Read Kalanga Nehemiya 8 Bible Online

Nehemiya 8 - Kalanga bible

Nehemiya 8

¹Ngono bathu bakakubungana bali tjithu tjing'ompela pa tjibata tji mbeli kwe Nkoba we Vula, bakadwa Ezera we nkwalili kakale ali mpirisiti kuti azhise lukwalo gwe nlayo wa Mushe, iwo wakapiwa Iziraela ndi Yahwe.

²Mu zhuba le kutanga mu mwedzi we kutendeka, Ezera wakazhisa nlayo mbeli kwe balume ne bakadzi bakabe betubula kuhwisisa.

³Wakaubala akalingisana nge tjibata tji mbeli kwe Nkoba we Vula, kutangisa mangwanana kunoti masikati mbeli kwe balume ne bakadzi bakabe betubula kuhwisisa. Bathu bose bakabe bakabhulutana kwazo.

⁴Ezera we nkwalili wakatatha itubhu tje makwasayile tjabakabe bathamila nshingo iwoyo. Kubapa naye ku luji kwakabe kuli Mathitiya na Shema na Anaya na Uriya na Hilikiya na Maaseya. Ku lumeshwe kwakabe kuna Pedaya na Mishayele na Malikija na Hashumu na Hashabhadana na Zekariya na Meshulamu.

⁵Ezera wakazhula lukwalo gwe nlayo. Bathu bose bakabe betubula kumbona ngobe wakabe alimile ali pezhugwi pakatathila, wakati eguzhula bathu bose bakamilika.

⁶Ezera wakakudza Yahwe, Ndzimu nkulu ngono bathu bakamilidza maboko bakadabila beti, “Ngakujalo! Ngakujalo!” Bakakotamisa misholo bakanamata Yahwe bakathigama, njiso dzabo dzakalinga pasi.

⁷Jeshuwa na Bhani na Sherebiya na Jamini na Akubu na Shabethayi na Hodiya na Maaseya na Kelita na Azariya na Jozabadi na Hanani na Pelaya ne Balevi bakabhatsha kuti bathu bahwisise, bathu ibo bakabe bali mile mu mamo abo.

⁸Bakabala mu lukwalo gwe nlayo we Ndzimu, betoloka[5] bethama kuti utjeneseseke kuti ndizo bathu ba hwisise tjabe tjibagwa.

⁹Nehemiya wakabe ali nlauli Ezera ali mpirisiti kakale ali nkwalili ne Balevi bakabe bediya bathu bakadwa bathu beti, “Zhuba ileli lakayengemala kwazo kuna Yahwe Ndzimu wenyu, musibe mu buyendasi kene musilile.” Ngobe bathu bakabe belila abehwa matama e nlayo.

¹⁰Wakabadwa kati, “Tjiyendani zwenyu, munoja zwakanaka, mung'we nkumbi we zhambi unozipa, mupe basina tjabangaja baje, zhuba ileli lakayengemala kuna She wedu ndizo musilile ngobe shatho ya Yahwe ndiyo simba lenyu.”

¹¹Balevi bakanyaladza bathu bose beti, “Nyalalani ngobe zhuba ileli lakayengemala, musilile”

¹²Kudwapo bathu bose bakayenda bakanoja beng'wa bepabo ibabo basina, bakazana nge shatho hwulu ngobe ngwenu bakabe bohwisisa matama ababudziwa.

¹³Mu zhuba le bubili le mwedzi, batungamili be misha bakashangana ne bapirisiti ne Balevi bakanokubungana pana Ezera we nkwalili kuhwilila kwazo kwazo matama e Nlayo.

¹⁴Bakawana kwaka kwagwa mu Nlayo ndaulo ya Yahwe yabakapa Mushe kuti Baiziraela bakafanila gala mu mishasha mu tjibaka tje nzano we mwedzi we kutendeka,

¹⁵kakale bakafanila zibisa dama ileli kakale baliandamise mu mizi yabo ne mu Jerusalema, “Yendani ku shango ye matombo mu zhise thabi dze ntoba ne dze mitoba ye shango ne dze nshangule ne dze nlala ne dze miti ye mitutshi mubake mishasha nayo” sekwa kwakakwagwa.

¹⁶Bathu bakayenda bakanoshaka thabi ngono bakazwibakila mishasha pezhugwi kwe matenga e ng'umba dzabo ne mu misha yabo ne mu zwing'umbana zwe Ng'umba ye Ndzimu ne mu zwibata zwi mbeli kwe Nkoba we Vula ne mbeli kwe Nkoba we Ifureimi.

¹⁷Bose bakabuya kutapiwa bakabaka mishasha bakagala muili. Kudwa tjose mu mazhuba a Jeshuwa nkololo wa Nuni kunoti mu zhuba ilelo, Baiziraela abazotongo lishathila saikoku. Shatho yabo yakabe ili hwulu kwazo.

¹⁸Zhuba ne zhuba, kudwa mu zhuba lekutanga kunoti le bupelo, Ezera wakabala mu lukwalo gwe Nlayo we Ndzimu. Bakazana nzano mazhuba ali kutendeka ngono mu zhuba lebu zhanakadzi sekwa kuli iko mu nlayo kwakabe ne nshangano.