Read Kalanga Nehemiya 13 Bible Online

Nehemiya 13 - Kalanga bible

Nehemiya 13

¹Kwakati mu zhuba ilelo labakabe bebalila bathu lukwalo gwa Mushe, bakanowila panoti kusibe N'amoni kene Moabu ungadumigwa kungina mu gubungano le Ndzimu nenge limwe zhuba,

²ngobe abazo bhatsha Baiziraela nge zojiwa nenge vula koga bakatapa Bhalamu kuti abalonge bhiso ndizo Ndzimu wedu ukashandula bhiso ilelo likabe gombolelo.

³Baiziraela bakati behwa nlayo iwoyo ubagwa bakazwidusa mu bazhi kuti basibe mubali.

⁴Mbeli kwa ikoku, Eliyashibi we mpirisiti wakabe abigwa ali iye wakalingisana nge kutjengeta matula e Ng'umba ye Ndzimu wedu, wakabe eshinga kwazo kwazo na Tobiya,

⁵ngono wakalulwamisila Tobiya ng'umba hwuluhwulu yakabe ishingisiwa kubiganyigwa zwipo zwe mathunde ne zwino nnuwisa zwakanaka ne zwimwe zwija zwe Ng'umba ye Ndzimu ne zwebugumi zwe mathunde ne nkumbi we zhambi ne mafuta, izo zwakabe zwadusiwa nge nlayo wakapiwa Balevi ne bambi ne balingilili be mikoba ne bapirisiti.

⁶Koga izwezwi zwakati zwishingikala ndakabe ndisi ku Jerusalema, ngobe mu gole le bumakole matatu ana makole mabili (32) ili gole la Atazezasi mambo we Bhabhiloni ndakayenda kuna mambo, koga shule kwe gole akumbila mambo kuti bandisunungule ndi bgwilile.

⁷Ndizo wali azha mu Jerusalema, ngono abona bubi gwakathamwa ndi Eliyashibi gwekululwamisila Tobiya ng'umba mu bhakasa le Ng'umba ye Ndzimu.

⁸Ngono ndakagwadza moyo kwazo, atola zwija zwa Tobiya azwiposela kuzhe.

⁹Ngono kudwapo adusa ndaulo kuti ng'umba iyeyi itjenapadziwe, kube kubgwiliziwa zwija zose zwe Ng'umba ye Ndzimu nge tjipo tje mathunde ne tjinonuhwa zwakanaka.

¹⁰Ndakawana ili kuti Balevi abazopiwa mitezho yabo, ngono awana ili kuti Balevi ne bambi bakabe bakalingisana nge nshingo we Ng'umba ye Ndzimu bakabgwilila ku minda yabo.

¹¹Ndakatukanya batungamili kuti ini Ng'umba ye Ndzimu yakaletjedzegwa. Ngono kudwapo ndakabadana abakubunganya ngono ababiga nge magalo abo.

¹²Bathu bose be Juda bakazhisa zwebugumi zwe mathunde ne nkumbi we zhambi ne mafuta ku matula.

¹³Ndakatola Shelemiya we mpirisiti na Zadoki we nkwalili na Pedaya we Nlevi ababiga kuti babe batjengeti be matula, ndakadwapo nditola Hanani nkololo wa Zakhuri, Zakhuri ali nkololo wa Mataniya kuti abe mbatshi wabo. Ndakatola balume ibaba ngobe bakabe bali balume banogalikabgwe kwazo, ndizo nshingo wabo wakabe uli kukoba zwimu matula.

¹⁴Ndzimu wangu, mundikumbule ngekwa ikoku kwandakathama, ndomukumbila kuti musifupatile zwandakathama nge kugalabgwe ndithamila ng'umba yenyu, Ndzimu wangu ne nge mishingo inobhatigwa muili.

¹⁵Kwakati mu mazhuba iyawo abona bathu be Juda beswina nkumbi nge zhuba le Sabata kakale bezhisa mathunde ne zhambi ne phaya ne zwimwe zwinjinji zwakasengwa nge madonki. Bakabe bezhisa zose izwezwi ku Jerusalema nge zhuba le Sabata, ndizo abatjemelela kutengesa mu zhuba ilelo.

