Read Kalanga Nehemiya 10 Bible Online

Nehemiya 10 - Kalanga bible

Nehemiya 10

¹Bakabe bali mu hwalo dzakatshambisiwa bakabe bali bo: Nehemiya nlauli ali nkololo wa Hakaliya na Zedekiya na

²Seraya na Azariya na Jeremiya

³na Phashuri na Amariya na Malikija na

⁴Hatushi na Shebaniya na Maluki na

⁵Harimu na Meremoti na Obhadiya na

⁶Daniyele na Ginethoni na Baruku

⁷na Meshulamu na Abija na Mijamini na

⁸Maziya na Bhiligayi na Shemaya. Bose ibaba bakabe bali bapirisiti.

⁹Balevi ibo bakabe bali bo: Jeshuwa nkololo wa Azaniya na Bhinuyi we nsha wa Henadadi Kadimiyele.

¹⁰Zwikamu zwabo bakabe bali bo: Shebaniya na Hodiya Kelita na Pelaya na Hanani na

¹¹Mika na Rehobo na Hashabiya na

¹²Zakhuri na Sherebiya na Shebaniya na

¹³Hodiya na Bhani na Bheninu.

¹⁴Batungamili be bathu bakabe bali bo: Paroshi na Pahatimoabu na Elamu na Zatu na Bhani na

¹⁵Bhuni na Azagadi na Bhebayi na

¹⁶Adonija na Bhigivayi na Adini na

¹⁷Atere na Hezekiya na Azuri na

¹⁸Hodiya na Hashumu na Bhezayi na

¹⁹Harifi na Anatoti na Nebayi na

²⁰Magipiashi na Meshulamu na Heziri na

²¹Meshezabele na Zadoki na Jaduwa na

²²Pelatiya na Hanani na Anaya na

²³Hosheya na Hananiya na Hashubu na

²⁴Haloheshi na Piliha na Shobeki na

²⁵Rehumu na Hashabuna na Maseya na

²⁶Ahija na Hanani na Anani na

²⁷Maluki na Harimu na Bhaana.

²⁸Bathu be Iziraela ne bapirisiti ne Balevi ne balisi be mikoba ne bambi ne bashingili be Ng'umba ye Ndzimu na ibabo bose bakazwithubukanya ne bataya nge kutja nlayo we Ndzimu, kose ne bakadzi babo kose ne bakololo ne bakololokadzi bose bana luzibo ne hwisiso,

²⁹bakashangana ne zwikamu zwabo ne batungamili mu kutuna bezwisunga ngeku zwilonga mu bhiso betuna kuti banowotobela nlayo we Ndzimu, iwo wakabewapiwa ndi Mushe nlanda we Ndzimu, kakale kuti banowolondolodza, bakashingikadza milayo yose ya Yahwe she wedu.

³⁰“Togadzabgwe kuti atitjowolobodza bakololokadzi bedu ku bathu be njudzi dzipoga kene kubalobolela.”

³¹Ha bathu be njudzi dzipoga bezhisa thundu kene mathunde betengesa nge zhuba le Ndzimu lawakashala kaliyengemadza le Sabata tisitongo zwitenga mu zhuba ileli kene mu limwe koga lakayengemala. Ne minda atitjoilima mu gole limwe ne limwe le kutendeka kakale towosutha zwikoloto zose.

³²Tozwimisila kuti titjowotangisa kakale nlayo we kudusila Ng'umba ye Ndzimu wedu tjipo tje siliva gole ne gole.

³³Towodusila Ng'umba ye Ndzimu zwinotobela: Tjiunga tjakayengemala, tjipo tje mathunde ne zwinopisiwa, zwibhayilo zwinopisiwa zwa bo Sabata ne zwibhayilo zwakale zwe Nzano zwe Mwedzi ugala ne mimwe mizano yakabigwa, zwibhayilo zwakayengemala ne zwibhayilo zwe jinyo kugadzanya Iziraela, na zose zwe nshingo we Ng'umba ye Ndzimu.

³⁴Takakandila kubona kuti mu bapirisiti ne Balevi ne mu bathu koga ndiani unowozhisa hwuni lini gole ne gole ku Ng'umba ye Ndzimu wedu, kuti kupisiwe zwibhayilo mu tjibeso tjinopisigwa zwibhayilo tja Yahwe, Ndzimu wedu sekwa kwakabe kuli iko mu nlayo.

³⁵Tozwimisila kuzhisa zwitshwa zwe zhizha ne zwe mitjelo ye miti gole ne gole ku Ng'umba ya Yahwe.

³⁶Sekwa kwakakwagwa mu nlayo, towozhisa bakololo bedu be mbano ne ng'ombe ne mbudzi ne pkhwizi dzakazwagwa kutanga ku bapirisiti banoshinga mu Ng'umba ye Ndzimu wedu.

³⁷Pezhugwi kwa ikoku towozhisa ku bapirisiti mu Ng'umba ye Ndzimu bgwisa gwe tjiunga gwe kutanga ne zwipo zwe mathunde ne zwe mitjelo yedu yose ne nkumbi we zhambi mptshwa ne mafuta. Towozhisa ku Balevi tje bugumi tje zwidzwalo ngobe ndibo banoyenda betola zwebugumi mu mizi yose kwatinoshinga.

³⁸Mpirisiti we nsha wa Aroni wakafanila peleka Balevi abewoamutjila zwebugumi, Balevi bakafanilazhisa tjebugumi muna zwebugumi ku Ng'umba ye Ndzimu mu matula.

³⁹Bathu be Iziraela bakashangana ne Balevi bakafanila zhisa zwipo zwe mathunde ne nkumbi ne mafuta ku matula iko kwakabigwa zwija zwe bugalo gwakayengemala, iko kuna bapirisiti ne balingi be mikoba ne bambi. Togadzabgwe kuti atitowoletjedzela Ng'umba ye Ndzimu wedu.