Read Kalanga Nehemiya 9 Bible Online

Nehemiya 9 - Kalanga bible

Nehemiya 9

¹Mu zhuba le bumakumi manna le mwedzi iwoyo zwawo Baiziraela bakakubungana bakazwinyima zojiwa bakaambala masaka[6], misholo yabo ili zhele hwuluba.

²Baiziraela bakazwidusa mu batayana ngono bakama bakazwileba milandu yabo neya bobatategulu babo.

³Bakamilika pabakabe balipo bakabala mu lukwalo gwe nlayo wa Yahwe Ndzimu wabo nge tjibaka tjimwe, nge tjibaka tjimwe bakazwileba milandu ne kunamata Yahwe Ndzimu wabo.

⁴Pakatathila kwakabe kuna Balevi kuli Jeshuwa na Bhani na Kadimiyele na Shebaniya na Bhuni na Sherebiya na Bhani na Kenani bakamimila nge hwi gulu kuna Yahwe Ndzimu wabo.

⁵Kudwapo Balevi bo Jeshuwa na Kadimiyele na Bhani na Hashabineya na Sherebiya na Hodiya na Shebaniya na Pethahiya bakati “Milikani mukudze Yahwe Ndzimu wenyu nge kusingapele kose. Gudzo ngalibe ku zina lenyu lakayengemala, ngalikudziwe kupinda mazina wose.”

⁶“Imwi moga, ndimwi Yahwe. Makathama kudzimu ne zwinjinji zwimukuli, makathama shango ne zose zwimuili, gungwa ne zwimulili. Mopa tjimwe ne tjimwe butjilo ne bunjinji gwe kudzimu gomunamata.”

⁷Ndimwi Yahwe Ndzimu makazwishalulila Abhuramu mukan'dusa mu Uri ye Bakhaladiya, mukantumila zina muti Abhurahama.

⁸Makawana moyo uwe una bugalimoyo mu muli ngono mukathama tjidumano naye tjekumpa shango ye Bakanana neye Bahiti neye Baamori neye Baperizi neye Bagirigashi zwizekugwana zwizwe. Makashingikadza matama enyu ngobe muli nlulwami.

⁹Makabona tshiyilo ya bobatategulu bedu ku Egipiti, mukahwa tjililo tjabo pa Gungwa Shaba.

¹⁰Makathamila Faro ne bashingi babe ne bathu be shango iye zwilakidzo zwe makaabadzo, ngobe makabe mu ziba kuti Baegipiti bakabhata bobatategulu bedu tjini. Makazwithamila zina, ilo litjatjila na nasi.

¹¹Makapalalanya gungwa mbeli kwabo kuti ndizo bapalame pakawoma pakati kwe gungwa, badziyidzi babo mukabalashila mukatikati kwe vula njinji se bgwe.

¹²Pezhugwi kwa ikoku mu masikati makabatungamila nge gole, mu busiku mukabatungamila nge moto kubapa tjedza mu zila yabakayenda.

¹³Makadelukila pezhugwi kwe Dombo le Sinai mukalebeleka nabo kudwa kudzimu, mukabapa milayo yakwako.

¹⁴Makabazibisa ngekwe zhuba le Sabata mukabapa milayo ne ndaulo nge nlanda wenyu Mushe.

¹⁵Mu zhala makabapa tjiunga tje kudzimu ngono munyota mukabapa vula inodwa mu shongwe, mukabadwa kuti bayende banotola thundu ye shango yamakatuna tjoselele kuti mowobapa iyo.

¹⁶Ngono ibo, bobatategulu bedu, bakabe ne kuzwikudza kakale bakabe ne mitshibhana bakasibhulutane ndaulo dzenyu.

¹⁷Bakalamba teedza kakale bakasitubule kukumbulukigwa matjenamiso amakabathamila. Bakabe ne mitshibhana kakale mu bupanduki gwabo bakashalula ntungamili kuti ndizo ababgwilize mu busungwa ku Egipiti. Ngono imwi mu Ndzimu unozwiibhatigwa, munangoni ne mahwilongoni, ha mutotjimbidza magwadza moyo muna ludo gusingapele. Ndizo amuzobalasha,

¹⁸nenguba bakazwibezhela midzimu ye ng'ombe bebeti, “Woyu i ndzimu wenyu waka mu dusa mu Egipiti,” betuka Ndzimu.

¹⁹Ngono nge ngoni dzenyu hwulu amuzobaletjedzela mu tjilambanyika. Mu masikati gole alizotongomisa kubalakidza zila kene moto ukamisa kuthuta busiku kubalakidza zila yabakabe betobela.

²⁰Makabapa Meya yenyu yakanaka ku badiya. Amuzobanyima mana kakale makabapa vula bana nyota.

