Read Kalanga Nehemiya 2 Bible Online

Nehemiya 2 - Kalanga bible

Nehemiya 2

¹Kwakati mu mwedzi we Nizani,[2] mu gole le bumakumi mabili le mbuso wa Mambo Atazezasi, kukazhisigwa mambo nkumbi we zhambi ngono atola nkumbi aupa mambo. Kwakabe kuli gwe kutanga ndilingika ndakashoba mbeli kwa mambo.

²Ndizo mambo bakandibhuzwa beti, “Ini ulingika wakashoba zwingapa koga usinga gwale? Ikoku kungabe kugwadzika kwe moyo koga.” Ipapo azhigwa ngotja kukulukulu.

³Ngono adwa mambo nditi “Atshene mambo bangatjilila tja tjose! Dumbu ndinga sashoba tjini ha nzi nkulu iwo ulele bobatategulu bangu watjibe matongo saikoku kene ne nge matendele awo akajiwa nge moto kene?”

⁴Mambo bakandidabila beti, “Unoshakani?” Ndakatembezela Ndzimu ukudzimu.

⁵Ngono kudwapo adabila mambo nditi, “Ha kushathisa mambo kakale ha nlanda wenyu manhwila zogwadza, ndokumbila kuti munga ndiletja ayenda ku nzi nkulu umu Juda iko kuna zwikumbu zwa bobatategulu, kuti ndizo ndinoumusa.”

⁶Mambo bakabe baligele bakabapa ne nfumakadzi wabo ngono bakandibhuzwa beti, “Aubona unowoyenda kwe tjibaka tjingapani kakale unowobuya lini?” Kwakashathisa mambo kuti ndiyende ngono ampa tjibaka.

⁷Ngono ndakati kuna mambo, “Ha kushathisa mambo, bangandipa hwalo dzandinga yenda nadzo ku balauli be ntuthu we Yufuratesi kuti ndizo ndibe ne gwendo gubuyanana kudzina ndiswika ku Juda,

⁸kakale ndokumbila lukwalo gwandinganopa Asafa nlisi we ishaka tja mambo, gunowobe gunlaulila kuti andipe mapango e phanda dze matendele ne guma le nzi nkulu nenge ng'umba yandinonogala.” Ngono mambo bakandipa kose kwandakabakumbila, ngobe Ndzimu wakabe unami.

⁹Ndizo ndakayenda ku balauli be ntuthu we Yufuratesi ngono abapa hwalo dzadwa kuna mambo. Mambo bakabe badusa balauli be babhayani ne batathi be mbizi kuti bayende nami.

¹⁰Ngono Sanibalati we N'hori na Tobiya we hadzasha we N'amoni bakati behwa ikoku, bakagwadza moyo kwazo, kuti kuna nthu wazha kuwothama kuti Baiziraela batjile zubuyanana.

¹¹Ndakayenda ku Jerusalema, agalako mazhuba ali matatu.

¹²Ngono ndakamilika busiku ndina balume basibangana, akuna wandakabe ndabudza kuti Ndzimu wakandidwani kuti nditjithamile Jerusalema. Ndakabe ndisina zwithuwo kuzhe kwetjandakabe ndakatatha.

¹³Ndakati busiku abhuda nge nkoba unoyi Nkoba we Nkuku hapinda pa tshime linoyi le Phungubgwe ndakalinga ku nkoba unoyi we Tjizhalanlota ashola makuma e Jerusalema akaligwa nenge matendele awo akakolomogwa nge moto.

¹⁴Ndakadwapo alinga ku nkoba unoyi we Nsenya neku dziba la mambo, ngono kwakabe kusina zila yakazhuka kungayenda mbizi yangu.

¹⁵Ndakati busiku atathila nge zila ye nkuku ndikanuka makuma, bhelelo ndakabgwilila shule ndakazwitshamba nkwala ndikanongina ne nkoba we Nkuku.

¹⁶Balauli bakabe basingazibe kwandayenda ne kuti ndakabe ndishingani, ngekuti ndakabe ndisathu ndabudza Bajuta ne bapirisiti ne makulukota ne bamwe bakabe bakalingisana ngothama nshingo iwoyu.

¹⁷Kudwapo ndakabadwa ndikati, “Mobona ngwenu mang'oni atimuali, Jerusalema yabe matongo matendele ayo akapisiwa nge moto. Izhani timuse makuma e Jerusalema kuti ndizo tisitja tjilile mukubhakhwa nge shoni.”

¹⁸Ndakababudza kakale kuti Ndzimu wakabe unami kungapani nenge tjandakadwiwa ndi mambo. Ngono bakashandula beti, “Ngatitangiseni kumusa!” Ndizo bakazwiloba ifuba kutangisa nshingo iwoyo.

¹⁹Ngono kwakati Sanibalati we N'hori na Tobiya gombgwa le N'amoni na Geshemu we N'arabu behwa ngekwako bakatiseka mahanya betidadila beti, “Ini itjetji tjamunothama kene? Mopandukila mambo kene?”

²⁰Ndakabashandula nditi, “Ndzimu we kudzimu ndiwo unotithama kuti tibhudilile, iswi, balanda bawo towotangisa kubaka, ngono imwi amuna gobe kene simba mu tjimwe ne tjimwe ngobe musina gobe mu zwiyitikalo zwe Jerusalema.”