¹⁶Bamwe bathu be nzi we Tire bakabe begala mu Jerusalema bakabe bezhisa hwobe ne zwimwe zwithu zwakasiyana siyana ku Jerusalema, bezwitengesela bathu be Juda nge zhuba le Sabata.

¹⁷Ngono ndakatukanya batungamili be Juda abadwa nditi, “Bubi gweni gungapa ngapa gwa munothama, mu temapadza zhuba le Sabata kene?

¹⁸Kuti Ndzimu akowozhisa mang'oni iyawa mangapa mutili ne mu nzi nkulu, bobatategulu bedu abazobe bathama beijali kene? Ngono ngwenu mowandisa bushongola mu Baiziraela ngo temapadza zhuba le Sabata kene?”

¹⁹Kwakati kutewusila mu madekwana adusa ndaulo kuti mikoba ye Jerusalema izhaligwe kusathu kukabe zhuba le Sabata, ngekuti kakale mikoba isizhugwe kuswikilila zhuba le Sabata lapinda. Ndakabiga balume bangu ku mikoba kuti kusibe mitolo inongina kene inozhisiwa nge zhuba le Sabata.

²⁰Kwakabe tjibaka nge tjibaka batengesi be thundu bakabe belala kuzhe kwe Jerusalema.

²¹Koga ndakabatjemela abadwa nditi, “Ini muizela pa makuma kene? Ha muthama muijali ndowomukubadza.” Kudwa tjose mu zhuba ilelo abazotjazha mu zhuba le Sabata.

²²Kudwapo ndakadwa Balevi kuti bazwitjenapadze, babe beyenda banolingilila ku mikoba kuti ndizo zhuba le Sabata ligale lakatjenapala. Mundikumbule ngekwa ikoku kakale Ndzimu wangu, mube nge ludo gwenyu gusingazunguzike.

²³Mu mazhuba iyawo ndakawana kakale balume be Juda bakabe bakalobola bakadzi Baashidodi ne Amoni ne Moabu.

²⁴Gwamu le bana babo bakabe belebeleka Tjiashidodi kene ndimi ye ludzi gupoga koga basingatubule kulebeleka lulimi gwe Tjijuta.

²⁵Ndakabatuka, abalonga bhiso, bamwe balume ibo abaloba, asimula mavudzi abo, abatunisa mu zina le Ndzimu kuti abatjowopapha belobodza bakololokadzi babo ku bathu be bataya kene kuli kulobolela bakololo babo kene ibo bakalobola bakadzi be bataya.

²⁶Ate ili iyo ndobolo yakajali yakathama kuti Solomoni mambo we Iziraela atjinye kene? Mu zwitjaba zwinjinji kwakabe kusina mambo unonga iye. Wakabe ediwa nge Ndzimu uwe, kakale Ndzimu ukabiga kuti abe mambo we Iziraela, ne kwakajalo wakakwebegwa ku jinyo nge bakadzi be bataya.

²⁷Apa takafanila hwa mbipo yose iyeyi yamunothama kene, mutjinyila Ndzimu wedu ngolobola bakadzi mu bataya kene?

²⁸Mmwe we bakololo ba Jehoyada we nkololo wa Eliyashibi ntungamili we bapirisiti wakabe ali nkwasha wa Sanibalati we N'hori ngono ndakantata.

²⁹Ndzimu wangu, kumbulani koga kuti bakatemapadza tjini mishingo ye bupirisiti ne tjidumano tje bupirisiti ne Balevi.

³⁰Ndizo ndakatjenapadza bapirisiti ne Balevi mu zwithu zose zwe Bezwitjaba ngono abapa mishingo yabo yakabalingisana.

³¹Ndakalulwamisila kuzhisiwa kwe hwuni dzinobesiwa akupisiwa zwibhayilo kuti dzizhisiwe nge tjibaka tjakafanila ne nge mitjelo yekutanga. Ndizo Ndzimu wangu ibeni nge lubu mu ndikumbule.