Read Kalanga Nehemiya 1 Bible Online

Nehemiya 1 - Kalanga bible

Nehemiya 1

¹Awa matama akalebgwa ndi Nehemiya nkololo wa Hakaliya: Kwakati mu mwedzi we Khisilevi[1] mu gole le bumakumi mabili Atazezasi ali mambo imi ndikabe ndili mu nzi nkulu Susa,

²kukazha mmwe we banung'una bangu Hanani ana bamwe balume banodwa ku Juda, ngono ndakababhuzwisisa ngekwe malimbelimbe e Bajuta angadwa akasala mu kutapiwa, ne ngekwe nzi nkulu Jerusalema.

³Ngono bakandidwa bakati, “Malimbelimbe akasala ku ntuthu mu kutapiwa bamu manikano hwulu kwazo ne kulengudzika kukulu kwazo. Guma le Jerusalema lakawa ne matendele alo akapisiwa nge moto.”

⁴Ndakati ndihwa matama iyawa agala pasi alila, ndakabe mu tjililo kwe mazhuba ndizwinyima zojiwa ne kutembezela Ndzimu we kudzimu.

⁵Ngono ndakatembezela nditi, “Yahwe Ndzimu we kudzimu, Ndzimu nkulu kakale unotjisa, imwi munoshingikadza tjidumano tjenyu kuna bose banomuda kakale belondolodza milayo yenyu.

⁶Bonani ndipano, mu ndihweni mube ne ngoni mu nlanda wenyu, anditembezela siku ne sikati, ndikumbilila balanda benyu bathu be Iziraela, ndileba milandu yakathamwa ne balanda benyu, bathu be Iziraela, imi nebe nsha wangu takamutjinyila.

⁷Takamuleyanyila kwazo kakale atizolondolodza ndaulo dzenyu ne milayo yenyu ne sumikiliso dzenyu dza makapa nlanda wenyu Mushe.

⁸“Kumbulani matama amakadwa nlanda wenyu Mushe muti, ‘Amusinga galemoyo, ndowomupaladza mukabe pakati kwe zwitjaba.

⁹Koga amushandukila ku ndili, mulondolodza milayo yangu kakale muishingikadza, nenguba kuna bamwe be bathu benyu bakatapigwa ku mahwombekombe, ndowobakubunganya iko ikweno abazhisa ku bugalo gwandakashalula kuti ibe igo bugalo gwangu.’

¹⁰“Ibaba balanda benyu kakale bathu benyu, ibo bamakadzutunula nge simba lenyu gulu.

¹¹Yahwe, ihwani ntembezelo we nlanda wenyu nenge mitembezelo ye balanda benyu ibo banoda kuteta zina lenyu. Bhatshani nlanda wenyu nasi kuti abhudilile, mambo wa bomambo abe ne moyo nnyolo munli anhwilezogwadza.” Ndakabe ndili mbhati we bhepe le nkumbi la mambo.