Read Kalanga Ezera 8 Bible Online

Ezera 8 - Kalanga bible

Ezera 8

¹Aba misholo ye misha ne bakazwikwalisa kuzha nami kudwa ku Bhabhiloni mu tjibaka tje mbuso wa Mambo Atazezasi:

²Zwizekugwana zwa Finihasi ndi Geshomu, zwizekugwana zwa Ithamari ndi Daniyele, zwizekugwana zwa Dafite ndi Hatushi,

³zwizekugwana zwa Shekaniya, zwizekugwana zwa Paroshi, kuna Zekariya kwakabe kwa zwikwalisa balume bali zana ling'ompela lina bali makumi mashanu (150);

⁴zwizekugwana zwa Pahatimoabu, Elihoenayi nkololo wa Zeraya iye wakabe ana balume bali mazana mabili (200);

⁵zwizekugwana zwa Shekaniya nkololo wa Jahaziele iye wakabe ana balume bali mazana matatu (300);

⁶zwizekugwana zwa Adini, Ebedi nkololo wa Jonatani iye wakabe ana balume bali makumi mashanu (50);

⁷zwizekugwana zwa Elamu, Jeshaya nkololo wa Ataliya iye wakabe ana balume bali makumi ali kutendeka (70);

⁸zwizekugwana zwa Shefatiya, Zebadiya nkololo wa Mikaele iye wakabe ana balume bali makumi ali zhanakadzi (80);

⁹zwizekugwana zwa Joabu, Obhadiya nkololo wa Jehiele iye wakabe ana balume bali mazana mabili ana bali gumi lina zhanakadzi (218);

¹⁰zwizekugwana zwa Bhani, Shelomiti nkololo wa Josifiya iye wakabe ana balume bali zana ling'ompela lina bali makumi ali tathatu (160);

¹¹zwizekugwana zwa Bhebayi, Zekariya nkololo wa Bhebayi iye wakabe ana balume bali makumi mabili ana bali zhanakadzi (28);

¹²zwizekugwana zwa Azagadi, Johanani nkololo wa Hakatani iye wakabe ana balume bali zana ling'ompela lina bali gumi (110);

¹³zwizekugwana zwa Adonikamu, be bupelo yakabe ili Elifeleti, Jeyele na Shemaya ibo bakabe bana balume bali makumi ali tathatu (60);

¹⁴zwizekugwana zwa Bhigivayi, Uthayi na Zakhuri ibo bakabe bana balume bali makumi ali kutendeka (70).

¹⁵Ndakabakubunganya pa gwizi gunowungila ku Ahava, ngono takagala ipapo tjibaka tje mazhuba matatu. Ndakati ndilinga mu bathu ne bapirisiti awana ili kuti akuna Balevi mubali.

¹⁶Ipapo ayisa thumi kuna Eliezeri, Ariele, Shemaya, Elinathani, Jaribu, Elinathani, Nathani, Zekariya na Meshulamu bakabe bali batungamili na Joyaribu na Elinathani balume bakabe bana zibo hwulu kuti badaniwe,

¹⁷ngono ndakabatuma kuna Ido ntungamili ku Kasifiya. Ndakababudza kuti baswike balebe beitini kuna Ido ne banung'una babe neku bashingi be Ng'umba ye Ndzimu ku Kasifiya, kuti ndizo batitumilile bathu bangazha beshinga mu Ng'umba ye Ndzimu.

¹⁸Se tjiazha tje Ndzimu wedu tjakabe tjinaswi, bakatitumila nlume unohwisisa, edwa mu zwizekugwana zwa Mahili nkololo wa Levi, nkololo wa Iziraela unodang'wa Sherebiya ana bakololo babe ne makamu awe bali gumi lina zhanakadzi, (18)

¹⁹na Hashabiya kose na Jeshaya kudwa mu zwizekugwana zwa Merari ne makamu awe ne bakololo babo ali makumi mabili.

²⁰Kakale bakazha ne bashingi be Ng'umba ye Ndzimu bali mazana mabili ana makumi mabili (220) bakabe bashalugwa ndi Dafite ne makulukota awe kuti babhatshe Balevi. Bose bakadang'wa nge mazina.

