Read Kalanga Ezera 9 Bible Online

Ezera 9 - Kalanga bible

Ezera 9

¹Kwakati zose izwezwi zwathamwa zwapela, batungamili bakazha kundili bakati, “Bathu be Iziraela bakashangana ne bapirisiti ne Balevi abazozwishalula mu bathu babakabapa nabo be njudzi dzipoga, banoshinga mishingo isingadike inobhatisa shoni, banoshinga mishingo inonga ye bathu be Bakanana, Bahiti, Baperizi, Bajebusi, Baamoni, Bamoabu, Baegipiti ne Baamori.

²Bakatola bakololokadzi babo bakabathama bakadzi babo ne bakadzi be bakololo babo. Mbewu yakayengemala ya zwishanganya ne be zwitjaba. Batungamili ne makulukota ndibo banonyanyisa mu kusangalamoyo ikoku.”

³Ndakati ndihwa ikoku apalula tjiambalo tjangu, asimula mavudzi mu nsholo wangu, asimula ne ndedu, agala pasi ndakazhalilana nge shungu.

⁴Ngono bose bakabe betja matama e Ndzimu we Iziraela bakandikubunganila ngekwe kusagalamoyo kwe bakabuya kutapiwa.

⁵Kwakati mu tjibaka tje tjibhayilo tje madekwana amilika pandakabe ndili gele ndakazhalilana, ndakaambala zwiambalo zwakapaluka, athigama, amilidzila maboko angu kuna Yahwe Ndzimu wangu,

⁶atembezela nditi, “Ndobhakhwa nge shoni kukotamusila nsholo wangu kumuli Ndzimu wangu, ngobe jinyo ledu lipezhugwi kwazo, lopinda misholo yedu ne milandu yedu yakaswika kudzimu.

⁷Kudwa tjose mu mazhuba a bobatategulu bedu kuswikilila ngwenu milandu yedu yakabe mikulu kwazo. Ngono ikoku kuthamwa nge jinyo ledu, iswi na bomambo bedu ne bapirisiti takalingisanyiwa nge thumo, nge kutapiwa, nge kutapigwa ne kubhatisiwa shoni ndi bomambo be njudzi dzipoga sekwa kuli iko ngwenu.

⁸Ngono mu tjibaka tjifupi Yahwe, Ndzimu wedu bakabe ne ngoni mu kutisiyila malimbelimbe, ngono bakatipa magalo mabuyanana mu magalo abo akayengemala, ndizo Ndzimu wedu unopa tjedza mu mesho edu ne kusununguka kushomanana mu bulanda gwedu.

⁹Nenguba takabe tili balanda Ndzimu wedu auzotitizhila mu bulanda gwedu. Wakatilakidza buthu gwawo mbeli kwa bomambo be Pheshiya. Wakatipa tjibaka tjimwe kakale kuti timuse Ng'umba ye Ndzimu ne kuilulwamisa, kakale wakatipa guma le mbakililo mu Juda ne mu Jerusalema.

¹⁰“Ngono ngwenu Ndzimu wedu tingatjalebani shule kwa itjetji kene? Se tisakasala shule milayo yenyu,

¹¹yamakapa balanda benyu be balebesambeli muti, ‘Shango yamunongina muili kube yenyu, i shango yakabipa ibipisiwa nge mishingo ye bathu bamuili. Nge mishingo yabo yakabipa bakazhadza shango nge kutemapala.

¹²Ndizo musitongolobodza bakololokadzi benyu bakololo babo kene bakololo benyu bakalobola bakololokadzi babo. Kakale atizofanila shaka mbakiso kene fumwa mu bali tjibaka tjipi kene tjipi, kuti ndizo musime muje zwithu zwakanaka zwe shango, ngono mu zwisiyile bana benyu zwili lukata gusingapele.’

¹³Tjakatishingikalila i mbuyilo ye zwithu zwakabipa zwatakashinga, milandu mikulu koga imwi Ndzimu wedu makatiloba shamu tukununu koga, kusakalizana jinyo ledu, koga mukatisiyila malimbelimbe anonga iyawa.

¹⁴Tingatjuluka nlayo wenyu kakale, tikalobolana ne bathu be njudzi dzipoga banothama zwithu zwakabipa tjini kene? Ate mungatidelusila bushongola bukulu tjose, mukatilobesa tose kukasala kusina limbelimbe ne nge ling'ompela linotjila kene?

¹⁵Imwi Yahwe Ndzimu we Iziraela makalulwama! Ndiswi koga bakasala mu zhuba lino tili malimbelimbe. Ndiswi ibaba tazha mbeli kwenyu nge milandu yedu, nenguba kusina wedu ungama mbeli kwenyu.”