Read Kalanga Esita 3 Bible Online

Esita 3 - Kalanga bible

Esita 3

¹Kwakati shule kwe tjibakanyana Mambo Ahasurusi kapa Hamani nkololo wa Hamedatha we N'agagi mamo anopinda makulukota mamwe.

²Bashingi bose be bushe bakabe beteta Hamani kakale benthigamila sekwakabe kuli ndaulo ya mambo koga Modekayi iye kalambana nako.

³Makulukota bakabhuzwa Modekayi kuti ini asingalondolodze tjalebgwa ndi mambo.

⁴Bakalebeleka na Modekayi kanjinji begwisa kuti azwitoboke ndizo athigamile Hamani, koga Modekayi kalambana nako ebabudza ha ali Njuta. Ndizo makulukota akayenda kuna Hamani bakambudza ngekwe mazwibhato a Modekayi.

⁵Hamani wakazhala bushongola kwazo ha ebona mazwibhato a Modekayi.

⁶Koga Hamani wakati asinoziba kuti Modekayi u ludzi bani, kashinyata kwazo kabona kusakafanila kuti ungabulaya iye ega, ndizo Hamani kashaka zila yaangabulaya ludzi gwa Modekayi ndiyo mu ntuthu wose wa Mambo Ahasurusi.

⁷Kwakati mu gole le bugumi lina makole ali mabili le mbuso wa Mambo Ahasurusi kuli mwedzi we kutanga we Nisani, Hamani kadusa ndaulo kuti kukandigwe kubong'we zhuba lakalingisana kuti kulobesiwe ludzi gwe Bajuta mu mituthu yose ya mambo ngono hakata dzikawila mu mwedzi we bugumi una mwedzi mibili mu zhuba le bugumi lina mazhuba matatu unoyi Ada.

⁸Ndizo Hamani kadwa mambo kati, “Kuna bamwe bathu bakaandama mu mituthu yenyu yose, bathu ibaba bana milayo yabo ipoga isingafanane neye bamwe kakale abatolondolodza ndaulo dzenyu, ndizo bathu bakajali amungamililane nabo.

⁹Ha kumushathisa dusani ndaulo kuti bathu ibabo balobesiwe bose ngono imi ndozwimisila kudusa talenta dzili zwiwulu zwili gumi (10 000) dze siliva ndipa be dula la mambo.”

¹⁰Mambo bakaambula ring'i yabo, yakabe ili itjo itempa tjabo bakaipa tjita tjikulu tje Bajuta Hamani nkololo wa Hamedatha we N'agagi.

¹¹Ndizo mambo kabe edwa Hamani eti “Mari nde awo, thama tjaunoshaka nge kwawo, bathu bo ndebabo shinga kuda kuko mubali.”

¹²Ngono kwakati mu zhuba le bugumi lina butatu le mwedzi we kutanga, Hamani kadana bakwalili ba mambo ebabudza tjabakafanila kwala. Bakwalili bakakwalila batungamili ne balauli ne makulukota e mituthu yose nge nkwalo we ntuthu mmwe ne mmwe nenge lulimi gwe ntuthu mmwe ne mmwebo kose kwakabe kwalaugwa ndi Hamani kuti kukwagwe. Ngono bakakwala mu zina la Mambo Ahasurusi bakabe bedzilobesa itempa tjitje.

¹³Batumwa bakatola hwalo bakadziandamisa nge mituthu yose ya mambo. Hwalo idzedzi dzakabe dzakakwagwa kuti iti mu mwedzi we bugumi lina mwedzi mibili we Ada, mu zhuba le bugumi lina matatu balobese Bajuta bose hwola kene ntjetjana kose nge kufanana. Bakabe bakafanila bulawa se mbgwa bebuya betapigwa thundu dzabo.

¹⁴Bakatumila mitutshi ye hwalo idzedzi ngono dzikabagwa kuti ndizo nthu mmwe ne mmwe azwilulwamisile zhuba ilelo.

¹⁵Batumwa bakaandamisa ndaulo idzedzi dza mambo tjinyolotjo mu nzi nkulu we Susa. Ngono ipapo mambo na Hamani bakabe beja beng'wa bakashatha koga nzi we Susa iwo uli zhele buyendasi gusibushoma.