²¹Mu makole ali makumi manna makabatjengeta mu tjilambanyika, kwakabe kusina tjabanosheta, zwiambalo zwabo zwakabe zwisingashakale ne makumbo abo akabe asingazwimbe.

²²Makabapa mibuso ne zwitjaba, mukabakobela migathu isipano. Bakatola shango ya Mambo Sihoni we Heshibhoni ne shango ya Mambo Ogi we Bhashani.

²³Makawatsha zwizekugwana zwabo se nyenyedzi dze zhuzhugwi mukabazhisa ku shango yamakabudza bobatategulu babo kuti bangine muili baitole.

²⁴Ndizo zwizekugwana zwakayenda zwikatola shango mukakunda bagali be shango ye Bakanana, mukabalonga mu maboko abo ibo na bomambo babo ne bathu be shango kushinga kuda kwabo nge kwabo.

²⁵Bakatapa matizhilo e mizi mikulu ne shango yaka naka bakatola ng'umba dzilizhele thundu dzakathubukana dzakanaka, matshime akatshiwa kale ne minda dze zhambi ne miti ye mitoba ne nge mitjelo isingapele. Bakaja bakaguta bakakola, bakashathila kululwama kwenyu kukulu.

²⁶Ne kwakajalo bakabe ne kusahwa kakale bakamupandukila, bakazwifupatidza milayo yenyu kakale bakabulaya balebesambeli benyu, bakabe babatjenjedza kuti ndizo bashandukile kakale kumuli, bakamutuka kwakabangalala.

²⁷Ndizo makabaletjedzela mu maboko e zwita zwabo kuti zwibadziyidze. Ngono mu kudziyidziwa kwabo bakalilila kumuli beshaka bhatsho, koga mukabahwa muli kudzimu, ngono nge ngoni dzenyu makabapa basununguli bakaba tjidza mu zwita zwabo.

²⁸Bakati basino gadzikana bakabgwilila kakale bakathama bubi mbeli kwenyu ngono mukabaletjedzela mu maboko e zwita zwabo kuti ndizo zwibalaule. Bakamulilila kakale ngono mukahwa muli kudzimu, ngono nge ngoni dzenyu mukabasunungula misi yose mu maboko e zwita zwabo.

²⁹Makabatjenjedza kuti bashanduke ndizo batobelele nlayo wenyu, koga ngekuzwikudza kwabo bakabe basingalondolodze milayo yenyu, nenguba ili iyo inotjidza. Bakabe ne bukomba bakamuzwifupatidza, bakabe ne mitshibhana bakalamba ku muteedza.

³⁰Makabe ne moyonlefu kwe makole manjinji mubali. Nge Meya yenyu makabatjenjedza ngoshingisa balebesambeli benyu koga bakasiteedze, ndizo mukobaletjedzela be zwitjaba.

³¹Koga nge ngoni dzenyu hwulu ha muzobaletjedzela tja tjose kene mukabalashilila, ngoti muli Ndzimu unangoni ne lubu.

³²Ngono ngwenu imwi Ndzimu wedu nkulu, imwi muna masimba kakale mutjisa, imwi munolondolodza tjidumano tjenyu tje ludo, musitongotola mang'oni atiwila ne awila bomambo bedu, awila batungamili bedu, awila bapirisiti ne balebesambeli, awila kakale botate bedu ne bathu benyu bose kudwa tjose mu mazhuba a bomambo be Asiriya kunoti nasi ali madatha koga.

³³Nekwakajalo makalulwama muna zose zwakatiwila, ngoti makathama nge ndulamo koga iswi takashinga bubi.

³⁴Bomambo bedu, batungamili bedu na bobatategulu bedu abazolondolodza nlayo wenyu, abazobhulutana ndayo kakale bakasiteedze amubatjenjedza.

³⁵Ne mu bushe gwabo bakakong'wa nge kumushingila nenguba bakabe beshathila bubuya gwamakabapa ne shango yakanaka yamakabapa, bakakong'wa nge kumushingila kene kufupatila zila dzabo dzakabipa.

³⁶Ngono ngwenu bonani, nasi tabe balanda, tabe balanda mu shango yamakapa bobatategulu bedu kuti ndizo baje mitjelo yayo ne zwimwe zwakanaka muili.

³⁷Ngekwe jinyo ledu, mitjelo yose inoyenda kuna bomambo bamakaletjedza, banotilaula sekwa banoshaka nge kuda kwabo, tabe mu kudziyidzika kukulu kwazo.

³⁸Ngekwa izwezwi zose zwakashingikala, tothama tjidumano tjakasima nge nkwalo, batungamili bedu, ne Balevi bedu, ne bapirisiti bedu babiga itempa tjinolakidza ha bedumana nako.