Read Kalanga Ezera 5 Bible Online

Ezera 5 - Kalanga bible

Ezera 5

¹Ipapo balebesambeli, Hagayi na Zekariya nkololo wa Ido, bakalebesambeli ku Bajuta bakabe begala mu Juda neku Jerusalema mu zina le Ndzimu we Iziraela wabakabe balipasi kwawo.

²Ngono Zerubhabeli nkololo wa Shealitiyele na Jeshuwa nkololo wa Jozadaki bakamilika bakatangisa kumusa Ng'umba ye Ndzimu mu Jerusalema. Balebesambeli be Ndzimu bakabe banabo bebabhatsha.

³Mu tjibaka itjetjo Tatenayi nlauli we ntuthu uku gwizi gwe golombedzo le Yufuratesi na Shetaribhozenayi ne bamwe babakabe beshingidzana nabo bakayenda ku bali bakaswika be bhuzwa beti “Ndiyani wamupa simba lekuti mumuse ng'umba iyeyi ne kuibgwiliza mutjimo itjetji kene?”

⁴Bakababhuzwa kakale beti, “Mazina e bathu banobumba ng'umba iyeyi ndiboani?”

⁵Koga Ndzimu wakabe una bakulu be Bajuta, abazomisiwa mu kubaka kuswikilila zibiso iswika kuna Dariyasi, ngono shandulo ikayisiwa ili mu nkwalo.

⁶Woyu ndiwo ntutshi we lukwalo wakatumiligwa ndi Tatenayi nlauli we golombedzo le Yufuratesi na Shetaribhozenayi ne bakabe beshingidzana naye ne bamwe balauli be Golombedzo le Yufuratesi betumilila Mambo Dariyasi.

⁷Mbiko yabakayisa yakabe yakakwagwa sahwoku: “Kuna Mambo Dariyasi. Tshene mungabusa nge mbakiso!

⁸“Mambo bazibe kuti takayenda ku ntuthu we Juda, ku Ng'umba ye Ndzimu nkulu. Inobakiwa nge mabgwe makulukulu, banobiga mapango akasima mu makuma. Kose ikoku banokushinga bakalonga mafupa mu nyama, ngono nshingo wakadwilila kwazo.

⁹“Takabhuzwisisa bakulu ibabo, takababhuzwa kuti ‘Ndiyani wakamupa simba lekuti mumuse Ng'umba ye Ndzimu ne kuibgwiliza mu mbumbiko iyeyi?’

¹⁰“Kakale takababhuzwa mazina abo kuti ndizo tiakwale muzibe mazina e batungamili ibabo.

¹¹“Ngono eyi ndiyo dabilo yabakatipa: ‘Iswi ti balanda be Ndzimu we kudzimu ne shango, ngono tomusa Ng'umba ye Ndzimu yakabe yakabakwa makole manjinji akapinda, iyo yakabe yabakiwa ikapela ndi mambo nkulu we Iziraela.

¹²Koga nge kuti botate bedu bakatanga Ndzimu we kudzimu, wakaletjedza Mambo Nebukadineza we Bhabhiloni Nkhaladiya kakolomodza Ng'umba iyeyi ye Ndzimu, katola bathu bose kabayisa ku Bhabhiloni.

¹³Ne kwakajalo, mu gole le kutanga la Sirasi mambo we Bhabhiloni, Mambo Sirasi wakadusa ndaulo yekuti kumusiwe Ng'umba ye Ndzimu.

¹⁴Wakatola zwija zwe golide ne siliva ne zwakabe zwatogwa ndi Nebukadineza mu Ng'umba ye Ndzimu mu Jerusalema enozwibiga ku ng'umba ye midzimu ku Bhabhiloni. Mambo Sirasi bakatola zwithu izwezo bakazwipa nlume unodang'wa Sheshibhaza wabakabiga kuti abe nlauli.

¹⁵Ngono kandwa kati, “Tola zwija izwezwi unozwibiga ku Ng'umba ye Ndzimu ku Jerusalema, kube kumusiwa Ng'umba ye Ndzimu payakabe ilipo kutanga.”

¹⁶Ndizo Sheshibhaza kazha kabiga nteyo we Ng'umba ye Ndzimu mu Jerusalema. Kudwa mu zhuba ilelo kuswikila ngwenu kubumbiwa kwakadwilila, ngono akuthu kukapela.’

¹⁷“Ha kushathisa mambo, bangaletja kukathamiwa shakisiso mu matula e thawu dze bushe dze Bhabhiloni, kubona kuti Mambo Sirasi bakabe badusa ndaulo yekuti kumusiwe Ng'umba ye Ndzimu mu Jerusalema. Ngono tokumbila kuti mambo batitumilile nkumbulo wabo nge kwe ndebo iyeyi.”