapirisiti, ne Balevi na ibabo bose bakabe bazha mu Jerusalema bedwa ku busungwa. Balevi bose bakabe bana makole ali makumi mabili ne kupinda ipapo bakabe bakatungamila nshingo we kumusa Ng'umba ya Yahwe.

⁹Jeshuwa ne bakololo babe ne makamu awe na Kadimiyele ne bakololo babe ne bakololo ba Juda wakabe edang'wa Hodaviya ne bakololo ba Henadadi ne bakololo babobo ne Balevi bakama nge makumbo bali batungamili be bashingi be Ng'umba ye Ndzimu.

¹⁰Kwakati babaki betangisa kuteya thiwa dze Ng'umba ya Yahwe, bapirisiti bakabe bakaambala zwiambalo zwabo bakabhata dziporompita mu maboko abo, Balevi be nsha wa Asafa bakabe bali mile bakabhata dzisimbali. Bakabe bekudza Ndzimu bakasala shule ndaulo sekwa dzakapiwa ndi Dafite mambo we Iziraela.

¹¹Bakamba bedabidzana, bekudza kakale beboka Yahwe, bebakudza beti, “Yahwe bakanaka, mahwilo ngoni abo mu Baiziraela nge asingapele.” Bathu bose bakabe bepululudza dumbu bekudza Yahwe, ngobe thiwa dze Ng'umba ya Yahwe dzakabe dzatjitangisiwa.

¹²Koga bunji gwe bapirisiti ne Balevi bahwola ne misholo ye misha bakabe babona Ng'umba ye Ndzimu ye kutanga, bakalila kwazo kwazo ha bebona thiwa dze Ng'umba ye Ndzimu dziteyiwa, ngono bunji gwe bathu gwakabe gupululudza gwakashatha.

¹³Ndizo bathu bakabe basingake bakathubukanya zhoba ye shatho mu zhoba ye tjililo tje bathu, ngobe zhoba yakabe ili njisa kwazo ihwika kulekule.