²¹Pa gwizi gwe Ahava ndakazibisa mmwe ne mmwe kuti tizwinyime zojiwa kuti ndizo tizwiyise pasi mbeli kwe Ndzimu wedu kuti utipe gwendo gubuyanana ne bana bedu kose ne thundu yedu.

²²Ndakabe ndina shoni dze kukumbila mambo kuti batipe babhayani ne batathi be mbizi kuti batibakilile mu zwita zwatingashangana nazo mu zila, ngobe ndakabe ndabudza mambo kuti ngoni dze Ndzimu wedu dzina mmwe ne mmwe unolinga kuwuli, ngono simba ne bushongola gwawo zowila bose banousiya.

²³Takazwinyima zojiwa ngono tikakumbila Ndzimu wedu ngekwa ikoku. Ngono wakadabila mitembezelo yedu.

²⁴Kudwapo ndakashalula bapirisiti banolaula bali gumi lina babili Sherebiya na Hashabiya ne banung'una babo bali gumi.

²⁵Kudwapo ndakabayelela siliva ne golide ne zwija ne zwipo zwakabe zwadusiwa ndi mambo ne hadzasha dzidze ne makulukota awe, zwakashangana ne zwakabe zwadusiwa nge tjaba ye Iziraela kuti zwishingisiwe mu Ng'umba ye Ndzimu abapa izo.

²⁶Ndakayela abapa mu maboko abo talenta dze siliva dzili mazana ali tathatu ana dzili makumi ali mashanu (650) ne zwija zwakathamiwa nge siliva zwili zana ling'ompela (100) ne talenta dze golide dzili zana ling'ompela (100) ne

²⁷ndilo hwulo dzili makumi mabili (20) dzakathamwa nge golide dze themba ye tjiwulu tji ng'ompela (1 000) tje dzidarisi ne zwija zwe phangula zwili zwibili zwakanaka zwinga golide.

²⁸Ndakati ku bali, “Imwi koga se zwija izwezwi makayengemala, makapiwa Yahwe. Siliva ne golide zwipo zwe moyo ntjena zwakapiwa Yahwe Ndzimu wa bobatategulu benyu.

²⁹Muzwitjengete kwazokwazo kuswikila mu zwiyela mbeli kwe bapirisiti banolaula ne Balevi ne misholo ye misha ye Iziraela mu Jerusalema mu Ng'umba ya Yahwe.”

³⁰Ndizo bapirisiti ne Balevi bakaamutjila siliva ne golide ne zwija zwakabe zwayegwa bezwiyisa ku Ng'umba ye Ndzimu wedu ku Jerusalema.

³¹Mu zhuba le bugumi lina kubili le mwedzi we kutanga takamilika pa gwizi gwe Ahava tilinga ku Jerusalema. Tjiyazha tje Ndzimu tjakabe tjinaswi, Ndzimu wakabe wakati bakilila mu zwita ne mu balalili mu zila.

³²Ngono takaswika mu Jerusalema, tikanyaluluka mazhuba ali matatu.

³³Mu zhuba le bunna mu Ng'umba ye Ndzimu, takayela siliva ne golide ne zwija zwimwe tikazwilonga mu maboko a Meremoti nkololo wa Uriya we mpirisiti, Eleazari nkololo wa Finihasi bana Balevi Jozabadi nkololo wa Jeshuwa na Nowadiya nkololo wa Bhinuyi.

³⁴Tjimwe ne tjimwe tjakabagwa tjikayegwa, ngono kukakwagwa tjimwe ne tjimwe tjabagwa ne tjayegwa mu tjibaka itjetjo.

³⁵Ngono batapiwa bakabuya kudwa mu busungwa bakapisila Ndzimu we Iziraela zwibhayilo: mikono ili gumi lina mibili ili milile njudzi dzili gumi lina kubili dze Iziraela, nyundo dzili makumi ali zhanalume ana dzili tathatu (96) ne pkhwizana dzili makumi ali kutendeka ana dzili kutendeka (77) ne mbudzi dzili gumi lina mbili dze tjibhayilo tje jinyo. Ngono ikoko kose kwakapisigwa Yahwe.

³⁶Kakale bakatola ndaulo ya mambo bakaipa makulukota ne balauli be golombedzo le Yufuratesi. Kudwapo bakabhatsha bathu ne Ng'umba ye Ndzimu.